Хьунмур хьуну мукьахрив танмихI бувайсса?

Гьар шинах майрал ахирданий республикалул шагьрурдал ва районнал школардай байбихьулул классирдава хъуними классирдавун 4-ми классирдал дуклаки оьрчIру тIайла буклакисса иширан хасъсса «выпускной баллу» шай. Вана вай бигьалагай гьантрайгу МахIачкъалаллал оьрчIру бялахъан бувайсса клубирттаву оьрчIансса тяхъашивуртту ва шадшивуртту най дия. Амма ОьрчIал кьини кIицI лагайсса кьини хьусса апатIрая бавма пашман ансса, цIими шайнал дакIнил чIарах гьич къабуккансса иш къавхьунугу къаливчIунни.

З. АьбдурахIманова
Му кьини МахIачкъалалив Республикалул лахъай азардал центрданийн «отравление» тIисса диагнозращал 17 инсан ( миннава 3 хъуними, 14 оьрчI) агьну ур. Вай оьрчIава ца душ ххассал бан къавхьуну къуртал хьуну бур. ХIакинтурал бусаврийн бувну, вайми къашайшалт цайнма цивппа букIлай, хъин хъанай бусса бур.
Хъиривра дурсса силистталул зузалтрал кIул бувну бур оьрчIру бялахълай бивкIсса «Бомбино» тяхъашивурттал клуб санитар низам къадурурччуну зий бивкIшиву, гиву гай гьантрай зий бивкIсса зузалт гикку зукъазисса, дукра-къюссуха зун бучIишиву тасттикь буллалисса медициналул жужру бакъасса, анавархъиндарай тиха-шиха бувгьусса халкь бивкIшиву.
Тасттикь бувну бур оьрчIал цIуллу-сагъшиврун ттуккулнисру дирчусса пиццардал ва мороженыйрдал зарал биян бувшиву.
Ва иширацIун бавхIуну, хъи­ривва бавтIсса пресс-конфе­ренциялий ДР-лул цIуллу-сагъшиврул министр Танка Ибрагьимовлул бувсунни, хIакинтураща ххассал бан къавхьусса душ Республикалул клиникалул азарханалийн бувцуну бувкIшиву лап захIматсса тагьардануву, ссихI бигьин къахъанай ва къюкI дусса чулий гужсса къювурдащал. Яла кIул хьуну бур ва чIивинияцIава къюкIлил азар дахчусса, мукьва зурувату къюкIлийн операция бан Москавлийн бувцуну нанисса къашайшала бивкIшиву. ХIакинтурал бусаврийн бувну, душнил къюкI сукку шаврил ца багьана отравлениялул чурххайн гуж бутаву дикIан бюхъайсса дусса дур.
ЦIана Роспотребнадзорданул зузалт шагьрулул оьрчIру бяла­хъайсса клубру ххал буллай, миннал заллухъруннахь лицензияртту дурив ххал дуллай занай бусса бур. Вайннал бусаврийн бувну, 3 шинай цал бакъа ишбажаранчитал ххал бувансса ихтияр вайннахь дакъасса дур.
Жулла хIукуматрай, ттул пик­рилий, аьдатравун дагьну дур, халкь бялахъайсса, буххай-щябикIайсса кIанттурдай бала-апатIру хьуну, халкь оьрмурдацIа хьуну махъ, га идаралухь зунсса, халкь кьамул бансса ихтиярду диркIун дурив дакъарив ххал дуллалисса, гиву халкьуннал дуканмур санэпиднадзорданул ккаккан дурсса шартIирдаву дуллай бурив бакъарив ххал буллалисса. Циванни мюрщи-хъуни бигьалагансса клубругу, аквапаркругу лицензиярттугу, медициналул жужругу, налогру дулайсса органнал сияхIирттавухгу бурив бакъарив бакIрайва ххал къабувайсса? Ягу, алши бакъулт, дахьва оьрмулул тIин бувчIин бувасса оьрчIру оьрмулуцIа хьуну мукьахрив ми закондалул ххуттавун буцлан аьркинсса?
«Выпускной баллал» чIунгу духьувкун, укунсса иширттая хавар буну, личIлулну хъинни.