Щил ци учирчагу, дуккаврил сий мудангу диркIссар ва ттигу дикIантIиссар. Нава Москавлий бусса гьантрай ттун шяраваллил халкьуннал ххуйсса хавар баян бувна: Москавуллал школа къуртал бувсса цIувкIра душнин Москавуллал ХIукуматрал ХIурматрал грамота дуллушиву.

Интернетгу, «Фейсбукгу» гьакссагу къулайсса затру дур. «ФейсбукрайхчIин», на Москавлив бусса кIулну, тий яхъана­хъисса шяраваллил агьлу цачIанма оьвтIий, хавардай бия. Мукун кIул хьуна МахIачкъалалив ттущала ца издательствалий зий ивкIсса МахIаммад-ХIажи Загьидиновлул чIивимур душнин дуллушиву ХIурматрал грамота. МахIаммад-ХIажи, Москавлив полиграфиялул институт къуртал бувсса, даврил опыт бусса полиграфистри. Да­гъусттаннай ччанавккусса ишру хъанан бикIайхту, кулпатращал Москавлив ивзун, тийхра минагу дирхьуну, бизнесрахун агьну ур. Мунал хъунмур душ Наида ххуйну дуклай бур Москавуллал паччахIлугърал культуралул ва искусствалул институтраву. Дуккавриву итххявхсса Наидал чялишсса гьурттушинна дай­сса дур институтрал оьрмулул иширттавугу. Камилал тIурча гьашину къуртал бувну бур Москавуллал областьрайсса Мытищи шагьрулийсса 16-мур гимназия. Москавуллал областьрал Минобразованиялул чулухасса ХIурматрал грамотагу дуллуну дур мунин дуккавриву хьхьичIунсса ккаккиярттахлу.
— Буттал жу тарбия бувссару дуккаву хьхьичIунну, мунал бусай, цанма хъинну оьрус мазвагу къакIулнува, цайнува цува Москавлив увкIун, ххуйсса кьиматирттайсса диплом лавсшиву, — тIий бур Камила. – Кулпатраву дуккаврих хъуннасса къулагъас духьурча, зуятугу тIалавшинна духьурча, хьхьарану дуклакаву къаххуйрихха. Буттал тIийкун, «жунмару дуклакиссагу».
Камилан яла ххирами дарсирдавух ингилис мазрал дарсгу дур, дуклан буххан цумур институт язи бугьлай бура увкукунгу, ингилис мазрал кIулшивуртту куртIгу, цIакьгу дуллалисса вуз язи бугьанна тIий бур.
Москавлив хъуни хьусса бунугу, МахIаммад-ХIажинал ва Патрициял (вагу жула шяравудушри) душру дагъус­ттаннал аьдатру, культура ххирасса душру бур. Микку тамаша бизанссагу цичIав бакъар. МахIаммад-ХIажи Загьидинов мудангу чялишну гьуртту шай Москавливсса Дагъусттаннал диаспоралул дуллалимунивух. Ванал сайки царагу мероприятие лях гьан къаритай. Оьнийгу, хъиннийгу жяматрал чIарав ацIай. МахIаммад-ХIажинал ппу ХIамид Загьидинов чIярусса шиннардий зий уссия Ккуллал райондалул «ЧаннацIуку» кказитрал редакторну. Никирая никирайн ирсирай дачайхьурча республикалул культуралухсса ччавугу, дакIцIуцIавугу, Загьидиновхъал кулпатраву му ччаву буниялттунгу шанна никираву цIакь хьуну дур.