ЧIярусса цайми-цаймигу акциярду дувайсса гидрокомпаниялул тIабиаьтран хасъсса, ялун нанисса ник му дуручлай тарбия дуллалисса акциярду хъунмур къулагъасралун ласайссар.

ХьхьичIра-хьхьичI «оБЕРЕГАй» экологиялул акция дурну дур 2005 шинал Нижегородскаллал ГЭС-рай. Жулла республикалий тIурча ва акция дуллай байбивхьуну бур 2007 шиная шинмай. Вай шиннардил мутталий укунсса журалул акциялувух гьуртту хьуссар Чир­кейннал, Гелбахуллал, Бавтугъайллал, Каспийскаллал ва УнцIукуллал райондалийсса цаппара щархъал школардал азарвахъул дуклаки оьрчIру. Утти­нин вайксса шиннардий дур­сса акциярдаву 25-нния ливчусса хъуни машинартту бувцIусса ччюрк дартIун дур.
Ва кьини сакин дурсса акциялувухгу гьурттушинна дунни Чиркейннал № 2 школалул лавайми классирттал дуклаки оьрчIал ва учительтурал. ЧчюрклицIа марцI дан бакIрайн ларсъсса бартхьхьирил зума ду­сса дия бигьалаган ва балугъру бугьан бучIайминнал язи бувгьусса кIану.
Субботник дайдишин хьхьичI филиалданул зузалтрал школалул хIаятраву кьюкьрайх бавцIусса оьрчIайх гидрокомпаниялул лишан дирхьусса футболкарду ва кьяпри бавчIуна, бувсуна оьрчIахь акциялул мурад­рая ва тIабиаьт дуруччаву инсаннал бурж бушиву. Мукунма гидроэнергетиктурал баян бувуна яла чIярусса цIинцI-ччюрк дартIминнан компаниялул чулухасса ххуйсса бахшишругу дулунтIишиву.
Бартхьхьирил зуманий оьрчIайх бавчIуна дарвагру ва катIри.
Цалва-цалва классирттан ккаккан бувсса кIанттурдая вайннал бавтIуна урчI-урчIва, ацI-ацIва дарвагру ччюрклил. Субботникрая махъ гидрокомпаниялул зузалтрал дуруна хъун дакъасса, щиная, тIабиаьтрая цIухлахисса викторинагу. Субботникравух чялишсса гьурттушинна дурминнан бахшишругу дуллуну, циняв оьрчIайх бавчIуна ххуй-ххуйсса луттирду.