Гай дия захIматсса дяъвилул шинну. Шярава аьрайн лавгун бия ттуршунния ливчусса арамтал. Миннавух хушрай дяъвилийн лавгун бия школалул учительталгу. Шяраву ливчIун ия увагу кIия учитель: Исрапилов МухIуттин ва Даккаев ХIанапи.

«Учительталгу лякъи, школагу зузи бува», — куну, Исрапилов МухIуттиннуйн тапшур бувну бия ЧIарттал арулла шинал школа. Му бигьасса иш бакъахьунссия къизгъинсса дяъвилул шиннардий. Амма МухIуттиннул му даву бакIрайн ларсуна.
МухIуттин цувама ия 1939-ку шиналсса финнащалсса дяъвилул гьурттучи, оьрмулул 23 шинаву мунал дяъвилий ччанну лигьулул хьуну, цIуллу-сагъшиврул ссуссукьуну ия. Мунийн бувну 1941 шинал фронтрайнгу къаувцуну ия.
Мунан цайвасса буржнугу чIалай бия школа учительтурал щаллу баву. Цалва чурххал хIалданух къаурувгун, МухIуттин лавгуна щархъайх. Щархъавугу вара тагьар. Ми шиннардий Гъумук бивкIсса педучилищавулувун увххун МухIуттин, мунил директор Дандамаев АьбдулкьадирдучIан, миннат бувну бур 2-3-ми курсирдаву дуклакисса цаппара оьрчIру-душру, заочнайну кIурабаен бувну, учительталну тIайла буккаву. Дандамаевлун чIалай школардал тагьар, бавтIун жагьилтал, хушрай гьан ччими тIайла бувккун бур. ЧIарттал шяравун бувкIун бур Ккурклияту­сса Гъужиева Умрагьим, Кьурбан-ПатIимат, Пачабутта-ПатIима, Пирдавс, ГьунчIукьатIатусса Зури ва Ситтикьат. Укун МухIуттиннул школа зузи бансса тагьар ляркъуну дур. Ми шиннардий ЧIарттал арулла шинал школалий дуклай бивкIун бур 200-250 оьрчI ва душ.
МухIуттин хъинну даврих гъира бусса, оьрчIру ххирасса учитель ия. Гай захIматсса шиннардий МухIуттиннул хIарачатрайну, колхозрал кумаграйну школалий дук­лакисса ятинтуран, аьрайн лавг­миннал оьрчIан ахттайнсса дуллай бивкIссар.
МухIуттин хIал бавкьусса, иминсса ва пасихIсса мазрал усттар икIайва. Мунал ихтилатрал инсан рахIат айва. Шяравусса агьалинаву ванал сий гьаз хьуну дия: шяраваллил багьу-бизулуву, жяматийсса иширттаву мудан ия ва. Мунихлунугу бухьунссия ванайн партиялулгу вихшала дирхьуну, шяраваллил парторгнугу икIайва.
Ттун дакIний бур ванал ттунма бувсса кумаг. На шяраваллил почтальонну зун ивкIссара кIива класс къуртал бувния махъ. Ттун чичайва 6 захIматрал кьини. Мунал правлениялий бивхьуну му масъала, ттун 8 захIматрал кьини дурна. Ттул даврия рязийну бикIайва щарнил жямат, пучрал начальник Магьдиев Шяпигу. МухIуттиннул райондалий ттуяту ихтилат бувну, 1945 шинал майрал 9-нний ттун дуллуна ВЦСПС-рал «Отличник-почтальон» тIисса лишан ва къалмуйнусса бахшиш.
Бакъая шяраву къатта МухIу­ттиннул мукъуйну ягу иширайну кумаг къабувсса. ЖучIату лавгун махъ ххаллилсса ва бюхъу бусса учитель зий уссия цала бу­ттал шяраву Шахьував, Карашав ва цайми кIанттурдай. МухIуттиннул цалва оьрму халкьуннан хъинбаларду буллай, бусравну бувтссар.
Мухтар МахIаммадов
ш. ЧIaр