Терактирдаву ливтIуми дакIнийн бичлачисса батIаву хьунни Лакрал райондалул администрациялийгу. Муний гьуртту хьунни райондалул администрациялул ва идарарттал зузалт. БатIаву дачин дурну ия райондалул администрациялул бакIчи Абакар Къюннуев. Дайдирхьуна батIаву Бесланнал школалий ливтIусса оьрчIру дакIнийн бичаврийну.
Ихтилатру бунни райондалул администрациялул бакIчинал хъиривчу Юсуп Рамазановлул, КIулшиву дулаврил управлениялул каялувчи Явсупи ХIамзаевлул ва цайминнал. Миннал кIицI лавгуна Аьрасатнаву терроризмалул мархри ливчуну сайки 20 шин хьушиву ва му чIумул мутталий жулва билаятрай террорданул нигьирттал цикссагу оьрмурду гьавушиву.
Бувсуна райондалий жагьилтурал дянив дуллалисса экстремизмалийн ва терроризмалийн къаршисса, ми ватан ххирану, рувхIанийну тарбия баврил ялув ва оьрчIру террордания мюхчан бан кIулшиву дулаврил идарарттай дуллалисса давурттая. КIицI лавгуна экстремизмалул идеология ппив хьун къаритан кIулшиву дулаврил управлениялущал ва низам дуруччай органнащал хъуннасса даву дуллай бушиву Жагьилтурал комитет ва райондалул администрациялучIасса жагьилтурал администрация.
Райондалул школарттай дирхьунни Бесланнай хьусса оьзрулун хас дурсса тIиртIусса дарсру, классный часру. Му темалун хас дурсса мероприятияртту дан тIий дур гихуннайгу.