Миллиардер Сулайман Керимовлун гъансса «Международный аэропорт Махачкала» ОАО ххув хьуссар МахIачкъалаллал аэропортрал хъус машай дуккан даврил конкурсрай. Июньдалул 6-нний Ростоврай хьусса аукциондалий байбихьулий ккаккан бувсса багьа бивкIссар 283, 484 млн. къурушру, ганил хъирив баян бувмур багьлий (297, 684 млн. къурушру) лавсъссар С. Керимовлул аэропорт. Сулайман Керимовлул МахIачкъалаллал «Уйташ» аэропортрай контроль буллай хьуссар 3-ннияр ххишаласса шинну, амма тай шиннардий актив тамансса кьювкьуссар.

Ташвиш­шиврул ахир
Аэропортрайн яла хъунмур тамахI бивхьума Сулайман Керимов ушиву кIул хьуссар 2010 шиналва, та чIумал Дагъусттаннал президент МахIаммадссалам МахIаммадов ивкIссар. Га рес­публикалул бакIчину итан Керимовлул тамансса хIарачат бувссар. 2011 шинал февральданий Росимуществалул ният диркIссар «Авиалинии Дагес­тана» ОАО-рал циняв акциярду даххан, та чIумал аэропортрал заллушиву дуллайгу бивкIссар гьаман Росимущество. Та чIумалсса компаниялул багьа бивкIссар 790 млн. къурушир­ттал, ганийн тамахI бивхьумигу Сулайман Керимовлул структурарду хIисав буллай бивкIссар, амма таний аукцион къавхьу­ссар.
Яла 3 шин ларгун махъ аэропорт миллиардернал хьу­ссар сайки шамлий кьювкьуну хьхьичIва-хьхьичIмур багьлуяр. Му мукун хьуссар 2011 шинал ахирданий «Авиалинии Дагестана» пассажиртал ххилансса ихтиярдануцIа шаврийн бувну. Компаниялул хъунмур доход халкь буххаврия хъанай диркIссар.
«Авиалинии Дагестана» РосавиациялучIа бивкIссар «лухIимур» сияхIраву, самолетру леххаврил кьяйдарду чIяруну лиян дуллай тIий. Мукунсса ца ишираву 2010 шинал декабрьданий «Домодедово» аэропортрай Дагъусттаннал ТУ-154 самолет­ран апатI хьуну бивкIссар. Компаниялул каялувчитурал кугьна хьусса самолетирттан кIанай цIусса ласунну тIий бивкIнугу, авиапарк цIубуккан къабувнува ливчIуна.
Ахирдангу дукIу сентябрьданий республикалул арбитражрал судрал компания банкрот хьушиву баян бувуна. Та чIумалнин аэропортрай чIявусса буржругу хьуна (2012 шинал кредитирттал буржру бия 443 млн. къурушир­ттал).
Уттигъанну Ростоврай хьусса аукциондалий машай буккан бунни аэропортрал 44 къатта ва 17 сооружение, арендалий ласун 28 гектар аьрщарал, аэропортрал кьай-кьуй, транспорт, оргтехника (цинярдагу сияхIрай диркIссар 1200-ннийн дирсса затру). Торграй ххув хьуминнал бакIрайн ласун аьркинссар 4 зурул мутталий аэропортрал давуртту дачин даврил хIакъиравусса сертификатру ласун.
Торграй диркIссар дурагу 2 заявка. Цалчинмур диркIссар «Международный аэропорт Махачкала» ОАО-рал чулуха. Га компания сияхIрайн ларсун дур 2012 шинал, ганил заллу хъанай бур Британиянал Виргиннал жазирардай сияхIрайн лавсъсса Доха инвест-менитс тIисса структура. Га компания Сулайман КеримовлучIан гъан­сса бур.
2012 шинал ахирданийгу, гьашину февральданийгу «Международный аэропорт Махачкала» ОАО-рахьхьун Федерал антимонополиялул къуллугърал ихтияр дуллуну дур аэропорт машан ласун.
КIилчинмур заявка дуллуну диркIссар «Северный морской путь» (ОАО «СМП Банк») тIисса уссурвал Аркадий ва Борис Ротербергхъал банкирал. Аукциондалий ххув хьунни Керимов, мунияту банк хъанай бия техникийсса гьурттучи.

Самолетру полосалух ялугьлай дур

Аэропортрал цIусса залуннал хьхьичIсса хъунмур масъала хъанай бур пассажиртал чIявуну буххаву. Ларгсса шинал хIасиллайн бувну, аэропортрал шинай 507 азара пассажир уцай­сса ивкIссар, ми хъанахъиссар 20% ххишаласса. Амма рынокрал чIалакъачIими каширду гьарзассар, Дагъусттаннай 3 млн. агьалинал бушивугу хIисавравун лавсун.
Пассажиртал чIявусса буцланшиврул аьркинни цинияргу хьхьичI цIусса самолетру дучIан дуван ва билетру кьюкьин буван. ЦIанасса ппурттуву Москавлия МахIачкъалалийнсса рейсру би­ттур дуллай бур 4 авиакомпаниялул. Майрал ахирданий баян бунни МахIачкъалалия лехлантIишиву «Аэросервис» авиакомпаниялул самолетру Минеральные Воды шагьрулул аэропортрайхчил. Компаниялул исполнительный директор Алексей Савченкол бакIрайн лавсунни самолетир­ттайнсса билетру кьюкьин бан.
ЦIанасса ппурттуву МахIач­къалалив цIусса авиакомпанияртту кIункIу баншиврул, аьркинну бур самолет гьаз шайсса ва ликкайсса полоса бакьин бан. Га полоса бакьин баврин хасъсса тендерданий ххув хьу­ссар компания «Мостоотряд – 99» ва компания буссар «Сумма» группалувун бухлай, ванил заллу хъанай ур миллиардер Зиявуттин МахIаммадов.
«Аэропорт зий буна, ганил даврихун къабахчилан, жун ччай бур реконструкция 4 зурувату къуртал дан. Ттул пикрилий, му жуща бюхъанссар», — увкунни «Дагстройэкспо – 2014» компаниялул директор Аьли ГьитIиновлул.
Рамазан МахIаммадов
Лаккунайн буцаву
ХI. Аьдиловлул