Фестиваль дан сиптачи хьуссар Аьрасатнал магьирлугърал лайкь хьусса деятель Скандарбек Тулпаров. Фестиваль цалчин дурссар 2007 шинал. Муния шихуннай гьар кIира шинай цал шайссар Дагъусттаннал магьирлугърал оьрмулуву ца яргсса ишну хьусса театрдал форум.
Сентябрь зурул 27-нния октябрь зурул 5-ннийн МахIачкъалалив хьунтIиссар Ухссавнил Ккавкказнал республикарттал, ЛухIи хьхьирил ва Каспий хьхьирил регионнал билаятирттал оьрус театрдал IV-мур дунияллул халкьуннал фестиваль.
Зулайхат Тахакьаева
Уттинин мунил программалуву гьуртту хьуну бур 17 оьрус театр, миннавух бур: Къазахънал, Гуржиял, Германнал, Болгарнал, Израилнал билаятирттаясса; Ингушнал, Къалмукьнал, Ухссавнил АьсатIиннал республикарттаясса; Томбовский ва Костромкой областирдаясса.
Фестивальданул сакиншинначитал рязину бур щалва Аьрасатнавасса ва кьатIаллил билаятирттаясса цIанихсса театрдал коллективрду Дагъусттаннайн гъирарай бугу-букIлай, цала язи-язими спектакльлугу ккаккан буллай бушиврия.
Вайннал пикрилийн бувну, бусравсса хъамал – личIи-личIисса республикарттал каялувчитал ва миннал театрал магьирлугърал усттартал жучIанма бучIаврийну Дагъусттаннал магьирлугърал оьрму авадан шаврицIун бюхълай бусса бур жулламур республикагу ххуйчулий ккаккан дан. Оьруснал театрдал хасъсса кIану бугьлай бур гьарцагу региондалул магьирлугъраву ва инсантурал рувхIанийшиву авадан давриву, Аьрасатнал халкь гъан буллай бур дунияллул магьирлугъращал. Фестиваль даврийну ялагу бюхълай бусса бур халкьуннал дянив магьирлугърал арарду саргъун дан. Тамашачитураща бюхъан тIий бур ккаккан ххаллилсса спектакллу, артистураща бюхъан тIий бур куннал пишакаршиврул опыт куннан лахьхьин баврицIун, куннащал куннал дусшивугу цIакь дан. СахIналул магьирлугърал, хьхьичIва кунма хIакьинугу, кабакьу буллалиссар чIяву миллатру бусса Аьрасатнал аьдатру ядан, халкьуннал мяърипат марцI дан ва миннал рувхIанийшиву авадан дан.
Гьашину фестивальданийн бучIан тIий бур Гуржиянавасса, Къазахънавасса, Германнавасса, Болгарнавасса, Ухссавнил АьсатIиннавасса, Кабардин-Балкьарнавасса, Чаргаснавасса, Чачаннавасса ва Ингушнавасса хъамал. Гьуртту хьун тIий бур Москавлиясса ва Санкт-Петербурграясса театрдугу. Фестивальданул хъамаллураща ккаккан хьун тIий бур Дагъусттаннал шанма театрданул (Оьруснал, Лакрал ва Ссихьрал) спектакллу.
Фестивальданул жюрилуву бикIан тIий бур ЮНЕСКО-лул Дунияллул халкьуннал театрал институтрал генеральный секретарь, театрал критик, Германнаву шайсса «Театрион» тIисса дунияллул халкьуннал дянивсса театрал фестивальданул каялувчи Нина Мазур; Аьрасатнал магьирлугърал лайкь хьусса деятельтал, театрал критиктал: Константин Щербаков; Николай Жегин, Александр Иняхин; Ухссавнил АьсатIиннал магьирлугърал лайкь хьусса деятель, актер ва режиссер Валерий Цариев; Аьрасатнал магьирлугърал лайкь хьусса деятель Гулизар Султанова.
Му бакъассагу, Яруссаннал театрдануву хьун тIий бур Аьрасатнал кинорал актертурал гильдиялул член Владимир Терещенкол ва Аьрасатнал лайкь хьусса артист Михаил Морозовлул мастер-классру — «Художественное слово», «Сценическое мастерство» ва «Актерское мастерство».
