Вирттаврал цIарду ялун личлай дур

Хъунмасса Буттал кIанттул цIанийсса дяъвилий къучагъну талай, личIи-личIисса аьрали наградартту лайкь дурсса чIявусса лакрая уттинин къакIулну бивкIмур кIул хьунни жунма Къалмукьнавасса жула дус (ва буниялагу утти лакрал хъинсса дус хьуну ур), журналист-исследователь Андрей Цобдаевлул хъиривлаявурттайн бувну. Жулва вирттаврая кIул хьумур цаппара номердай жугу бивщуссия.
Вай гьантрай, ливтIуну махъ аьрали наградартту дулун кка­ккан бувсса, лакрал къучагътурал цIарду дусса уттигу ца сияхI ва кIия виричунал – капитан Рашкъуев Бакир Шарапуттиновичлул ва чIивима лейтенант ХIасанов Аьлил наградной листру ларсун увкIунни жул редакциялийн Андрей Борисович.

Лениннул орден дулун кка­ккан увсса Рашкъуев Бакир Шарапуттинович увну ур 1922 шинал. Коммунистурал партиялувун увххун ур 1943 шинал. Гьуртту хьуну ур граждан дяъвилуву. Хъунмасса Буттал КIанттул цIанийсса дяъвилийн увцуну ур Лакрал райондалул военкоматрал. 1941 шинал август зуруя айивхьуну гьуртту хьуну ур Кьиб­лалул, Дянивмур, Брянскаллал ва Белоруссиянал фронтирттай. 1943 шинал захIматсса щаву дирну ивкIун ур. Щаву дирну дур мунияр махъгу, 1944 шинал август зурул 24-нний.
ХьхьичIгу ва лайкь хьуну ивкIун ур Буттал КIанттул цIанийсса дяъвилул 2-мур даражалул ордендалун ва ЯтIул ЦIукул ордендалун.
Укун чивчуну бур ванал наградной листрай:
— Нарев тIисса неххал баргълагавал чулухсса зуманив немецнал чапхунчитуращалсса талатавриву Рашкъуевлул цалва батальондалул командирнал ва ротардал командиртурал дахIаву дурну, батальон хьхьичIуннай дачинсса сант дуртун дур.
1944 шинал октябрь зурул 12-нний Рашкъуевлул дурцуну дур батальон вацIлувухчIин Рожан-Пултуск тIисса немецнал агьамсса магистральданучIан. Шикку суткалий душманнайн данди бавцIуну бивкIун ур. Душманнал танкарду гъан хьусса чIумал, шамийла артиллериялул цIу цайнна ларсун, баранбал бувккун талай, немецнан агьамшиву дусса коммуникациярду канища итххяххан къабавцIуну бур. Ва талатавриву къучагъну талай ва усттарну каялувшиву дуллай ивкIун тIий лайкьссар ХIукуматрал наградалун – Лениннул ордендалун.
Амма яла аьралуннал хъуниминнал, му орден къадуллуна, «За отвагу» медаль дулун хIукму бувну бур.
Мукунна Лениннул орден дулун ккаккан увсса чIивима лейтенант ХIасанов Аьлил увну ур 1917 шинал. Ва коммунист партиялул член ур. Гьуртту хьуну ур Юго-Западный, Донской, Воронежский, Степной, 2-мур Украинский фронтирттай.
Дяъвилийн увцуну ивкIун ур Ахъушиял райондалул военкоматрал. Укун чивчуну бур ванал наградной листрай:
Октябрь зурул 2-нний хьхьуниву гвардиялул капитан Кузнецовлул подразделенияртту лахъазан (476) ласунсса мурад­рай хьхьичIуннай най диркIун дур. Душман лахъазан итакъадакьин унгу-унгу данди авцIуну ур. Амма минометирттал ва пулеметирттал цIаравух подразделение хьхьичIуннай най диркIун дур.
Взводрал командир ХIа­сановлущал архIал 8 инсан усса аьралитурал кьюкьлул лагма цукссагу гуж ххисса душманнал рургьуну дур. ЗахIматсса тагьар чIалан дикIайхту ХIасановлул хIукму бувну бур, душманнайн гьужум бувну, шалклува буккан. Аьралитал, каруннай хIала був­ххун биллай, душманнаяр ххув хьуну бур. Хъуннасса къучагъшиву чIалачIи дурну дур ва талатавриву хIаписар ХIасановлул. Аьралитал бувккун бур шалклува 2 инсаннайн щавурду дирну. Вай цаламиннавух хIала бувххун, цIунилгу лахъазан ласунсса талатавурттавух гьуртту хьуну бур. Душман кьянкьану авцIуну ивкIун ур лахъазан итакъадакьин. Амма подразделение ккуллардал тIюпандалувух хьхьичIуннай най диркIун дур. ЧIявусса ливтIусса ва бивщуссагу хьуну, лахъазан ларсун дур.
Душманнал кьаст лархIуну дур гьужум бувну му махъуннай ласун.
Амма жула аьралитал кьянкьану бавцIуну бур. Цала хьхьичI бивхьусса бурж аьралитурал лайкьну биттур бувну бур.
Ва ишираву ккаккан дурсса къучагъшиврухлу ХIасанов Аьли­ллун Лениннул орден дулун ккаккан дурну диркIун дур. Амма яла ЯтIул Ттугълил орден дуллуну дур.
Ришлай буру дяъвилия зана къавхьусса, ливтIуну махъ командованиялул личIи-личIисса аьрали наградартту дулун кка­ккан бувсса, Лакрал райондалиясса 11 виричунал цIа дусса ва сияхIгу.

