Аллагьу Тааьланал дуниял мукьра задрай дацIан дурну дуссар: аьлимтурал элмулий, хъуниминнал аьдлулий, мискинтурал дуаьлий, аваданминнал Цадакьалий.
Аллагьналгу инсантал дунияллий ца куццуй ляхъан къабувкун: кув дуну, кув дакъа, кув мискинну, кув ттуршаману, мискиннан Цадакьа баву дунияллул ттарцIну дурссар. Мукун бухьувкун инсаннал цала чурххая, кулпатрая ххишала шайсса зад духьурча, му Цадакьалун дулаву ссуннатссар.
Цадакьалун дулунмур дакъахьурча, чIа тIинахь ххуйсса жуав данссар, мугу Цадакьари. Канийну, мазрайну хъинбала баву — Цадакьари. Элмулия цанма кIулмур бусаву – Цадакьари. Лажин тIайлану ургаву – Цадакьари. Ххуллийн тIайла ацIан аву – Цадакьари. Ххуллияту чару-зад гьаз баву – Цадакьари. Хъинбалдарал ххуллий лавсъсса ша – Цадакьари. Хъу дугьаву – Цадакьари. Мурхь бугьаву – Цадакьари. Халкьуннал дянив маслихIат баву – Цадакьари. Гьарца хъинбала – Цадакьари. ХIасил, Цадакьа бан ччай дулунмур дакъаманал муъминтураха ххуйсса дуаь данссар.
Цадакьалун дулун яла ххирамургу щинни. Мякьсса инсаннан щин дулавунияр ххирасса, хъинсса Цадакьа цамур бакъассар, щин дакъасса кIанай мякьманан ца ххув щинал буллуманан ивкIусса инсан уттава увссаксса чири буссар. Хъирив ххирамур – дукралийн бичайсса цIури. Мугу Ибрагьим Идавсил МухIаммад Идавсил умматиннан дурсса хъамалушинни. Ми цIу Цадакьалун булурча, ми цIу бивчуну дурцири дукра Цадакьалун дуллуссаксса чири буссар. Мукунма, дукра шахьан цIу дула тIий увкIсса инсаннан цIу дулурча, му цIарай шархьцири дукра Цадакьалун дуллуссаксса чири буссар. Ми шаннагу за – щингу, цIугу, дукралийн бичай цIугу дула тIий увкIсса инсан, дунура дакъар куну айщун ан къахъинссар, карагьатссар.
Хъирив Цадакьалун дулун хъинмур – дукия, лаххия, хIачIия. ДакI дияйсса чIиримур дуллуну хъинссар, дакI къадирна, дулун къаччай дуллусса хъуннамурнияр.
Цадакьа бан яла чири хъунмамур чIунгу: гьарца нюжмар хьхьу, нюжмар кьини, Рамазан барз, бусурманнал байраннал кьинирду, зул-хIижжа зурул ацIвагу гьантта, миннул хъирив­сса шанмагу гьантта, мухIаррам барз, хаснува Аьшурдул кьини, мавлудрал гьантри, баргъ-барз бувгьукун, гъарал кьаркьукун, ХIаж байний, сапарданий уккай­ний, ца даву дайдишайний, бала ялун наниний, цIуцIавуртту диллан диркIукун, ца бунагьравун агьувкун, мукунма, цайми-цайми иширттавугу та барчагу баву хъинссар. Бан-хьун тIий кьабитаву къахъинссар. Дунияллий сагъну уна бавугу хъинссар, ивкIукун вихлува цаманал бувмунияр.
«НасихIатуль аьвам» («ГьунчIукьатIан»)
тIисса луттирава