Август зурул 23-нний ДР-лул Правительствалул председатель Аьбдуссамад ХIамидов цува лавгун ххалдиргьунни МахIачкъалаллал аэропорт цIубуккан буллалисса давурттив ци тагьарданий дурив.

Имара Саидова
МахIачкъалаллал аэропорт­рай махъсса ппурттуву чялишну най дуссар самолетру леххай­сса, кьамул дайсса полоса гьарта-гьарза буллалисса, уттизаманнултIалавшиннардайн буцлацисса давурттив. Премьер-министрнащал аэропорт цIубуккан буллалисса давурттив ххал дуван бувкIун бия шикку зузисса «Мостоотряд-99» ОАО-лул хъунама директор Аьли Гитинов, ДР-лул Ххуллул агенствалул каялувчи Загьид Хучбаров ва аэропорт цIубуккан буллалисса проектрал каялувчи Идрис Аьлиев.
Идрис Аьлиевлул бувсунни аэропорт бакьин буллай асфальт бутIлатIисса давурттив дакъассагу, шикку гьарицимурца даххана дуллалишиву. ХIасил, ттукIрал ххаллая тIайла хьуну, щин экьи гьансса ххуллурдайн бияннинсса чIярусса кIицI лагансса давуртту цIуницIа дуллай най бушиву.
Гьарицимурца шикку дачин дурсса строительствалул давурттал автор хъанахъиссар «Красаэропроект» ООО .
МахIачкъалаллал аэропорт цIубуккан бувну, «В» категориялул даражалийн буцин тIий бур. Му хъанахъиссар 45 метра утташиву ва 2 километра 640 метра лахъишиву дусса майдан. Аэропорт цIубуккан бувну махъ, миккун кьамул дуллан бюхъантIиссар Airbus 320, Boeing 757 ва Ил-86 журалул ва цаймигу хъуни самолетру. Самолетру ле­ххайсса, кьамул дайсса полосалийх 30-40 сантиметралул ганзшиврий бутIин багьлай бур 114 тонна асфальтобетонналул. Аэропортрай дуллалисса давурттив дунияллул халкьуннал стандартру, нормарду, цIусса техникалул, оборудованиялул кьяйдарду дурурччуну, Палангнал, Финляндиянал, Германнал, Чехнал итадаркьусса материаллу ишла дуллай бакьин буллай бур.
Аэропорт цIубуккан буллали­сса давурттив къуртал даншиврул тамансса чIун аьркинну дур. Ми давуртту октябрь зурул ахирданийнин къуртал дувансса пикрилий бур. Мунийнин даву къуртал дан къабюхъарчан, шиккусса зузалт хьхьувайгу зунсса ниятрай бур.
Аэропортрай нанисса давур­ттив ххал дурну махъ Аьбдуссамад ХIамидовлул журналистурал суаллахьхьун жавабру дуллуна.
«ХIакьину жунма ххал хьунни цукунсса шартIирдай зий буссарив шиккусса пишакартал. Па­ссажиртуран мушакъатшивуртту къахьуншиврул вайннан дяхттагу, хьхьувайгу, бигьалагай кьинирдугу ишла къадуллай, зун багьлай бур. Цалла бакIрайн ларсъсса даву дузрайн дуккан дуллай, кьамул бувсса графикрайну, планналийну зий ххуттава буклай бакъар», — увкунни Аьбдуссамад ХIамидовлул.
Мукунма Аь. ХIамидовлул аэропорт бакьин баву мурадрай, мунил даву чIумуйнусса дацIан дан багьлай бушиврийн бувну пассажиртурахь ссавурданий бикIияра тIий, миннат буллай ур.
«Циняв технологияртту дурурччуну асфальтобетон бутIиншиврул багьлай бур аэропортрал даву ца зуруйсса дацIан дуван. Ахирданий жулва аэропортгу дунияллул халкьуннал аэропортрал даражалийн биянтIиссар, ва жущарагу ччимур маркалул самолетру кьамул дуллан бюхъантIиссар», — увкунни Аьбду­ссамад ХIамидовлул.
Аьмну премьер-министрнал шикку нанисса давурттан лавай­сса кьимат бивщунни. Аэропорт цIубуккан баву мурадрай Федерал даражалий баян бувну бивкIсса конкурсраву ххув хьуссия Дагъусттаннал «Мостоотряд-99» ОАО-тIисса компания.