Дусшиврул арарду цIакь дуллалисса байран

sop_14Ноябрь зурул 4-нний МахIачкъалалив Дусшиврул къатраву Халкьуннал Цашиврул байрандалул кьини най дия личIи-личIисса шадлугъру.

И. Саидова
Ва кьини шиккун бувкI­минна­ща ккаккан бюхълай бия, «Россия от края до края» тIисса цIанилусса, Санкт-Петербурглиясса, Москавлиясса, Къалмукьнавасса,
МахIачкъалалиясса ва цаймигу художниктурал суратирттал выставка.
Вара кьини шиву хьунни миллатирттал лаххияр­ттал, костюмирттал ва инструментирттал презентациягу. Му коллекциялул авторгу бия Рес­публикалул Миллатирттал костюмирдал лабораториялул хъунмур Минажат ХIасанова.
Мукунма ва кьини тIивтIуну бия Аьрасатнал Халкьуннал дусшиврул музей. Ва кьинисса байрандалул программа хъиннура авадансса хьуншиврул, бучIан бувну бия республикалул 15-хъул зунттал районнал оьрчIал фольклорданул ансамбльлу. Ми цирдагу дия уттинин республикалул сахIналийн къадурксса, сахIналий къавтIисса, балай тIисса оьрчIругу бия цаннаяр ца пагьму-гьунар бусса.
Вай цинявгу давурттив дия личIи-личIисса миллатирттал халкьуннал дянивсса дусшиву цIакь дуллалисса, этнокультура машгьур дуллалисса. Тасттикь хъанай бия Дусшиврул къатраву, концертру дуллалаву бакъассагу, мяйжаннугусса дусшиврул арарду цIакь дуллалишивугу.
«Россия от края до края» тIисса суратирттал выставкалул тарихрал аваданшиврия хъамаллурахь буслай ия Аьрасатнал Халкьуннал дусшиврул музейрал элмийсса зузала Максим Аскеров.
Минажат ХIасановал бувсунни Дусшиврул къатраву тIивтIуну бушиву Дагъусттаннал халкьуннал хьхьичIазаманнул яннардал элмийсса тарих ла­хьхьаву, машгьур баву мурад­райсса лаборатория.
— ЧIун наниссаксса, чIявуми инсантуран цалва миллатрал лаххиялул тарих хъамабитала хъанай най бур. Зунттал халкьуннал лаххи-ликкиялул тарихгу цанниха ца къалавхьхьусса авадансса бур. ХIатта чIаххуврайсса кIира шяраваллил лаххиярттавугума дуссар чIярусса дахханашивуртту. ХъунмурчIин миннулли бусласисса ду-дакъашиврул ахIвал-хIалдания, багьу-бизулия. Лабораториялул даврил лагрулуву на ахттар буллай бура хъатIал, сахIналул, фольклордал ансамбльлал яннардал костюмирдал тарих. ЦIуну дурухлахими яннардаву хIисавравун ласлай бура миллатирттал культуралул лаххиярдавасса лишанну, — тIий буслай бур Минажат ХIасанова.