Уттигъанну цIуну тIивтIусса ТIюхчардал школалий (сош №2) ларгунни террорданущал талатаврил цашиврул кьинилун хас дурсса мероприятие. ЦIусса дуккаврил шинал дайдихьулий ва школа тIивтIуну махъ ва хьунни шикку цалчин дуллалисса мероприятие.
Ва кьини учительтуращал ва дуклаки оьрчIащал хьунаакьин школалийн оьвкуну бия чIярусса шинну органнаву зий гьан дурсса, жаваблувсса къуллугъру бувгьуну ивкIсса, 1999 шиналсса дяъвилул иширттаву ккаккан дурсса къучагъшиврухлу Аьрасатнал Виричунал цIа ларсъсса Загьид Загьидовлуйн. Мажлис байбивхьунни «Агь, ттул буттал кIануй» лакрал гимнрайну. Хъирив кутIасса ихтилат бунни школалул директор ШайхахIмад Дадаевлул. — Гьашинусса шин дакIний личIансса юбилейрдал авадансса шин дур. Гьашину 70 шин хъанай дур жулла район сакин хьуну, микссара ТIюхчардал дянивмур даражалул школалул гьану бивзунгу. Му бакъассагу, жура кIицI лаглай буру жулла аьрщарайн ярагъуннищалсса чапхунчитал ххявххун 15 шин хъанахъисса кьини. ХIакьину жува бавтIун буру 1999 шинал ЦIуссалакрал аьрщарайн ярагъуннил балгусса боевиктал ххявхсса чIумал, миннайн данди бавцIуну жанну дуллусса милицанал зузалт, ополчентал, федерал аьралуннал аьралитал дакIнийн бичин. Вайннал жанну дуллуссар Да­гъусттанналгу, Аьрасатналгу цашиврул, агьалинал тархъаншиврул цIаний. Вай къучагътал жунма абадлий дакIний бикIантIиссар, — увкунни школалул директорнал. Ванал ихтилат къуртал хьуну махъ дуклаки оьрчIал бюхттулну дурккунни боевиктурайн данди бавцIуну, къучагъну жанну дуллусса ЦIуссалакрал РОВД-лул зузалтрал цIарду. Яла бувккунни Ватандалухасса шеърирду, увкунни балайрду. Хъирив бусравсса хъамаличунахьхьун махъ буллай, ШайхахIмад Рамазановичлул бувсунни Загьид Загьидов дяъвилул иширттаву савсъсса, цимирагу аьрали награда лайкь дурсса Виричу ушиву. Бувсунни ванал оьрмулия. Загьид Загьидов увну ур 1961 шинал май зурул 25-нний Гъуниннал райондалийсса Кегер тIисса шяраву. Оьрмулул 5 шин хьусса чIумал, вайннал кулпат бивзун бур Сулакьрайн. Школа къуртал бувну махъ цаппара шиннардий зийгу ивкIун, Загьид лавгун ур аьралуннаву къуллугъ бан. Къуллугъ буллай ивкIун ур Авгъаннаву, му чIумал дуллусса «За боевые заслуги» медальгу дур. Армиялия увкIун махъ Загьид къуллугъ буллан ивкIун ур органнаву. 1983-1985 шиннардий дуклай ивкIун ур Астраханнайсса милицанал школалий. 1992-1999 шиннардий къуллугъ буллай ивкIун ур ОМОН-ву, роталул командирнал заместительная ОМОН-лул командирнал къуллугърайн ияннин. Загьид цувагу республикалий ОМОН сакин буллай ивкIминнавасса ца ур. 1992 шинал Загьидлул къуртал бувну бур Ростоврайсса лавайсса юридическая школа. 1992 шинал ЦIумадав экстремистал ххявхсса чIумал, къачагътурайн данди бавцIуссар Загьид бакIчисса ОМОН-лул зузалт. Вайннал пIякь учин бувссар боевиктал бусса машина ва 50-нния ливчусса миннал бивщусса къушру бирибат бувссар. Ми иширттаву гьуртту хьуннина ванал ларсун диркIссар «За боевые заслуги» медаль ва «За личное мужество» орден. Мунияр махъ Загьид тIайла увкссар Къадарлив. Шикку гьарзат боевиктурал канихь диркIссар. Амма Загьидовлуща цала аьралитуращал архIал бювхъуссар милицанал зузалтрал рота боевиктурал шалклува дуккан дан. Цалва оьрмулун нигьачIаву дуна, ккуллардал тIюпандалувух буккан бувссар щавурду дирсса 19 саллатI, дуккан дурссар оьрмулуцIа хьусса 4 саллатIнал жаназа. Къадарлив ванал цалалу бат бувссар 12 снайпертурал точка, 5 минометрал точка ва душманнал 3 къуш. Цайва командованиялул бивхьусса бурж бартбигьлай ккаккан дурсса чувшиврухлу, 200-нния ливчусса ОМОН-лул зузалт личIи-личIисса хIукуматрал наградар­ттан лайкь хьуссар. Командир Загьид Загьидовлун Аьрасатнал Виричунал цIа дуллуссар. Да­гъусттаннал милицанал тарихраву ва хьуссар Виричунал цIа ларсъсса ОМОН-лул цалчинсса зузала. 2000-2002 шиннардий Загьидовлул каялувшиннаралусса ОМОН-лул зузалт цаймигу республикалул МВД-лул службардащал гьуртту хьуссар 280-нния ливчусса операциярттаву. Нигь-ццах къакIулсса, къучагъсса милицанал полковник Загьидов лайкь хьуссар «Общественное признание» тIисса ордендалун ва наградной ярагъуннин. Вана укунсса виричу ур хIакьину жучIава хъамалу, — увкунни школалул директорнал ихтилат къуртал буллай. Хъирив ихтилат бунни цува Загьидовлул: — Ххирасса оьрчIрув! ХIакьину зу щябивкIун буру вай цIуну дур­сса авурсса къатраву. Зун дузал дурну дур ва школалий цинярда шартIру. Зул бурж ххуйну дуклакавур. КIулшивуртту инсаннан бусса оьрмулий дучIи лякъайссар. ХIакьину жува бавтIун буру 15 шинал хьхьичI жулла аьрщарайн боевиктал ххявхсса чIумал, буттал кIану буручлай жанну дуллусса жулва вирттал дакIнийн бичин. ЛивтIусса, бивщусса бакъасса дяъви къабикIайссар. Вирттаврал жанну дуллуссар зул паракьатшиврул, зул бучIантIимунил цIаний. Ттун ччива зуя ми вирттавран лайкьсса наслу хьуну. Зуяту райондалулгу, республикалулгу цIа бюхттул дансса инсантал хьуну. Ихтилат бунни мукунма чIярусса шиннардий оьрчIру тарбия буллай, миннан кIулшивуртту дуллай ивкIсса учитель Идрис Идрисовлул. Школалул директор ШайхахIмад Дадаевлул барчаллагь увкунни Виричунахь ва тIааьнсса хьунабакьаврихлу. — Ина жул школалул цалчинсса ва бусравсса хъамаличура. Вил ша жул школалун барачат хьуннав, — увкуну, директорнал бахшиш бунни Виричунан «Мой дагестанский народ» тIисса Р. ХIамзатовлул лу ва дуллунни школалул чулуха ХIурматрал грамота.