Хъинну аьркинсса ва бусравсса даву дуллай

lolo_8Волонтер тIисса махъ цIусса махъ бакъанугу, волонтершиву цурдарив жучIара махъсса шиннардий дур яла-яла машгьур ва вардиш хъанай. Хаснура жулла республикалий, цIу-цIусса проектру, конкурсру, форумру иширайну щаллу буллалисса ппурттуву. Волонтертурал гьурттушинна дакъа нажагьсса дакъа хъуннасса даву щаллу хъанай дакъар. Булайсса хIакь бакъана, ласайсса харж бакъана, цала бакIрайн хушрай личIи-личIисса давурттив, буржру ласайсса, мукунсса жаваблувшинна цайнна кIункIу дайсса инсанталгу сивсуну ккалли буван бучIир республикалул хIакьсса патриотътуран, яла-яла чIявуми инсантал цимурцаннуву цанмасса мюнпатрах, хайрданух луглагисса, лавсъсса гьарцагу шаттирах багьа ласлан ххирасса жула заманнай. Волонтертурал кумаг бакъа гьич бан къахьунссия вай гьантрай жулла республикалий лавайсса даражалий хьусса Щалвагу Аьрасатнал жагьилтурал кIулшивуртту дулаврил «Вершина» форумгу. Мукун, республикалул волонтертурал хьхьичI кьюкьлуву ва форумрай бия жулва лакку душгу — Лакрал райондалийсса ГьунчIукьатIрал шяравасса Султаннул душ ХIажиева Янагу. Ва форумрай Яна ХIажиева зий бия Азирбижаннава бувкIсса делегациялущал.

Бадрижамал Аьлиева
Яна дуклай бур ДГУ-рал психологиялул ва философиялул факультетрал психологиялул отделениялий 5-мур курсирай. Дуккавриву бакъассагу, ва хьхьичIунну бур вузрал жяматийсса давривугу. Яна бур ДГУ-рал Жагьилтурал иширтталсса байсса комитетрал активистка. Ва ххуллухгу ванил хъинну ххуйну дунни цилла даву, лайкьну ккаккан бунни жулва Дагъусттан хъамаллурал хьхьичI. Пикри барча, мудан «пардавлух личIайсса», амма бусравсса, ххишала дакъа аьркинсса даву дуллалисса волонтертурая, миннал къуццу тIутIавриягу, буллалисса ихтилатраягу биялну хъар хъанай бур республикалул хъамаллураву жуява, жулла республикалия хIасул хъана­хъисса пикрирду. Яна цIакь бувну бивкIсса Азирбижанналмур делегация ххишала бакъа рязийну, ххарину лавгунни. Ва хIаласса волонтертурал дурсса даврия рязийну, вайнная цIарду дуллай бия Аьрасатнал шагьрурдая жучIанма бувкIсса тренерталгу, делегациярдугу, форумрал сакиншинначиталгу.
— Янай, буси ва форумраясса вилвами пикрирду. Рязийну ливчIрав му лавгсса даражалия?
— Гьашину дагъусттаннал аьрщарай «Вершина» форумрал лагрулуву кIилчинну жу Аьрасатнал личIи-личIисса регионнаясса делегациярду кьамул буллалисса. Гьашинурив ва форумрал дазу-зума хъиннура гьарта-гьарза хьуну, ванивух дазул кьатIатусса — Азирбижаннавассагу делегация гьуртту хьунни. Форумрал хъамаллуран, мунивух гьуртту хъанахъиминнан сакиншинначитурал хIадур дурну дия хъинну авадансса программа. Мунийн бувну, цинявннан аьмсса мероприятиярдавух, батIавурттавух гьуртту хьун бакъассагу, бюхълай бия тренингирттал ва мастер-классирттал цанма ччимур ххуллу, даврил тема язи дугьан. Аьрасатнал шагьрурдая республикалийн бучIан бувсса язими тренертурал цалла даву хъинну лавайсса даражалий дунни.
Форум тIитIлатIисса кьини­сса яргсса шадлугърал, микку сакин бувсса миллатирттал майданналлив ялун бувкIсса хъамал махIаттал къабавияв, шиккува­сса жувагума бунну махIатталгу, ххаригу. Форумрал махъра-махъсса кьини хьунни «Брейн-ринг» интеллектуал тIуркIу, муний гьарцаннаща бюхълай бия цалва аькьлу, кIулшивуртту, цалва гьунар ккаккан буван.
— Буси ва форумрайсса волонтер хIисаврайсса вилла ва вилва дустурал даврия.
