Октябрь зурул 30-нний МахIачкъалалив «Дружбалул къатраву», «Живи и дари другим жизнь» тIисса цIанилу хьунни, Дагъусттаннал лайкь хьусса артIистка Аьйшат Айсаевал чирилунсса концерт.

Концертрал сакиншинначигу хьунни «Единая Россия» партиялул Дагъусттаннал регионал отделение.
Чирилун дуллалисса концертрайн бувкIун бия ДР-лул Халкьуннал Мажлисрал председатель Хизри Шихсаидов бакIчисса щалва республикалул депутатътурал корпус, ХIукуматрал ва «Единая Россия» партиялул вакилтал, республикалул муниципал идарарттал каялувчитал. Республикалийсса захIматсса азардал къашавайсса оьрчIан кумаг баву, чIарав бацIаву мурадрайсса чирилунсса даву дансса сиптачитал хьунни «Живи и дари жизнь другим» тIисса региондалул жяматийсса ихIсандалул фонд. Му концерт дурну хьусса арцугу тIайла дурккунни жулла республикалийсса онкологиялул къашавайсса оьрчIан.

Имара Саидова
Концертрал дайдихьулий ва фондрал директор Лейла Каримовал барчаллагь увкунни укун ххаллилсса давурттал чIарав мудан ацIайсса Хизри Шихсаидовлухь ва ДР-лул Президент Рамазан АьбдуллатIиповлухь. Дуллунни миннан фондрал чулухасса «За доброту» тIисса медальлугу. Бувсунни Рамазан АьбдуллатIиповлул кумаграйну онкологиялул къашавайсса душнийн операция буван бювхъушиву. Мунал дурсса даврия кIул хьуну махъ хъиннува гьарза хьуну бур кумаг буван, чIарав бацIан ччимигу. Лейла Каримовал мукунма бувсунни паччахIлугърал каялувчитал хIала бакъа чирилун дуллалисса давурттал проектру дузрайн дуккан дуллан хъинну захIматну бушиву.
— Жу, онкологиялул азарханардай зузисса хIакинтал, хIакьинусса кьини цуксса бухьурчангу халкьуннал чулухасса кумаграх мюхтажну ялугьлай буссару. Мукунсса къашайшалт­рал оьрмурду ххассал буллай, жущава шаймур буллай зий буссару, — увкунни Лейла Каримовал.
СахIналийн увккун, дакIнийх­тун­усса ихтилат буллай, Хизри Шихсаидовлул кIицI лавгунни Республикалул Кураевлул цIанийсса оьрчIал азарханалул онкологиялул отделениялун мудан кумаг буллай, чIарав бацIлай бикIантIишиву. Мукунма ва концертрай Хизри Шихсаидовлул, Республикалул БакIчи Рамазан АьбдуллатIиповлул хIукмулийн бувну, тапшур бунни ва отделениялул хъунмур хIакин Индира Юнусовайн, 13 миллион арцунсса, цитофлюориметр тIисса медициналул аппарат.
Концертрай балайрттал, хъамаллурал ихтилатирттал лях-карах ккаккан дуллайнма бия онкологиялул азардал къашавай­сса оьрчIаясса видео-роликру. Ми ххалдуллалисса цинявннал иттав макь дукIлай, аьсив хъанай бия.
Концертрал программалул лагрулуву ккаккан дунни «Единая Россия» региондалул отделениялул партиялул секретарь, Республикалул Халкьуннал Мажлисрал председатель Хизри Шихсаидов онкологиялул къашавайсса оьрчIал азарханалийн увкIсса видео-роликругу.
КIицI лагансса, оьрчIру ххари хьунсса иш хьунни шикку цамургу. «Единая Россия» партиялул член, «Нефтяная компания «Роснефть-Дагнефть» ОАО-лул хъунама директор Муслим Гиндиевлул оьрчIал онкологиялул отделениялун пишкаш бунни 17 телевизор.
Уттинин ихIсандалул проектрал лагрулуву дуллалисса давурттавух гьуртту хьусса рес­публикалул идарарттал ва администрациярттал кумаграйну укун захIматсса азардал къашавайсса оьрчIан кумагран датIин бювхъуну бур сайки 2-хъул миллион арцул.
Чирилун дуллалисса концерт­рай гьуртту хьунни дагъусттаннал эстрадалул балайчитал ва «Лезгинка», «Молодость Дагестана» ансамбльлу, республикалий ва Аьрасатнаву машгьурсса оьрчIал ансамбль «Камерата». Дагъусттаннал эстрадалул балайчитал бакъассагу, ва концерт­рай гьурттушинна дан бувкIун бия Чачаннал Республикалул лайкь хьусса балайчи Тамара Адамовагу.
Ва кьини «Единая Россия» партия кьюкьлувун кьамул бунни Кураевлул цIанийсса оьрчIал азарханалул отделениялул хъунмур хIакин Индира Юнусова, «Нефтяная компания «Роснефть-Дагнефть» ОАО-лул хъунама директор Муслим Гиндиев ва цаймигу.
Ва концерт дурсса Аьйшат Айсаеван дуллунни «Дагъусттаннал халкьуннал» артIистка тIисса бусравсса цIагу.
Концертрал ахирданий ва акциялул чIарав бавцIусса «Единая Россия» партиялул вакилтурахь, Хизри Шихсаидовлухь ва циняв гьуртту хьуминнахь барчаллагь увкунни Аьйшат Айсаевал.