Уттигъанну, ноябрьданул 2-нния 4-ннийн бияннин, Сочилий хьуссар халкьуннал творчествалул Щаллагу Аьрасатнал «Вместе мы – Россия» фестивальданул махъра-махъсса этап. Мунивух гьуртту хьунни Дагъусттаннаясса артисталгу – фольклорданул ансамбль «Леваши», Лаващиял райондалиясса кьяпрал усттартал МахIаммад Ссунгъуров ва Юсуп Самурлаев, УнцIукIуллал райондалиясса усттар МахIаммадаьли МахIаммадаьлиев. Ва аьрххи щаллу бувну бур ДР-лул Культуралул министерствалучIасса Республикалул Халкьуннал творчествалул къатлул ва «Левашинский район» муниципал сакиншиннарал.

Шиккува кIицI лаган, «Вмес­те мы – Россия» халкьуннал фольклорданул фестиваль дуллалиссар «Культура России (2012-2018 годы)» федерал целевой программалул лагрулуву. Му цIакь дурссар АьФ-лул ХIукуматрал ва АьФ-лул Культуралул министерствалул. Ва фестивальданул хьхьичI бивхьусса агьамми масъалар­ттугу хъанахъиссар халкьуннал культурарду авадан даву, миллатирттал дянивсса культуралул ва дусшиврул арарду цIакь даву. Аьрасатнал регионнай, миннувух Дагъусттаннайгу, 2013 шинал хьуссар республикалул, крайрал ва областьрал фестиваллу. Му конкурсрал лаг­рулувусса махъра-махъсса концертру хьуссар Ставрополлай, му фестивальданул регионнал дянивмур этапрай. Муна миккур «Леваши» ансамбль жюрилул члентурал язими коллективирдавасса цану кIицI ларгсса ва фестивальданул гала-концертрайн Сочилийн оьвкусса.
Сочилий хьусса «Вместе мы – Россия» фестивальданул махъра-махъсса этаправух гьуртту хьун бувкIун бур Аьрасатнал 85 региондалиясса творчествалул коллективру. Гьантри хьуну бур фестиваль дайдирхьуну, кIинтнил спортрал «Айсберг» дворецрал сахIналийн личIи-личIийсса фольклорданул коллективру, къавтIаврил ансамбльлу дуклай. Ноябрьданул 3-нний хьуссар ва фестивальданул махъра-махъсса этап.
Фестивальданущал бавтIми барча буллай, махъ лавхъун бур АьФ-лул культуралул министр Владимир Мединскийл, АьФ-лул Президентнал Администрациялул каялувчинал хъиривчу МахIаммадссалам МахIаммадаьлиевлул, Аьрасатнал ПаччахIлугърал Халкьуннал творчествалул къатлул директор, фестивальданул председатель Тамара Пуртовал.
Фестивальданул лагрулуву хьуну дур канил аслийсса пишардал усттартурал давур­ттал выставка-ярмарка, мастер-классру, пишакартурансса дискуссиялул ва презентациялул площадкарду, «Деятельность по сохранению культурного многообразия народов России – основа единства и благополучия гражданского общества» цIанилусса «ккуркки стол», цийгу гьаз бувсса халкьуннал творчество хьхьичIуннай даврил масъалартту. Вай батIавурттай, мукунма, хьуну бур регионнал дянивсса культуралул арарду цIакь даврийн тIайла бувсса пикрирду кIибачIлачIисса, халкьуннал творчествалул аралуву щаллу дансса цачIусса проектирдал хIакъиравусса ихтилатру.
Фестивальданул кульминацияну хьусса хъуннасса гала-концертрай, цурдагу Халкьуннал цашиврул кьини хьусса, гьуртту хьуну бур республикарттал бакIчитал, Аьрасатнал регионнал бакIчитал.
Ва гала-концертрай «Леваши» ансамбльданул ккаккан дурну дур Дагъусттаннал халкьуннал костюмру, къавтIаврил ва музыкалул культура. Тамашачитуран яла-яла асар хьуну бур лаващиял хъатIул аьдат ккаккан дуллалисса композиция.
Фестивальданувух гьуртту хьусса цинявннан буллуну бур дипломру.