ЛачIун буккаврил дунияллул чемпионатрай Аьрасатнал команда ххув хьунни

gor_17КIира кьинисса бяст-чча­лливу аьрасатлувтурал дурххунни 5 мусил ва 1 чарвитул медаль.

Дагъусттанлув Аьбдуссалам ХIадисовлул ларсунни Ташккантуллал дунияллул чемпионатрал мусил медаль.97 килорал кIушиврий финалданий Аь. ХIадисовлул ух увну ур азирбижанчу Хетага Гозюмов.


Чарвитул медаллу ларсун дур туркнал лачIунукку Шамил Эрдоганнул ва украинчу Валерий Андрейцевлул. Мусил медаль ларсун дур цамагу Аьрасатнал лачIунукку Денис Царгушлул 74 килорал кIушиврий, га ххув хьуну ур Японнал лачIунукку Сосуке Такатанияр. Ва медаль Царгушлул утти шамилчинмурди дунияллул чемпионатирттай ларсъсса. Чарвитул медаллу 74 килорай ларсун дур американчу Джордану Барроузул ва Кубанавасса Ливан Лонеслул.
«На хIакьину ххарину ура Джордану Барроузаяр ххув хьуну тIий, цанчирча на танаяр ччянива ух хьуссара дунияллул чемпионатрай Турциянаву ва Лондоннайсса Олимпиадалий. Ва ххувшаву на хас дуллай ура ттула дуснан Бесик Кудуховлун», — увкунни Царушлул.
65 килорал кIушиврий мусил медаль дурххунни аьрасатлув Сослан Романовлул. Финалданул бяст-ччалливу ва ххув хьунни Ираннал лачIунукку Сайед Мохаммадияр. Чарвитул медаллу ларсунни Михаил Савел (Молдавия) ва Мандахаран Ганзоричлул (Монголия).
Аьрасатнал командалул лавсунни 62 очко ва 1-мур кIану, кIилчинмур кIану бувгьунни Ираннал (45 очко), шамилчинмур – Турциянал командалул (41).
«Аьрасатнал командалул ххаллилсса хIасиллу хьун дунни. Цурда яла хьхьичIунмур душиврий цукунчIавсса щак личIан къабунни. ЛяличIинува мунил агьамшиву дия олимпиадалий жура дурагу ца мусил медаль дурххукун. Жува уттигу ккаккан барду жулва лачIунбуккаврил школа», — увкунни Аьрасатнал лачIунбуккаврил командалул хъунама тренер Сажид Сажидовлул.