Буттаев МахIаммад Никович. 1903 ш.у. Хъунама лейтенант. ш. ХьурукIул. Награда дулун ккаккан бувну бур 25. 02. 1944 шинал.

ХIусайнов Сулайман. 1902 ш.у. сержант. ш. Ури. Награда дулун ккаккан бувну бур 22.02.1945 ш.

Мусалаев Набит МахIам­мадович. 1918 ш.у. Хъунама лейтенант. ш. Гъумучи. Награда дулун ккаккан бувну бур 31.07.1944 ш.

Камалов ХIасан МахIам­мадович. 1920 ш.у. Лейтенант. ш. Читтур. Награда дулун ккаккан бувну бур 05.08. 1944 ш.

Шамхалов Кичи ХIа­жиевич. 1918 ш.у. Хъунама лейтенант, ш. Куми. Награда дулун ккаккан бувну бур 10.02.1944 ш.

ГъазимахIаммадов Ибрагьин. 1906 ш. Сержант. ш. Шахьуйми. Награда дулун кка­ккан бувну бур 01.03.1944 ш.

Ибрагьимов ХIажи Исадикьович. 1914 ш.у. Гвардиялул капитан. ш. Куци. Награда дулун ккаккан бувну бур 19.09.1944 ш.

Маматаев Шихта Сали­хIович. 1920 ш.у. Хъунама сержант. ш. Куми. Награда дулун ккаккан бувну бур 10.05.1945 ш.

Берцинаев Ибрагьин ХIажиевич. 1924 ш.у. ЧIивима лейтенант. ш. Хъурхъи. Награда дулун ккаккан бувну бур 15.05.1945 ш.

Карлаев ХIайбулла 1918 ш.у. Лейтенант ш. БахIикIул. Награда дулун ккаккан бувну бур 02.09.1944 ш.

Ильдаров Ильдар Ханович. 1916 ш.у. Лейтенант. ш. Гъумучи. Награда дулун кка­ккан бувну бур 27.07.1944 ш.

Вай вирттаврал оьрчIру, мачча-гъан бухьурча, минная гьарта-гьарзану чичияра жучIан ягу оьвчияра ва номерданий
8928 579 05 64.