Ноябрь барз байбихьлахьисса гьантрай Саратов шагьрулий хьуссия регионнал дянивсса Кьуран буккултрал конкурс. Микку так хъаннилли гьурттушиву дурссагу. Саратоврал, Ульяновскаллал областирдаясса, Татарнавасса, Мордовиянавасса ва цаймигу регионнаясса хъаннищал архIал Дагъусттаннаясса душругу гьуртту хьуну бур му конкурсраву. ХьхьичIунсса кIантту бувгьусса мукьвагу душ «Муслимат» тIисса хъаннил ккурандалул тарбия бувсса душру бур.

П. Рамазанова
Ларгсса бигьалагай кьинирдай «Муслимат» ккурандалуву хьунни мукьвагу душ – Сакинат Кьурбанаьлиева, Асият ХIажисулаева, ПатIимат МахIаммадова ва цамургу ПатIимат МахIаммадова, Кьуран буккултрал конкурсрай хьхьичIун личаву барча буллалисса шадлугъ. Душру барча бан бувкIун бия Да­гъусттаннал динийсса идарарттащал зузисса Комитетрал председатель С. МахIаммадов, мунал хъиривчу Р. ХIажиев, ДУМД-рал кIулшиву дулаврил отделданул хъунама Х. Хилми, СайидмухIаммад-хIажи Абубакаровлул цIанийсса фонд­рал хъунама Х. Абубакаров ва цаймигу бусравсса хъамал. С. Ма­хIаммадовлул цалва ихтилат­раву кIицI лавгунни чIавами ссурваврал сийлийсса конкурсрай хьхьичIунсса кIанттурду бугьавриву «Муслимат» ккурандалий каялувшиву дуллалисса Ххадижат Шихаьлиевал бияла хъунмасса бушиву, му ялун нанисса ник исламрал ххуллий цIакьну дарцIусса шавриву биялсса бутIа бихьлахьисса инсан бушиву.
Ххадижат Шихаьлиевал бувсуна, Аьрасатнаву сийлийсса конкурсрай цилва душваврал хьхьичIунсса кIантту бувгьуния тIисса хиял бартлавгшиву, чIявусса дагъусттан душру исламрал чаннайн кIункIу буллалисса цилла даврияту рязийну ва щукрулий бушиву.
«Дагъусттаннал хIапизтурал цIа машгьурссар дунияллий, утти чIава ссурвалгу Дагъусттаннал цIа гьаз дуллай най бур», — увкунни Х. Абубакаровлулгу.
КIицI лавгсса Комитетрал чулухасса бахшишругу дуллуна конкурсраву ххув хьусса душвавран.