19-нний августрал Ккуллал райондалий уттигъанну хIасул бувсса «антитеррористический комитетрал» цалчинсса батIаву дурунни.

Терроризм. Ва мукъул цитIиссарив къакIулсса цаягу угьарасса инсан ушиву къакIулли. Ва дур щалагу дунияллул «цIуцIаву». МахIатталшиву ци дур учирча цимигу аьсрурдал лахъишиврий най дур ва «цIуцIаву» цурдагу.
Тарихраву ливчIун бур хаварду, цалла цIа дуккан дуваншиврул цурив ца паччахIнал къатрацIух цIу щусса инсаннал цIагума. На га ттунна кIулну дунура кIицI дуллай акъара. АцIниясса шиннардил хьхьичIва ттун бавссар цурк бувсса ца жагьил: «На ттулла цIа-бакI кказитрай чичинсса кIулну, бувссия цурк», — тIисса ца далил. Бунияла инсаннал аькьлу-кIулшилул «авлияшиврул» ахир-зума дакъар. Школалий дуклакисса чIумал тарихрал луттирай дикIайва 17 шинавусса Ленин ниттил чIарав авцIуну: «Жува цамур ххуллийх бачинну», — тIисса, дирхьусса сурат. Лениннул уссу террорист ивкIссар.
19-нний августрал Ккуллал райондалий уттигъанну хIасул бувсса «антитеррористический комитетрал» цалчинсса батIаву дурунни. Ва комитет цуппагу харжи бивхьусса инсантурая хIасул бувсса къуллугъ бур. Кказит буккулт най бунува паракьат буван ччива, Ккуллал райондалий къавхьушиву ва хьунсса цавагу хIучча бакъашиву терроризмалуцIун бавхIусса ишру. Оьруснал миллатрал бур: «Цала цува урувччума, Аллагьналгу яувайссар», — тIисса, хъинну ххуйсса учала. Мунин бувну Ккуллал райондалий вай кIицI дурсса лиявуртту къахьундитансса пикрилий, райондалул администрациялул залданувун бавтIун бия шяраваллал бакIчитал, культуралул зузалт, школардал директортал ва райондалийсса идарарттал бакIчитал ихтилат буван, цукунсса, ци чулийсса тарбиялул давурттив дуван дурив маслихIат буван. Даву дачин дурну ия Ккуллал райондалул бакIчи Сяид Сулайманов ва ванал хъиривма Эдуард ХIажиев.
Гьашину Ккуллал райондалул бакIчинал маслихIатчину ва пресс-секретарну Шамхал Хизриев зун ивкIния махъ, хъинну янилун дагьлан диркIунни тарбиялул ва ватанчиталну оьрму бутлан аьркиншиврул давурттив. Ттулмур администрациялущалсса дахIаву, аьркинсса информация булаву хъинну бущилийсса хьунни. Шамхал Хизриев Аьрасатнал аьралунниву къуллугъ буллай ивкIсса, отставкалийсса майорнал чиндалувусса хIаписар ур. КIулну бур ванан терроризмалул мархха-ххуну ча наниссарив. Мунияту цалчин ванахьхьун буллуна махъ. Шамхал Хизриевлул цала ихтилат байбивхьуна чIаххувсса Украиннаву хъанахъисса иширттаяту. Тай иширттал дайдихьу хъанай душиву кIицI бувуна ванал, хIукуматрал къуллугъирттайсса инсантурал захIматкашнал буруккинттах ургъилшиву дакъашиврияту. КIицI бувуна ванал хIатта законну дуруччай къуллугъчитал буржлувну бухьурчагу террористуращал талан, гай кIул буллан, законналийн кIункIу буллан, амма кулпатраву хъуна къавхьусса инсан къаикIайхьувкун цал цала оьрчI-душру ссаха зий буссарив, цукунсса пикрирдал ясир буллай буссарив нитти-буттан кIулну бикIан багьлай бушиву кIицI бувуна.
Ккуллал райондалий хIасул бувсса антитеррористический комитет ва «талаталтрал» комитет бакъар. Ва бур шяраваллавусса жагьилтал ци зий бурив, вайннал ци тIалавшиннарду дурив сияхIрайн лавсун шяраваллал администрациярттащал, жагьилтурал сакиншиннардащал, школардал директортуращал, культуралул зузалтращал цачIуну бюхълахъимур буван хIасул бувсса къуллугъ. Райондалий ххуйну най дур спортралми давурттив. Царагу нюжмар лях къалагай цукунсса дунугу спортрал бяс-ччаллу къавхьусса. Волейболданий буккай, лачIун буккай,велопробегру шай , кук­лу атлетикалул бяс-ччаллу шай. Вайннулгур жула жагьилтал аьркин дакъасса тIуллая махъал буллалисса. Спортращал архIал културалул давурттивгу хъинну ххуйну най дур. Аслисса культуралул хIурмат бусса чIумал, тарбия хъанахъиссар ватанчиталну ялун нанисса никгу.
Инсаннал дакIнил хIужрарду хъинну кьюлтIсса бур. Мунияту ялув кIицI бувсса иширттал хъунмасса кIану бугьлай бухьурчагу, лиявурттая инсан махъал уван хъинну захIматну бушиврияту бувуна ихтилатру. Чара бакъа школардай бикIан багьлай бушиврияту буслай бия «тревожная кнопка». Цалла дуллалисса давурттаяту бусаврищал вай цалла пикрирду кIибавчIуна: УО-лул бакIчинал АхIмадов Шамиллул, культуралул управлениялул хъунмунил Ибрагьимова Маринал, полициялул зузалал Давдиев Анатолийл, Хъусращиял шяраваллил бакIчинал Гъазиев Аьбдуллул, антитеррористический комитетрал бакIчинал Раджабов МухIуттиннул. Цинявннал був­сса ихтилатирттал жям дуллай, райондалул бакIчинал тикрал бувуна: «Нитти-буттаяту байбивхьуну, 18 шин хьуннин жула янилусса оьрчIал ялув бацIан аьркинссару. Гьай-гьай, ганияр махъгу райондалийсса идарар­ттал бакIчитурал цала зузалал дуллалисса даву янилу дакъагу, ганал къатта-къушливусса ишругу буруккинттарай янилу битарча, оьккину къахьунссия», — куна. Шиккува гьаз хьуна ца цамургу, динналущал бавхIусса масъала. Махъсса шиннардий пашмансса иш хьусса къатта-къушливу бакъагу, мавлудру дуллалисса ишру чIяву хьуну бушиврияту буслай бия. Учиннуча цIусса къатравун бизлазиний, оьрчI-душнин цIа дизлазиний ягу цаймигу иширттай. Динналул элму ххуйну кIулсса аьлимтурал бусласаврийн бувну, вай мавлудру дуллалаву ххишаласса, ххаралунсса ишруну ккалли буллай бушиврияту буслай бия. Ихтилатру бувуна цаймигу жяматрал дянивсса иширттаяту.