Лондоннай, Россотрудничествалул вакилханалуву хьунни Дагъусттаннал композиторнан, СССР-данул халкьуннал артист Мурад Къажлаевлун хас бувсса творчествалул мажлис. Хъамаллурахь Мурад Къажлаевлул творчествалия бувсуна мунал арснал, Аьрасатнал ПрезидентначIасса Дагъусттаннал постпреднал хъиривчу ХIажимурад Къажлаевлул.
П. Рамазанова
Маэстрол произведениярттая мажлисрайн бавтIцири неъмат ласун бунни япониянал пианистка Чисато Кусунокил. «Романтическая сонатина», «Шесть прелюдий», «Пьесы-картинки» тIисса произведенияртту бакъагу, тамашачитуран бавунни Дагъусттаннал халкьуннал балайрдал мотиврдайн бувну композиторнал чивчусса «Дагъусттаннал альбом» тIисса пьесардал циклгу.
Чисато Кусунокил бувсунни цинма цалчин Мурад Къажлаевлул произведенияртту Лондоннай баяйхту, миннул цийнма гужсса асар биян бувшиву, цуппа композиторнащал 2013 шинал Москавлив хьунабавкьушиву, мунал макьанну руцлан личIиссава гъира бикIайшиву. Концертрай бия Великобританиянавусса Аьрасатнал агьулданул Координационный советрал вакилталгу, му советрал председатель Айна Мамаевая тIайла хьуну. Мурад Къажлаев цалла творчествалуву цал архIал Ккавкказуллал халкьуннал балайрдахсса, джазрахсса ва совет заманнай машгьурсса музыкалухсса ччаву аьч дурсса композитор ушиврия, му Аьрасатнаву так композитор хIисаврай акъагу, цIанихсса дирижер ва РАЕН-далул академик хIисаврайгу машгьурну ушиврия, мунал творчествалун Хачатуряннул, Шостаковичлул, Ротал ва Эллингтоннул лавайсса кьимат бивщушиврия бия ихтилатру.
«КьатIаллил билаятирттай «дагъусттаннал колоритращалсса музыкалухсса ччаву чIалай ттун мудангу тIааьнну бикIай, — увкунни ХIажимурад Къажлаевлул япониянал пианисткал гьунарданун бюхттулсса кьимат бишлай. — Ххишалану ххари шара ттула буттал произведениярттугу бикIайшиврия кьатIаллил билаятирттайсса концертирттай. Лондоннайгу буттал творчество ххирасса инсантал чIявусса лявкъуну ххари хьура. На хIакьину Лондоннал творчествалул интеллигенциянащал, Великобританиянавусса дагъусттаннал диаспоралул вакилтуращал хьунаавкьура. Ххаришиву, гъилишиву, чаннасса асарду ливчIунни дакIниву».
