Ларгсса нюжмардий Миллатирттал библиотекалуву хьунни «Дагпродэкспо-2014» регионнал дянивсса XII Дагъусттаннал агропромышленностьрал форум-выставка тIитIлатIисса шадлугърал батIаву.
З. АьбдурахIманова
Аьрасатнал личIи-личIисса регионная цалла продукция ккаккан дан бувкIсса хъамаллурал ва жула производительтурал хьхьичI махъ лахълай,
ДР-лул вице-премьер Шарип Шариповлул кIицI лавгунни, хIакьинусса кьини жучIара «Дагродэкспо» выставка дуллалаву цIакьсса, ххуйсса аьдатрайн кIура дарну душиву.
«Укунсса журалул выставкарду ва форумру сакин бан бюхъаву – республикалул маэшат лахъ хъанахъаврил, цIакь хъанахъаврил барашиннар. Республикалул маэшатраву ца яла хъунмур бутIа агропромышленностьрал бугьлагьиссар. ЖучIара хъанахъисса хьхьичIра-хьхьичIми ккаккиярттугу шяраваллил хозяйстварттаву хъанай дуссар», — бувсунни ванал.
Ванал, мукунма, кIицI лавгунни, махъппурттуву жулва билаятрацIун бавхIусса масъаларттаву хъунмур къулагъас Аьрасатнал Кьиблалийсса регионнах душиву, жулла республикалия маэшатраву, шяраваллил хозяйствалул продукция итадакьлакьавриву конкуренция духIан бюхъайсса регион дансса мурадру бушиву.
МахIачкъала шагьрулул бакIчинал хъиривчу Рафик Буттаевлул чIурчIав дунни, выставкалийн дуккан дурсса дуки-хIачIиялух бурувгун, жулла агропромышленность ци даражалий дуссарив чIалай душиврий. Ванал кIицI лавгунни агропромышленностьрал бутIуву зузиминнан укунсса выставкардая хъунмасса мюнпат бушиву ва жулла республикалий шяраваллил хозяйствардан хасъсса форумру чара бакъа аьркиншиву.
Форумрай гьуртту хьун, жулла республикалиясса производительтал бакъасса, бувкIун бия Сочиллал дикIул комбинат, Ставрополлал крайраясса теплицардал ва цаймигу дуки-хIачIиялул продукция итадакьайсса предприятиярттал вакилтал. Аьмну ттуршунниха ливчусса предприятияртту. Библиотекалул хьулух дия жула «Дагагроснаб» компаниялул итадакьлакьисса мюрщи тракторду, квадроцикллу ва мототехника. Мукунна вайннал итадакьайсса дусса дия халкьуннал тIабиаьтрайн бигьалаган нанийни ва туристътурал ишла дувайсса матахIгу. Халкьуннал машан ласласисса ца яла хъямала дуллалимур продукция дия ЦIумадиял райондалиясса «Дидо» фирмалул итадакьлакьисса ницI, ини, турт ва шагьнал лачIал ва цаймигу гьаннарал иникьали.
Выставкалий дуки-хIачIия ва цаймигу продукция дакъасса, мукунма, бия гьаннараха зузисса, ми машлуйн буккан буллалисса производительталгу, микроорганизмру, бактериярду ххалбигьлагьисса лабораториярттугу.
Выставка тIиртIуну махъ библиотекалул конференц-залдануву хьунни республикалул АПК-луву зузими ва СКФО-рал регионная бувкIсса вакилтал гьурттусса гьарта-гьарзасса форум-батIаву.
