ХIукуматрал чулуха миски-гъаривсса, къатлувун дучIайсса къазанжи оьрму бутлан ца инсаннан яла чанну ккаккан дурминнуяр яларайну ласайминнан ЖКХ-лул хIаллихшиннардан ка-кумаг буллалисса, субсидияртту дуллалисса закон дур. Мунин бувну на уттигъанну хьунаавкьуссияв, Ккуллал райондалий ци иш-тагьар дурив кIул дуван, Ккуллал райондалул «Районный центр жилищных субсидии», — тIисса идаралул директорнащал Шагьабуттинов МахIалли Шапиуллагьлул арснащал. Ванал бувсуна ттухь Ккуллал райондалий яхъанахъисса инсантуран субсидия булаврияту.

ХIажимурад ХIусайнов
— Жула райондалийгу субсидия бишиншиврул, гьарца кIанай кунма оьрму бутлан яла чанну кулпатрал ужагърайн дучIайсса къазанжи хIисавравун ласай­ссар. ЖучIава субсидияртту булайссар къатта гъили буван харж бувсса хъуручIух, дукра дуван ишла бувсса газрах, чани буван ччувччусса ттукIрах. Аьмну жула райондалий яхъанай бур статистикалул сияхIрайн бувну 2968 кулпат. Миннавату субсидияртту бивхьусса бур 202 кулпат. Субсидия бивхьусса кулпатир­ттаву яхъанахъисса инсантурал сияхI дур 704 инсан. Субсидия бишайссар 6 зуруйсса. Ганияр махъ ялагу кулпатирттаву яхъанахъисса инсантал, кулпатравун дучIайсса къазанжи ххи-чан хьуну дурив кIулну бикIаншиврул, субсидия бишиншиврул аьркинсса документру цIу бувай­ссар. Субсидияртту биширчагу вай Дагъусттаннал бюджетрава дулайсса арцу духьувкун, вана 8 барз хьунни вай арцу жула инсантуран дулун къахъанай. Ялагу бур дайшишру хъанахъисса цаймигу ишру. Масалдаран газ лавсун букIлакIисса машиналул инсантурахьхьун цукунчIавсса документ буллай бакъар. Мукунма хъуручI бахлай букIлакIисса шофертуралгу. Вай ишру Да­гъусттаннал бакIчиная байбивхьуну, Дагъусттаннал Халкьуннал Мажлисрал депутатътурайн бияннин цинявннан кIулссар. Амма мукъурттийну «кIяла дуванну экономика», тIисса лозунгирттай гъалгъа тIаву дакъа, законну дуруччинма тIий бивтсса къуллугъирттайсса пишакартурал ва масъала чулийн буккан буллай бакъар. Мунийн бувну, багьайсса кьяйдасса налогру датIай идарарттал сияхIрайн лавсъсса кассовый аппаратрава дуллусса чекру дакъашиврийн бувну багьайсса субсидияртту бишингу, булунгу къабюхъла­хъисса ишру хъанай бур.
Барчаллагь, МахIалли Шапиуллагьович.