Гъумук райондалул оьрчIал биб­лиотекалуву хьунни лакрал шаэр, чичу, ДР-лул культуралул лайкь хьусса зузала, захIматрал ветеран Амиров Валерий МахIам­мадлул арснал оьрмулун 75 шин шаврил юбилейран хас бувсса мажлис. Мунил сакиншинначи хьунни райондалул магьирлугърал идара ва библиотека.


Зулайхат Тахакьаева
Муний гьуртту хьунни Лакрал райондалул администрациялул бакIчинал хъиривчу Соня Макьаева, КIулшиву дулаврил управлениялул каялувчи Явсупи ХIамзаев, райондалул Агьали социальныйну буруччаврил управлениялул каялувчи МахIаммад Ссунгъуров, контрольно-счетная палаталул хъунама ХIусайн Куччаев, Ккур­ккуллал школалул директор Даниял Магьдиев ва цаймигу. Мажлисрал бусравсса хъамал бия Дагъусттаннал Чичултрал союзрал лакралмур секциялул хъунама Илияс МахIаммадов ва шаэр Космина Исрапилова.
Мажлис тIитIлай, райондалул магьирлугърал идаралул хъунаманал хъиривчу Аьишат Хизриевал бувсуна шаэрнал оьрмулул ва творчествалул ххуллия.
Валерий Амиров увну ур 1939 шинал март зурул 21-нний. Гъумук 8 классгу къуртал бувну, зий ивкIун ур библиотекалул хъунаману, халкьуннал театрданул актерну. Аьралуннаву къуллугъ бувну зана хьуну махъ 1965-1973 шиннардий зий ивкIун ур «Ххяххабаргъ» кказитрал корреспондентну, отделданул хъунаману, жаваблувсса секретарьну. Гихунай — райондалул автоклубрал директорну. ЦIанасса чIумал зий ур «Ххяххабаргъ» кказитрал жаваблувсса секретарьну. Ва ур СССР-данул Журналистурал союзрал член, Аьрасатнал Чичулт­рал союзрал член, «Золотой орел» Дагъусттаннал Журналистурал союзрал премиялул лауреат.
Райондалул администрациялул бакIчинал хъиривчу Соня Макьаевал кIицI лавгуна Валерий Амиров «Ххяххабаргъ» кказитрай мудангу агьамсса масъалартту гьаз буллай ушиву. Мунал хIакьинусса кьинилия, хIатта ялун бучIантIимуниясса фельетонну буккин мудангу гъира бикIайшиву, ванал чивчумур цинма оьруснал чичултрал «Бессмертная комедиялуха» лащайшиву.
Хъун хъанахъисса ник рувхIа­нийну ва мяърипатрай тарбия дан бихьлахьисса захIматрахлу райондалул бакIчи Юсуп МахIаммадовлул цIания дуллуна ХIурматрал грамота ва арцуйнусса бахшиш.
Илияс МахIаммадовлул кIицI лавгуна цува ххарину ушиву лакраву шаэрталгу чан хъанай, лакку улчагу, Валерийл цалва мукъурттийну учин «ххаляххуйсса ккарччив кунма ххялтIа бувккун нанисса» чIумал Лаккуй шаэрнал творчествалул мажлисрай гьуртту хьун бюхъаврия.
— «Интту тIутIив кунма жагьилталгу чIяву хьунссар, жяматгу хъунма хьунссар» тIисса Валерийл шеърирдавусса умуд жувагу къакьукьинну, — увкуна ванал.
Дагъусттаннал Чичултрал союзрал хъунама МахIаммад АхIмадовлул цIания дуллуна грамота.
Даниял Магьдиевлул кIицI лавгуна Валерий Амировлул творчествалуву хъунмур кIану инсаншиву бюхттул дуллалисса шеърирдан буллуну бушиву. ДакIнийн бувтуна хьхьичIва Дагъусттаннал халкьуннал шаэр Юсуп Ххяппалаевлул увкумур: «Гьунар ххисса ухьурчагу, таржумартту дакъашиврийн бувну, гьарзасса буккултран кIул къавхьуна, Гъумуксса шаэрну ливчIссара ина», — тIисса.
Космина Исрапиловал кIицI лавгуна лахьхьу инава чIарах увккун ухьурчагу ххал къавхьумургума, Валерий Амировлул шеърирдаву цинма мудангу асар шайшиву. Мунал шеърирдаву оьрмулуву хъанахъимургу, романтикагу цанницIун ца даркьуну душиву.
Явсупи ХIамзаевлул барчаллагь увкуна шаэрнахь хъун хъанахъисса ник рувхIанийну тарбия дансса захIматрахлу, дуллуна Управлениялул чулухасса грамота ва арцуйнусса бахшиш.
Шаэр ва журналист Миясат Щурпаевал кIицI лавгуна Валерий Амиров инсаншиврул бутIа ххисса инсан ушиву мунал шеърирдал буслай бушиву.
Цала даврил уртакь барча ан бувкIун бия «Ххяххабаргъ» кказит­рал зузалтгу.
Шаэрнал мукъурттий балайрду увкуна АьлихIажи Щамххаловлул, Мариян Жамалуттиновал, Шамсият Какваевал. Цалва балайрдайну мажлис чIюлу бувна Илияс МахIаммадовлулгу. Шаэрнал наз­мурду дурккуна Гъумучиял школалул дуклаки оьрчIал.