— Гьарцагу делегациялуцIун цIакь бувну бия форум нанисса ххювагу гьантлий миннал чIарав мудан бикIансса, миннан кумаг буллансса волонтертал. Волонтернал даврил захIматсса цинярдагу этапру жулва жагьилтураща лайкьну лахъан бювхъушиврий дакI дарцIуну бура.
Форум лакьлакьисса кьини Азирбижанналмул делегация бикIу, махъсса вайми делегациярду бикIу, цинявппагу хъамал лавгссар экскурсиялий Дарбантлив. Миннащал, гьай-гьай, жугу – волонтерталгу. Хъамаллуран хъинну ххуй дирзунни гийхсса тIабиаьт, хъирив лавну цIухлай бия Нарын-Къалалул, Дарбант шагьрулул тарихрая. Жугу хъунмасса гъираращал буслай буссияв миннахь жулла республикалия.
Форумрал гьантрай куннащал кув дус хьусса делегациярду ва волонтертал иттату макь къадурккун личIи хьун хъанай бакъая вокзалданий. Му хьусса даражалия рязийну лавгунни делегациярдугу, рязийну ливчIунни мунил сакиншинначиталгу.
Ва форумрал гьантрай цуксса захIмат бувну, циксса гужру харж бувну бухьурчагу, буххаву, бавчIаву кIул хъанайрагу дакъая, муксса хъинну, ххуйну, тIааьнну, гьуртту хъанахъиминнан мюнпатранну хъанай дияхха форумрал гьарцагу даву. Ванивух гьуртту хъанахъисса гьарцагу инсан — участник икIу, волонтер икIу, — дуллалимур дакIнийхтуну дуллай ия. Форум нанисса щаллагу чIумуй волонтертал ва участниктал ца хъунмасса, бавкьусса, нахIусса кулпат кунма бия. Волонтертураннияр участниктуран хIаз бикIайссар тIисса пикрилущалгу на щалва къарязийра. Волонтертуралмур даву, цурда хъинну захIматсса, агьамсса, чIявусса гуж тIалав буллалисса дунугу, мунищала архIал хIазссагу дур. Жу ва форумрай ласарду гихунмай зунсса гужирдал «заряд» ва даврил хъунмасса опыт.
— Азирбижаннал студентътурая ци учин бюхъанссар?
— Азирбижанналмур делегациялухсса бургавурив най дунара ляличIийссара дия, ва «Вершина» форумравух гьуртту хъанахъисса дазул кьатIатусса бувагу бусса ца делегация буну тIийгу. Ттул най бунавасса пик­ригу бия ва делегациялущалсса даву хъинну хIазсса дикIанссар тIисса, мугу щялусса къавхьунни.
Форумравух гьуртту хьун Азирбижаннава бувкIсса цинявппагу жагьилтал итталун багьлай бия цалла дакI тIи­тIаврийну, хъиншиврийну, яргшиврийну. Ми хъунмасса гъирарай кIул хъанай бия цинявннащал. Яла-яла ттун асар хьунни миннал жучIанмасса, волонтертурачIансса, хIурмат. Ккавкказуллал язими аьдатир­ттал зумуну хъинну ххуйну тарбия бувсса оьрчIру бия. Форумрал 1-мур кьини МахIачкъала шагьрулул кIичIирттавух заназийни ми хъинну хъирив лавну, цIусса кIулшивурттах мякьну, цIухлай бия шагьрулул тарихрая, багьу-бизулия, респуб­ликалий ялапар хъанахъисса личIи-личIисса миллатирттал аьдатирттая. МахIаттал-хIайран бунна миннал «любознательностьрал», цимурца цIухлай, цIумур кIул хьунсса хъунмасса гъирарал. Мугу дусса ххай бура миннал жулва чIявуми жагьилтураясса личIишиву. Гъирарай ва гъилишиврущал буслай бия цаллами аьдатирттаягу, ляхълай жулва миллатирттал ва азирбижанналмур миллатрал дянивсса цасса лархьхьусса аьдатру ва кIанттурдугу. Азирбижаннава­сса делегация хьхьичIунну гьур­тту хъанай бия гьарцагу давривух. Дарбантлив нанисса чIумаллив щала ххуллийх балайрду тIий, къавтIий бия.
«Вершина» форумрал був­сса цIусса дустал ххювагу гьантлул дянив куннан кув, ва ца гъансса инсантал кунма, мачча, ххира хьусса, Аьрасатнал цимивагу шагьрулиясса, вокзалданий личIи хьунни, ялунчIилмур форумрайнгу жучIанма бучIансса, ца шинавунгу куннащал кув хьунабакьинсса ниятрай.