МахIачкъалаливсса Республикалул автомашинарттал ххуллурдал колледж хъанай бур, жулла республикалий хьуннав, Аьрасатнаву хьуннав, цIа ларгсса, хъинну хьхьичIавасса, дянивсса кIулшиврул пишакартал итабакьлакьисса хасъсса дуккаврил учреждение.

Ва колледж къуртал бувну бур цIана хъунисса къуллу­гъирттай зузисса инсантурал. Дакъахьунссар Дагъусттаннай царагу шяравалу ва колледж къуртал бувсса пишакартал бакъасса.
Ва колледж шиная-шинайн хъун хъанай, цIу-цIусса сянатру лахьлахьисса отделенияртту тIитIлай, дуккаврил даву ларай дувансса шартIру щаллу дуллай бур. Му бакъассагу, шикку хъуннасса аякьа дуллай бур студентътурал цIуллу-сагъшиврух, гайннал дуккаврих ва бигьалагаврих, марцIшиву дуруччаврих.
Бакъахьунссар цавагу ду­ккаврил идара ва кунма лазилавкьуну, щюллишиврувун, тIутIавун бахьлавгсса. Гьарца шинах колледжрал директорнал каялувшиннаралу дувай чIярусса хъунисса давуртту. Хъинну хъуннасса къулагъас ва аякьа дуллай ур ванал колледжрал лагма-ялттусса аьрщарай марцIшивугу, урувгнал яругу, дакIгу ххари даврих. Колледжравун ва стадиондалийн нанисса ххуллурдайх бавкьунни асфальт, циняв­ппагу корпусирдал хьхьичIсса территория даркьунни авурсса плитардал. Лагмавасса хъунив хьусса мурхьру баххана бунни, бунни тIутIив дугьайсса клумбарду, бувгьунни миннул лагмава муданма щюллинмасса къатIри. Общежитиялул лагма бувгьунни жура-журасса мурхьру. Му бакъассагу, колледжрал территориялий бур жура-журасса ахъулссаннул мурхьру. Шикку хъуннасса аякьа дуллай бур дуклаки оьрчIал багьу-бизулух, миннал общежитиялувусса дузалшиннарах, ми щаллу буваврих, гъилишиврул, электричествалул, щинал ва м.ц. масъаларттах. Спортрал даврихгу ва колледжраву хъинну хъуннасса ургъил дуллай бур, спортрал даву хьхьичIуннай дувансса шартIру шиная шинайн ххи хъанай дур.
Бувну къуртал бунни спорт­рал хъунмасса комлекс, баскетболданий, волейболдай буккайсса майданну, лечай ххуллурду, дирхьунни спорт­рал инвентарь, турникру, брусья.
Шикку дуклай бивкIсса студентътурая хьуссар Дунияллул чемпионтал, Аьрасатнал ва Дагъусттаннал жура-журасса соревнованиярттай, олимпиадардай ва цаймигу бяст-ччаллаву хьхьичIунсса кIантту бувгьусса.
Ванияр 17 шинал хьхьичI тIивтIуссар МахIачкъалаллал филиал, яла жулла хIукуматрай цIа ларгсса чIявусса автомашинарттал ххуллурдал инженертал итабакьлай 80 шин ххишалагу хьусса МАДИ-лул (Москавуллал автодорожный институт) филиал. Му филиалданул бур 5 учебный корпус, личIисса хасъсса лабораториярду, гостиницалул журалий­сса общежитие, автошкола, цинярда категориялул водительтурал удостоверенияртту дуллалисса учебный центр, бензин ххилаххисса, мугъаятну ласласисса кьайлул жура-журасса пишакаршиврул. Му корпусрал щаллусса зиву дургьуну бур вычислительный центрданул, бур хъунмасса, цIанасса чIумуха лавхьхьусса, библиотека. Ва филиалданул бур стадион, мукьва лавкьусса спортзал, столовая. Корпусирттаву бур буфетру, спортрал хасъсса секциярду, ми спортсментал хIадур буллай бур цIарду ларгсса спортрал мастертал. Бур жулва лакрал пишакарталгу, хъунмасса хIаллай ва колледжравугу ва институтрал филиалданувугу зузисса профессортал, доктортал ва кандидатътал.
Вай укунсса давур­тту хьхьичIунну дуллай ур кIиягу уссу: техникалул элмурдал кандидат, МАДИ-лул МахIачкъалаллал филиалданул директор ХIасанов ХIасан МахIаммадлул арс ва экономикалул элмурдал доктор, Республикалул колледжрал директор ХIасанов Сапин МахIаммадлул арс.
Ххирасса лакрал жагьилтал! Дуклан ччисса душваран ва оьрчIан МАДИ-лул МахIачкъалаллал филиал ва Республикалул автомашинар­ттал ххуллурдал колледжрал нузру тIиртIуссар.
Цукунсса сянатру ла­хьхьайссарив, цукунсса документру аьркинссарив, ми документ­ру та кьамул буллалиссарив, цукунсса экзаменну дуссарив, гьарзад кIул бан бюхъайссар ва адресрай, ва телефондалувух:
ш. МахIачкъала, Ахъушинскийл проспект, къ. 13,
тел: 68-04-28, 67-82-76.