Аьрасатнал Федерациялул 7 субъект бухлахисса Ухссавнил Ккав­кказуллал Федерал округ (СКФО) оператив тагьар захIматсса субъектран ккаллину бур. Вай республикардай паракьатшиву ва агьалинал мюхчаншиву дуручлай къаралданий бавцIусса виваллил иширттал органнал зузалтрангу ххишаласса захIматшивуртту ва нигьачIаву дур. Къачагътурал, чапхунчитурал канища литIлай бур чIявусса полициялул зузалт.

Андриана Аьбдуллаева
2013 шинал так 8 зурул дянив Ухссавнил Ккавкказуллал регионнай личIи-личIисса операциярттаву гьуртту хьуну оьрмулуцIа хьуну ур 51 виваллил органнал зузала. Мукун, Ухссавнил Ккавкказуллал федерал округрай къуллугърал бурж биттур буллай жанну дуллусса зузалтрал аьпалунсса троеборьелул бяст-ччал лавгунни ларгсса нюжмардий Дагъусттаннай. Ухссавнил Ккавкказуллал виваллил иширттал органнал зузалтрал дянивсса ва бяст-ччал аьдатравун багьну бур. Соревнованияртту дуллай байбивхьуну бур 2011 шинал. Гьашинусса, ххюлчинсса, троеборье ларгунни жулла республикалий.
Шикку гьуртту хъанай дия Да­гъусттаннал, Ставрополлал крайрал, Кабардин-Балкарнал, Къарачай-Чаргаснал, Чачаннал, Ингушетиянал, Ухссавнил АьсатIиннал, Аланиянал командартту, цинявппагу 35 спортсмен. Цалчинсса кьини хьунни лечаврил ва битаврил бяст-ччал. Му лавгунни Каспийскалия арх бакъасса полигондалий.
— Аьдатравун дагьсса ва турнир гьашину жулла республикалий дан пикри хьунни. Гьай-гьай, вай профессионал спортсментал бакъар, вай бур хIакьинусса кьини виваллил органнаву зузисса опертал, участковыйтал, дознавательтал, следовательтал. Ва соревнованиярттай гьуртту хьун бувцуссар цала-цала подразделениярттаву хьхьичIун бувкми. Шанмагу журалул бяст-ччалливу гьуртту хьунтIиссар цава цавай спортсментал. ХIакьину хьунтIиссар лечаврил ва биатлондалул бяст-ччал, гьунттий – каруннай бияврил. Турнир дуллалиссар полициялул зузалтрал профе­ссионал хIадуршиннарал, цIуллу-сагъшиврул, спортраву итххяххаврил даража гьаз баву мурадрай.
Командартту дагьайкун хIадурну дуссар. Ххув хьунтIиссар яла итххявхми, яла сивсуми, — увкунни журналистуращалсса ихтилат­раву соревнованиярттал хъунама судья, ДР-лул виваллил иширттал министрнал хъиривчу МахIаммад ГъазимахIаммадовлул.
Хъирив кьини Каспийскалий, Аь. Аьлиевлул цIанийсса Спортрал дворецраву, хьунни карунний бияврил бяст-ччал. Шикку гьуртту хьун бувкIун бия ДР-лул виваллил иширттал министр Аьвдурашид МахIаммадов, ДР-лул спортрал министр МахIаммад МахIаммадов, ДР-лул спортрал министрнал хъиривчу Зайнал Салауттинов, Олимпий чемпион, ДР-лул спортрал министрнал хъиривчу Гайдарбек Гайдарбеков, Аьрасатнал Виричу Загьид Загьидов, къуллугърал буржру биттур буллай жан дуллусса полициялул зузалтрал гъан-маччами. Спортрал шадлугъ тIитIлай, ихтилат бунни ДР-лул виваллил иширттал министр Аьвдурашид МахIаммадовлул. Ванал барча бунни Ухссавнил Ккав­кказуллал Федерал округрал полицайтурал дянивсса бяст-ччалливу гьуртту хьун бувкIсса цинявппагу спортсментал, барчаллагь увкунни вай соревнованияртту дан цинярда шартIру дузал дурсса ДР-лул спортрал министрнахь ва мунал зузалтрахь.
Министрнал ихтилат къуртал хьуну махъ шадлугърал даражалий гьаз бунни АьФ-лул ва Дагъусттаннал ттугъру.
Хъирив байбивхьунни карунний бияврил бяст-ччал.
КIирагу кьини хьусса троеборьелул бяст-ччаллил хIасиллайн бувну, ва турнир дуллан бивкIния мукьах гьашину цалчин ххув хьунни Дагъусттаннал полицайтурал команда. КIилчинсса кIану бувгьунни Ухссавнил Осетия-Аланиянал командалул, шамилчинсса – Ингушетиянал командалул. Ххув хьусса спортсментуран ва призертуран буллунни кубокру, грамотартту ва медаллу.