Июньдалул 13-нний «Восточная пальмира» тIисса банкетир­ттал залдануву хьунни, «Лучшие из лучших» цIанилу, яла хьхьичIунми дандибуккултрал дунияллул халкьуннал турнир. Най буна бусан, турнирданий ккаккан дурсса Дагъусттаннал командалуву чIявуми бия лакку оьрчIру, миннащал биллай бия Украиннал, Белоруссиянал, АьсатIиннал, Азирбижаннал чарххичитал (профессиональные бойцы).

ХIасан Аьдилов
Банкетирттал залданул дянив бацIан бувну бия ринг. Залданувусса циняв столлу чIюлу бувну бия ахъулссаннул, нацIу-кьацIурдал ва личIи-личIисса сокирдал, хIачIиярттал. Столлай чан хьумур, духларгмур щаллу дуллай бия официанткахъул. Сакиншин дия буниялагу дунияллул билаятирттал даражалийсса.
Журналистътал бия циняв республикалул кказитирттал ва телевидениялулсса, мукунма Аьрасатнал СМИ-рдалссагу. Турнирданул бусравсса хъамалну бия АьФ-лул ПаччахIлугърал Думалул депутат, га турнирданул хъунама спонсор Ризван Кьурбанов, Аьрасатнал ишбажаранчи Оьмар Муртазялиев, ДР-лул физкультуралул ва спортрал министр МахIаммад МахIаммадов, ДР-лул УФСИН-далул хъунама, генерал-майор Муслим Да­ххаев ва цаймигу. Бяст-ччаллах тамаша бан бувкIун бия Да­гъусттаннайгу, Аьрасатнавугу, чил билаятирттайгу цIа дурк­сса чарххичитал, боксертал ва цаймигу журардал спортрал вакилтал.
Турнирданул хъунама сакиншинначину ия ДР-лул ХIала-ккаласса журардал дандибуккавурттал (ММА) федерациялул президент Аьбдулкерим Айгунов. Турнирданул ринганонсерну ия Александр Загорский.
Турнирданий хьунни 7 бяст-ччал: ца бяст-ччал хьунни К-1 (кикбоксинграл) кьяйдардай ва 6 бяст-ччал – ММА-рал кьяйдардай.
Цалчин биян бувккунни Сулайман МахIаммадов (Дагъусттан, Аьрасат) – Игорь Кудрицкий (Украина) – К-1 85 килорай. Миннавату судиятурал махъ ца хьусса хIукмулийну ххув хьунни Сулайман МахIаммадов.
КIилчинми бия СалихI Каравалиев (Дагъусттан, Аьрасат) – Андрей Зуев (Белоруссия) – ММА, 70 кило. Миннавату Каравалиев ххув хьунни, 1-мур раундрай цала муттаэ технический нокаутрайн утаврийну. Шамилчин биян бувккунни Айгун АхIмадов (Дагъусттан, Аьрасат) – Анатолий Сафронов (Украина) – ММА – 77 кило. Цалчинмур раундрайва А. АхIмадов ххув хьунни муттаэ бугъ айсса прием ишла дурну.
Мукьилчин бувккунни Жалал ТIагьиров (Дагъусттан, Аьрасат) – Сергей Малышев (Аьрасат, СО-Алания) – ММА, 120 кило. Цалчинмур раундрай С. Малышев ххув хьунни технический нокаутрайну.
Ххюлчинмур чут: Муслимбек Муслимов (Дагъусттан, Аьрасат) – Рамазан Шамсуттинов (Аьрасат, СО-Алания) – ММА, 77 кило. Цалчинмур раундрай ххув хьунни М. Муслимов технический нокаутрайну.
Ряххилчин бувккунни биян, супер-бойрал даражалий, Сяид Халилов (Аьрасат, Дагъусттан) – Тофик Мусаев (Азирбижан). Цалчинмур раундрай Мусаев ххув хьунни технический нокаутрайну. Арулчинмур чутлил дянивсса бияву баян бунни яла хъунмурну, биллай бия Артур Калыч (Украина) – ММА – 84 кило. Миннавату ХIусайнов ххув хьунни 1-мур раундрай, цIунцIия шайсса прием ишла дурну.
Ххув хьуминнан, бахшиш хIисаврай, дуллунни гьарцаннан 30 азарда къуруш, бух хьуминнан – 15 азарда къуруш. Чар­ххичитуран буллунни мукунма хасъсса кубокру.