ЦIуну буллалисса школалийсса давурттив

x_10КIинтнил зурдардий къазийгу бивкIун, май зуруй дайдирхьунни Ваччав цIуну буллалисса школалийсса давурттив. Гьашину сентябрь зуруй цIусса школалул къатраву дуккаврил шин дайдишинсса куццуй давурттив къуртал дуван хIарачатрай бур строительтал. Школалийсса давурттив дуллай дур ООО «Артстройком».

Ва школалул къатри хъанахъи­ссар Ккуллал райондалий стандарт зумуну школалунна тIий дуллалисса кIилчинсса къатрину. Укунмасса школа бувссар цакьнива Ккуллал шяраву. Ккуллал райондалул администрациялул ЖКХ-лул, гьанусса строительствалул, архитектуралул отделданул хъунама Жамиев Жамил ХIусайновичлул бувсунни школа буллай зий ушиву личIи-личIисса 24 пишакар ва му бушиву 200 оьрчIансса, школалун аьркинсса мебельгу ларсун хIадурну душиву.
Ванащал жу лавгссияв школа буллалисса кIанттайнгу. Прораб Исяев ХIамидлул кIицI бувуна цIана дуллай бушиву школалул къатри вих душлашисса, теплотра­сса, канализация дуллалисса, чани буцлацисса, школалул хIаятрал сий дучIан дуллалисса давурттив, мукунма шикку зий бушиву Маммаев Аздардул бригадалул электриктал, къатри бушлашисса 12 зузала, Аьбдуллаев МахIаммадлул сварщиктурал бригада, крановщик МахIаммадаьлиев Бухарин, личIи-личIисса механизмардай зун икIайсса пишакар Аьбдуллаев Нуруллагь, камазист Ибаев Кьаландара ва цаймигу зузалт.
Умуд бур Ваччиял школа тIитIаву жулла райондалий хъинну агьамсса социал зумунусса даву къуртал дурсса байрандалул кьинину хьунссар тIисса. Ялугьланну му кьини жунна строительтурал бахшиш дуваннин.