Ванал хъунмур оьрмулул бутIа Калининнул цIанийсса колхозрал ва мунил гьанулий сакин хьуну дурсса ТIюхчардал совхозрал механизаторну лавгун бур. Ванан хIакьинугу ххуйну дакIний бур цала механизациялувун трактористнал кумагчийну лавсъсса цалчинсса шаттирду.
Муния шинмай 30-ннин дирсса шиннардий му щяивкIун ур цимирагу журалул трактордай, муххал нигьирттайссаннуя дайдирхьуну, гусеницардайссаннийн дияннин. Лавайсса даражалул тракторист МухIадов ХIажи-Мусин гьашайсса бивкIун бур зузисса тракторданух вичIи дирхьуну, ганил хIал кIул буван. Ванаща бюхъайсса бивкIун бур ччимур трактор дакьин дурну, кутIасса чIумуй авлахърайн зун тIайла дуккан.
ЦIуссалакрал райондалий ва кIулну ия кказа бай ххяххиярттал авадансса бакIлахъия ласайсса звенорал звеновойну. ХIажи-Муси шиная шинайн техника зузи даврил бяст-ччалливу хьхьичIунману икIайва.
Ва ия аьрщарай дакI цIуцIисса, хIакьинугу ганиха къуллугъ буллалисса зузала. Аьрщи оьргъа даву, интту-ссуттил хъу дугьаву, хIаллил лакьаву, къюмайтIутIул плантациярдаха къуллугъ баву, чIявуя ХIажи-Мусил къайгъурду. Даймургу ванал дирчIан дурну, лябукку буну дакIнихтуну дувайва.
1973 шинал ванал захIмат хIисавравун лавсун, хIукуматрал ХIажи-Мусин дуллуну дур «ХIурматрал лишан». Мунияр махъгу ва лайкь хьунни цамургу хIукуматрал бахшишран «За трудовую доблесть» тIисса медальданун. Ми дакъасса ХIажи-Мусил чIярусса хIурматрал Грамотардугу дур. ХьхьичIунсса механизатор зузала хIисаврай ХIажи-Мусин очередь дакъанна машинагу буллуну бур. ЦIанакул колхозругу, магьлул хавар кунма, вайгу циривав тIисса кIанттайн дагьну дур. Ччимур ахънилсри, хъунилсри захIмат къабувна чил хIукуматирттая зунттал кьуруккутIувсса шяраваллавун диян дуллай бур ччарча гъинттул, ччарча кIинттул.
Аьрщигу трактордал гъай тIий, каза дуллай, инжит къадурна дигьаларгун курчIу лирчIун дур. Мунияту ХIажи-Мусигу колхоз-совхозру духларгун цанна ххирасса механизаторшивугу кьадиртун пенсиялийн увккун Манасрай ялапар хъанай ур.
Амма ХIажи-Муси кунмасса захIматрал агьлу зузисса колхоз-совхозирттал ххяххан дурсса ахънилсри ва хъунилсри ляличIисса тIин-тIюъму бусса, уттигу дукан ччивахха тIисса дикIайва.
ХIажи-Муси кунмасса зузалтрал хIурмат жучIава лавайсса бикIан аьркинссар.
