Строительствалул министр Муса Мусаевлул пресс-конференциялий

Июньдалул 16-нний «Дагестан» РИА-лий хьунни ДР-лул строительствалул, архитектуралул ва ЖКХ-лул министр Муса Мусаевлул пресс-конференция. Пресс-конференция хьуссар «Открытая власть» тIисса проектрал хахливу.

Цалва министерствалул шинал мутталий дурсса давурттал хIакъираву бувсмунийн бувну, ларгсса шинал республикалул строительствалул бутIувун дучIан дурну диркIссар инвестициярдал 88,4 млрд. къуруширттал. Ми хъанай дур Ухссавнил Ккавкказуллал округравун дирчусса цинярда арцул 42,2%. ХIакьинусса кьини 11% налогирттал сакин буллай бур ДР-лул бюджет. Ларгсса шинал республикалий дурну дур 1 млн. ва 536 азарда квадрат метрарду къатрал, мигу хъанай дур СКФО-рай дурсса къатрал сайки 40%. Республикалул строительствалул комплексраву зий бур 70 азаруннаяр ххишаласса инсантал.
Пресс-конференциялий хъунмур ихтилат министрнал бунни уттигъанну «Дагстройэкспо-2014» цIанилу хьусса цалчинмур Да­гъусттаннал ва цаппара регионнал цачIусса строительствалул ва архитектуралул форумрал хIакъираву. М. Мусаевлул мукъурттийн бувну, форум тIивтIусса кьини хьуну дур строительствалул бутIул яла бур увкуми пишакарталгу, проектировщикталгу, архитекторталгу, дизайнерталгу хIала-гьурттусса планерное заседание. Тиккува гьуртту хьуминнал жавабру дуллунни цахьхьунма инсантурал буллусса суаллахьхьун. Билаятрал 18 региондалия бувкIсса 70-ллихъайсса вакилтурал выставкалий ккаккан дунни цалла-цалла экспозициярду. Компаниярттал ккаккан дунни цалла дуккан дурмур, техника, материаллу, инвестициярдал ва цIушиннардал проектру.
Форумрай дунни цинярдагу 30-ннияр ххишаласса кьутIирду (контрактру). Форум банну бюджетрал арцу харж дурну дакъар.
Циванни инвестортал ва жулва къапаракьатсса региондалийн кIункIу тIутIисса тIисса суалданун жаваб дуллай, М. Мусаевлул бувсунни республикалул БакIчину Рамазан АьбдуллатIипов увкIун махъ иширттал негативсса информация лап чан хьуну душиву, мунияту вай махъсса 1,5 шинал мутталий инвестициярду республикалийн гьарзану дукIлакIи хьуну душиву.
Министрнал увкусса куццуй, республикалул строительствалул комплекс хьхьичIунмай хьун къабитлатисса дайшишруну хъанай дур административ дайшишру дуллалаву градостроительствалул документру, генпланну хIадур дуллалисса чIумал.
«Илчилул» вакилнал буллусса, ссан дацIлацIиссар Дагъусттаннай дуллалисса къатрал яла кьювкьумур квадрат метра тIисса суалданухьхьун, укунсса жаваб дуллунни М. Мусаевлул: «Дагъусттаннай къатрал квадрат метралул багьа хъанай бур 25, 450 азарда къуруш. Му багьа ккаккан бувссар Аьрасатнал Регионнал иширттал министерствалул. Амма хIакьинусса кьини дуллалисса къатрал квадрат метралул багьа личIи-личIисса хъанай бур – 20 азарда къурушрая тIайла хьуну, 50 азарда къурушрайн биянцIа».