Цалва оьрмулул хъунмур бутIа ветеринариялун хас бувсса Ккурккуллал шяравасса Закиринал арс Аьвдулкьагьир Чупаловлун вай гьантрай дуллунни «Заслуженный ветеринарный врач РД» тIисса бусравсса цIа. Аьвдулкьагьир ххуйну кIулмирив бур ванал му цIа ччянира лайкь дурссар, ванал му аралуву хъунмасса захIмат бивхьуссар тIий.
Андриана Аьбдуллаева
Аьвдулкьагьир цуварив ур: «Ттун ттулла даву ххирар ва му тачIав цIуртти ва цIарду ласун дуллай къаивкIра», — тIий.
1955 шинал Ккурккуллал школагу къуртал бувну, Аьвдулкьагьир увххун ур цала язи бувгьусса Шяраваллил хозяйствалул институтрал ветеринариялул факультетрайн. Шикку ва ччяни машгьур хьуну ур. Школалий дуклакинийва цIуллу-цIакьсса, битавсса, спортрал чулуха итххявхсса жагьил, институтраву куклу атлетикалул, гимнастикалул, ттуплий буккаврил бяст-ччаллаву гьуртту хъанай, хьхьичIунсса кIанттурду бугьлан ивкIун ур. Институтрал цIа бюхттул дуллалисса студент бусрав хьуну ур ВУЗ-рал каялувчитурангу. 1960 шинал институтгу къуртал бувну, Аьвдулкьагьир зун айивхьуну ур цала пишалий. Мунияр шихунай мура ца аралуву, личIи-личIисса кIанттурдай, «40 лет ДАССР» тIисса Каспийскаллал совхозрал бригадиршиврия, хъунама ветврачшиврия айивхьуну Каспийскаллал горветстанциялул хъунаманал къуллугърайн ияннин зий ивкIун ур. Ва къуллугърай Аьвдулкьагьир Закирович зий ивкIун ур пенсиялийн укканнин, 1997 шинайннин. Амма пенсиялийн увккун махъгу ванал цанна ххирасса даву ва цува ххирасса коллектив кьакъабивтун бур. Аьвдулкьагьирдуйн тапшур бувну бур Каспийскаллал горветуправлениялул хъунаманал хъиривчунал къуллугъ. 2012 шиная шихунай ва ур мура идаралул хъунама ветврачнугу.
Аьвдулкьагьир ур цалла даву ххуйну кIулсса ва лажин кIялану бартдигьлагьисса лавайсса даражалул пишакар.
Ванал кIулшивурттугу, опытгу чIявуну бучIи лякъай управлениялул зузалтран, хаснува жагьилсса пишакартуран. Цалва пишалул даврий зузаврицIун, Аьвдулкьагьирдул ялату тачIав чан къашайсса бивкIун бур жаваблувсса къуллугъругу ва жяматийсса давурттугу. Ва ивкIун ур цал «40 лет ДАССР», яла «Шамхальский» совхозрал парткомрал секретарьну. Ростоврай лавайсса партиялул школалий дуклакисса чIумал тийхсса Дагъус­ттаннал вакилханалул хъунаманугу ивкIун ур.
Зий ивкIун ур мукуна Каспийскаллал горкомрай сакиншиннарал отделданул инструкторну. Цимилагу увчIуну ур Новый Хушетрал ва Шамхаллал советрал депутатну. Чув, ци къуллугърай ухьурчагу, Аьвдулкьагьир кIулну ивкIун ур вихшала дишин бучIисса, бюхъу-бажар бусса каялувчи хIисаврай. Бусравну ивкIун ур коллективран. Ва цимилагу лайкь хьуну ур партиялул обкомрал чулухасса ХIурматрал грамотарттан ва личIи-личIисса медаллан.
Аьвдулкьагьир ур захIматрал ветеран.
Уттирив ветеринариялул аралуву чIярусса шиннардий бивхьусса захIматрахлу ванан дуллунни «Заслуженный ветеринарный врач РД» тIисса цIа.
— Оьрмулул ттунна дурсса яла хъуннамур бахшишран на ккалли бувара ттулва хъунмасса агьлу-авлад бушиву. Нину сагъсса чIумал, ганил цила чIаравгу щяивтун, бувсуна ттухь цинявппа гъан-маччаминная, ссурахъаврая, хъинирваврая. Му чулуха на хъинну авадансса ияв. Ниттил буслай, таний ттул 120 хъинирву ия. ЧIявуми дунияллия лавгунни, — тIий пашманну ур Аьвдулкьагьир.
ХIакьину Аьвдулкьагьирдул хъунмур ххаришиву дур дуккавриву хьхьичIунсса, гьунар бусса оьрчIал оьрчIая. Цала буттал цIа дирзсса арснал оьрчI Закирдул цаппара шиннардил хьхьичI мусил медальданий школагу къуртал бувну, ЕГЭ-дайгу ххуйсса баллу лавсун бур. Мунаща ччимур институтравун уххан бюхълай бивкIун бур. Закирдул политехнический институт язи бувгьуну бур. ЦIана му 4-мур курсирай дуклай ур. Ххуйну дуклакисса хьхьичIунсса студентътуравух ур. Душнил душ Сакинатлул гьашину къуртал буллай бур Институт Дружбы народов. Ххуйну дуклай буну, ванил ласайсса бур лахъсса, цIа кусса стипендия.
Ссавур дакъа ялугьлай икIай Аьвдулкьагьир гъи дучIаннин, оьрчIал оьрчIащал буттал шяравун гьан, шяраву мина дирхьусса гъан-маччами ккаккан, шяраваллил агьулданущал жап учин. Ятту-гъаттара ябуллалисса шяраваллил халкьунначIагу чан къашай ванахь цIуххинмур, маслихIат ккакканмур.
Цанмагу ххирасса, цувагу ххирасса Ккурккуллал жяматрал цIания барча уллай бура Аьвдулкьагьир, хIукуматрал дуллусса бусрав­сса наградалущал — «Заслуженный ветеринарный врач Республики Дагестан» тIисса цIанищал. ЧIа тIий бура ванангу, ванал кулпатрангу цIуллушиву. ЦIана кунма ми зулва оьрчIал оьрчIал ххари буллай личIаннав бусса оьрмулий