Октябрьданул 8-нний Москавлив ВВЦ-лул лагрулуву тIир­тIунни 16-мур Аьрасатнал агропромышленностьрал выставка «Мусил ссут – 2014». Выставкалий гьуртту хьунни Аьрасатнал сайки циняв регионну, мукунма дазул кьатIатугу бувкIунни.

Дагъусттаннал делегациялул бакIчину ия вице-премьер Шарип Шарипов. Республикалул экспозиция дурну дия 98 квадрат метралул кIану бувгьуну. Тикку дия ккаккан дурну хьхьичIунну зузисса предприятиярттал ду­ккан дуллалимур.
Выставкалий дия «Дербентский коньячный комбинат» ОАО-рал, «Дербентский завод игристых вин» ОАО-рал, «Кизлярский коньячный завод» ГУП-рал, «Денеб» ОАО-рал, «Дагагрохолдинг» ООО-рал, «Кизлярдагагрокомплекс» ОАО-рал, «Урицкий мясокомбинат» ООО-рал, «Широкольский рыбокомбинат» ОАО-рал, ца­ппара фермертурал хозяйствар­ттал бакIлахъия.
Выставкалий ккаккан дурну дия мукунна цIусса шяраваллил хозяйствалул техника ва кьай-кьуй.
Агропромышленностьрал выставкалийн увкIунни Аьрасатнал ХIукуматрал Председатель Дмитрий Медведев. Ганал выставкалий гьуртту хьуминнахь барча увкунни Аьрасатнал Шяраваллил хозяйствалул кьини. Премьер-министрнал увкунни: «Мусил ссут дуллай буру утти 16-чин. Шикку жура дувару шяраваллил хозяйствалул шинал хIасиллу, ххалбигьару ва бутIул ялун нанисса шинал дан-дитанмунил масъалартту, бусару хьусса захIматшивурттая, хьхьичIуннайшивурттая ва, гьай-гьай, дулару зузалтран наг­радарттугу. Шяраваллил хозяйство – жулла экономикалул ца яла агьаммур бутIар, мунихлуну зул хьхьичIуннайшивуртту жун ляличIину бусравссар. Амма миннун кьимат бищайссар паччахIлугърал бакъасса, ттучаннавун буххайсса инсантуралгу. ЦIана зуща бюхълай бур зулла бакIлахъия гьарзану дахлан жулва халкьуннан, чил билаятиртталсса чан хьусса чIумал».
Яла Дмитрий Медведевлул паччахIлугърал наградартту дуллунни агропромышленностьрал комплексрал зузалт­ран.
«Мусил ссут» выставка дикIантIиссар октябрьданул 12-нин.