Республикалул БакIчинал личIи бунни цаппара за­дачар­тту, ми задачартту щаллу барча, бюхъантIиссар республикалийн инвестициярду дучIан даврия мюнпат ххишала бан.
Ганал мукъурттийн бувну, аьркинну бур: цалчин, миннуха зузиминнал хьхьичI бишин щаллу бан бюхъайсса задачар­тту, республикалул каширдах, бюхъурдах бурувгун; кIилчин, республикалул исполнительный властьрал органнан аьркинссар документру багьайсса куццуй щаллу бувну, тIайлагу буккан. Му бакъассагу, хъуннасса къулагъас дикIан аьркинссар инвесторнал мурадрах.
Р. АьбдуллатIиповлул увку­сса куццуй, инвестициярду дучIан даврил тагьар ххуй даву (создание инвестиционного климата) – му хъунмасса, цачIу щаллу бай­сса масъалар. Мивун буххайссар укунсса масъалартту: инвестор аэропортрай хьунаакьаву, цилла аэропортрал тагьар, ххуллурдал тагьар, хIаллихшинну щаллу дуллалаву, гостиницардал хIалкьазия ва цаймигу масъалартту.
Республикалий инвестициярдал площадка дузал даврин хасну дуллалисса давурттая бувсунни ДР-лул промышленностьрал, машлул ва инвестициярдал министр Юсуп Умавовлул. Ганал бувсмунийн бувну, инвестициярдал хIалкьазия ххуй даншиврул, ДР-лул Минпромторграл дузал дуллай бур инвестициярду дучIан даврил тагьар ххуй дансса шартIру, му дур паччахIлугърал политика. Министрнал бувсунни пюрун буккан байсса завод баврил хIакъираву. ЦIанасса ппурттуву завод зий бур, пюрунтру тIайла буклай бур Азирбижаннавун, Гуржиянавун ва Турциянавун. Щаллу бувну бур 300-яр ххишаласса зузи кIанттурду. Бюджетравун дуллуну дур 81 млн. къурушру налогирттал. Ва предприятие щаллу-ккурккину зун бивкIукун, налогру дулавантIиссар 800 млн. къуруширттаяр ххишаласса.
Министрнал бувсунни мукунма «Нергиз» ЗАО-рал сипталийну буллалисса янна щащай фабрикалиятугу. Ва фабрика зий байбишайхту республикалул 42 100 инсаннансса зузи кIану бикIантIиссар ва 450 млн. къурушру налогиярттал дулавантIиссар бюджетравун. Министрнал бувсунни Къарабудахккантуллал райондалий «Уйташ» тIисса инвестициярдал программа дузрайн дуккан дуллалаврил хIакъиравугу.
Юсуп Умавовлул гьартану бувсунни «Агрико Северный Кавказ» ООО-рал проектрал ва сметардал документругу бувну, экспертизалул хъинчулийсса заключениягу чирчуну душиву. Ихтияр дуллуну дур га предприятие буллан. ХIадур дурну дур мукунна «Завод строительных материалов» ООО проект дузрайн дуккан дуллансса площадка. ЦIана муниха зий бур.
Заседаниялий ихтилатру бунни республикалул муниципал сакиншиннардайгу инвестициярдал тагьар ххуй дуллансса щартIру дузал даврил хIакъираву. Ю. Умавовлул докладраву бувсунни ци дуллан аьркинссарив муниципалитетирттай ххуйсса шартIру щаллу даншиврул.
Яла Республикалул БакIчинал вичIидирхьунни цаппара шагьрурдал ва районнал бакIчитурал цукунсса давуртту дуллай бу­ссарив инвестициярдал площадкартту хIадур даврин хасну.
Рамазан АьбдуллатIиповлул Республикалул ХIукуматрайн тапшур бунни ми давурттаву муниципалитетирттан кумаг буллан.