Избербаш шагьрулий спортрал давурттал сакиншинначину ур оьрчIал ва чIава жагьилтурал тIуркIурдал журалул спортрал школалул директор, Гъумучатусса Шахша Шахшаев. Га школалул директор хьуну махъ чIявусса бяст-ччаллу байссар жагьилтуралгу, бугьараминналгу дянив, хIатта чIаххувсса Къаяккантуллал райондалул жагьилталгу кIункIу бувну. Цуппа школагу ванал хIарачатрайнур тIивтIусса.
Шахша АьбдурахIманович бакIрайва чIярусса шиннардий зий ивкIссар 3-мур школалий физкультуралул учительну. Тикку физкультуралул ва спортрал даву ганал канилух дурккун дур, оьрчIащал ва миннал нитти-буттахъащалгу даву дачин дурну дур. Ганал, сакингу бувну, хъинну бачингу бувну бур волейболданул, боскетболданул, настольный теннисрал, кикбоксинграл секциярду ва цIуллушиву цIакь дайсса группа.
Ш. Шахшаев спортрахун агьну ивкIссар 2-мур школалий дуклакисса чIумала, ганал физкультуралул цалчинми учительтал бивкIссар В. Маркин ва Н. Захарченко. Гьамин миннал маслихIатрайн бувну га дуклан увххун ур Дагъусттаннал пединститутрал (цIана Педуниверситет) физкультуралул факультетрайн. Институтрая махъ га армиялийнгу лавгун, яла зун айивхьуну ур 3-мур школалий. Шикку физкультуралул ва спортрал даву яла ххуймунин ккаллину дур щалва шагьрулул школардавату. Ганал тарбия бувну бур 30-яр ххишаласса спортрал зузалт. Ганал тарбия бувминнавасса ца хъанай ур кикбоксинграл Республикалул Федерациялул каялувчи МахIаммад МахIаммадов. Ш. Шахшаевлул га увцуну ур цачIана спортшколалийн кикбоксинграл тренерну. ХьхьичIва га зий ивкIун ур педколледжраву. МахIаммадлул даву шиккугу хьхьичIунну дачин дурну дур, ганал тарбия бувсса оьрчIал ларсун дур Европанал ва дунияллул чемпионнал цIарду, ацIахъул хьуну бур Дагъусттаннал ва Аьрасатнал бяст-ччаллал призертал.
Бувсса захIматрахлу М. МахIаммадовлун дуллуну дур АьФ-лул лайкь хьусса тренернал цIа.
Шагьрулул школардай зузисса чIявусса физкультуралул учительтал Ш. Шахшаевлул тарбия бувминнаясса бур. Миннавасса цаппара ганал цачIанма бувцуну бур цал архIал цачIавагу зун тренерталну. Миннан ххишаласса даву хьуншиврул цачIава тIивтIуну бур ДЮСШ-лул филиаллу, бур баскетболданул, волейболданул, куклумур атлетикалул, теннисрал секциярду 11-мур, 8-мур ва 1-мур школардай. Миннуву хъанай дур хьхьичIуннайшивурттугу. Масалдаран, куклумур атлетикалул секциялийн заназисса А. Тарланов, А. МахIаммадов ва кIия миннал дустал кьамул бувну бур республикалул цачIундур командалувун. Ш. ШахшаевлучIа бур ганал тарбия бувминнал баскетболданул «Локомотив школьная лига» бяст-ччаллаву хьхьичIунсса кIанттурдахлу буллусса кубокру.
Настольный теннисрал секциялул каялувчину зий ур Л. Харахаш. Гьашину ганачIа вардиш хъанахъиминнал ДР-лул первенствардай хьхьичIунсса кIанттурду бувгьунни.
ХьхьичIва ДЮСШ-луву дия ххуйсса футболданул команда, тиву дия чIава жагьилтурал ва балугъравун бивминнал командартту. Утти командартту ппив хьуну дур, тренертал бакъашиву сававну. Харж чансса буну тIий, тренернал даврийн бучIан ччай бакъар ххуйну даву кIулсса пишакартал. Мура сававрай Ставрополлал крайрайн лавгунни баскетболданул тренер С. Горшков. Мунияту ДЮСШ-лий тренерталну зий бур хъунмурчIин даву ххирасса инсантал. Гьамин миннаща цачIу шагьрулул каялувчитурал, спортрал, дуккаврил, ва жагьилтурал отделлал кумаграйну Шахша АьбдурахIмановичлул дурссар чIяруми спортрал давуртту.
Цаппара шиннардил хьхьичI, агьалинаву спорт машгьур дуллалаврихлу, ДЮСШ лахъан бувну бивкIссар «Лучшие люди России» энциклопедиялийн. Вана гьашинугу, инсантал спортрахун бичаву мурадрай, спонсортурал кумаграйну, стадиондалий бувну бур турникирттая, брусьярдая ва цаймигу спортрал снарядирттая щаллусса физкультуралул комплекс. Ми давурттахлу Ш. Шахшаев бусравну ур ДР-лул Спортрал, КIулшиву дулаврил министерстварттай ва цаймигу ведомстварттай.
Ганал сакиншинначинал пагьму-гьунаргу, дуллалисса давурттал жаваблувшивугу кIулну, ганайн тапшур дай мудан спортрал турнирду ва цаймигу давуртту дуван шагьрулий, га цувагу хъуна-хъунама судияну ивтун. Ш. Шахшаевлул ва ганал тарбия бувминнал хIарачатрайну, Избербаш ккаллину бур республикалул спортрал шагьрулун.
Аь. МахIаммадов
ХIадур бувссар ХI. Аьдиловлул
