Сентябрьданул 19-нния 21-нин Каспийскалий Аьли-Аьлиевлул цIанийсса Спортрал къатраву хьунни Расул ХIамзатовлул цIа абад даврин хас дурсса волейболданул Аьрасатнал турнир. Му къуртал шайсса кьини тиккун бувкIунни ДР-лул БакIчи Рамазан АьбдуллатIипов, ДР-лул Халкьуннал Мажлисрал Председатель Хизри Шихсаидов, ДР-лул ХIукуматрал Председатель Аьбдуссамад ХIамидов ва цаймигу.
ХIасан Аьдилов
Гьашину турнирданий гьуртту хьунни 6 команда: Тверь шагьрулиясса «Тверь», Владиккавкказуллал «Иристон», Къазан шагьрулул «Академия» — Казань», МахIачкъалаллал «Дагестан», Майкопуллал «Динамо-МГТУ» ва Ростовуллал «Ростов-волейбол».
Финалданий ччалли дурккунни «Дагестан» ва «Тверь» командартту. Бяст-ччалливу 3:1 счетрайну ххув хьунни хъамаллурал команда.
Ххув хьуми командарттан наградартту ва заварду дуллунни республикалул каялувчитурал. Мукунна Рамазан АьбдуллатIиповлуятусса каний дахIайсса ссятру дуллунни турнирданул бусравсса хъамаллуран: шанна Олимпиадалул гьурттучи, олимпий чемпион, СССР-данул лайкь хьусса спортрал мастер Вячеслав Зайцевлун, Олимпий тIуркIурдал чемпион, дунияллул чемпион ва 5-ла Европанал чемпион Владимир Кондран ва ссапарчи, спортсмен, художник ва сурат рищу, ООН-далул доброй волилул илчи Вячеслав Егоровлун.
Наградартту дуллуну махъ Р. АьбдуллатIиповлул бувсунни рязину ушиву турнир даврил даражалия, мукунма Дагъусттаннал командалувусса диялдакъашивурттая. «Ва турнир лайкьсса даражалий хьунни, цурдагу Щалла Аьрасатнал турнир кунна. Амма гьурттучитуран къабучIиссар мунийну гьашиву дуван, аьркинссар хьхьичIуннайшивурттайн кIункIу тIун. Дагъусттаннал командалул ур ххуйсса тренер Игорь Гордеев. Мунал лагма лаган аьркинссар», — увкунни Р. АьбдуллатIиповлул.
