Майрал 15-нний щалагу билаятрай кIицI лагай Кулпатрал кьини. Гьарица шинах ва кьини цала аякьалулун лавсъсса кулпатирттан дакIний личIансса байран дувай Новостройрайсса ЗахIматсса тагьарданувусса кулпатирттан социал кумаг баврил центрданулгу.
А. Аьбдуллаева
П. Рамазанова
Вай гьантрайгу центрданул къат­раву хьунни хъуннасса шадлугъ. Шиккун оьвкуну бия Новостройрал щархъавасса чIявусса оьрчIру бусса 9 кулпатрайн. Шадлугърал мажлис бачин бувну бия центрданул психолог Милана Адамова. Ванил махъ буллунни центрданул хъунмур Аьби­дат Аьбдуллаевнахьхьун. Мунил кутIану бувсунни цIуминалийсса кулпатирттал ва оьрчIал масъалар­тту щаллу бан хIарачат буллай зузи­сса цила коллективрая ва миннал аякьалулун лавсъсса кулпатирттая.
— Ххирасса нинухърув! Кулпат­равусса гъилишиву, рахIатшиву, куннал куннахасса аякьа ва хIурмат зуятур хъар хъанахъисса. ЦIанасса заманнай чIявусса оьрчIру бу­сса кулпатирттан бигьану бакъар. Ми лащу-щаллу бан, дуккин бан, ххуйсса тарбиягу дуллуну тIайласса ххуллийн бичин хъунмасса захIмат бишин багьлай бур, хъуннасса ссавур аьркинну дур. Мюрщину бунува зу лахьхьин бувмур, зу дуллусса тарбия бусса оьрмулуву дучIи ляхълантIиссар зул оьрчIан. ХIакьинусса жагьилтурангу бигьану бакъар, дакI дачIинсса, захIматсса чIумал чIарав бацIансса, кумаг бансса хъуними чIарав бакъахьурча. Шайсса кумаг зунгу, зул оьрчIангу буван мудан хIадурссар жул зузалт. Кулпатрал кьини барча дуллай, на чIа тIий бура зул кулпатирттан нахIушиву, куннан кув бувчIлачIаву, талихI-тирхханну. Ххи хьуннав зул каши. Цавагу кулпатраву чан къахьуннав оьрчIал хъяхъавугу, хъатIал чIугу, — увкунни Аь. Аьбдуллаевнал цилва ихтилатраву.
Хъирив центрданул зузалтрал мажлисрайн оьвкусса ниттихъащал ва оьрчIащал бунни личIи-личIисса тIуркIурду ва бяст-ччаллу. Хъиннува хIазну лавгунни «Собери пословицу» тIисса, ведущийнал учалалул дайдихьу бувсун, ниттихъал къуртал бан багьлагьисса бяст-ччал, мукунма «Моя посуда» тIисса, цалла ичIурасса тIахIни-кIичIулун цIани буллалисса цIарду ляхъан дуллалисса тIуркIу.
Ниттихъащал бувкIсса мюрщи оьрчIал дурккунни назмурду, центрданул зузалтрал увкунни балайрду. Мажлис чIюлу бунни ЦIуссалакрал школалул дуклаки оьрчIал ккаккан дурсса къавтIавуртталгу. Ахирданий центрданул чулуха ниттихъан ва оьрчIан бахшишру дунни. Ни­ттихъалгу дакIнийхтунусса барчаллагь увкунни мудангу цала кулпатирттаха аякьалийсса центрданул зузалтрахь.
Мажлис къуртал хьуну махъ жу бувкру центрданул къатравух. ЖанахIравусса столданий дирхьуну дия центрданул аякьалулусса оьрчIал цалла карунних дурсса эмаратру ва дирхьусса суратру. Райондалий хьхьичIунсса кIанттурду бувгьуну, утти вай гьуртту хьун тIий бур «Детство яркая планета» тIисса республикалул конкурсраву. Му конкурсрайн вайннал 18 даву хIадур дурну дур.
— Умуд бур республикалулмур конкурсрайгу жула оьрчIал гьунардан лайкьсса кьимат бищун­ссар, миккугу жува хьхьичIунсса кIанттурду бугьанссар тIисса, — тIий бур Аьбидат Аьбдуллаевна.