ГЪАЗИМАХIАММАДЛУЛ АРС ХАЙДАКЬОВ СЕРГО
Майрал 25-нний, оьрмулул 77 шинаву, дунияллия лавгунни жуна цинявннан ххуйну кIулсса, дакI-аьмал хъинсса, инсантуращал хIал бавкьусса, Лакрал театрданул артист Хайдакьов Серго.
Серго 50-лла шинай артистшиву дуллай зий ия жула театрдануву. Мунал даврин лавайсса кьимат бивщуну, 1996 шинал дуллуна «Дагъусттаннал лайкь хьусса артист» тIисса цIа.
Серго Хайдакьов увну ур апрельданул 18-нний 1937-ку шинал Гъумук. 1955 шинал Гъумучиял дянивмур даражалул школагу къуртал бувну, аьралий къуллугърал буржгу лавхъун, увххун ур Москавливсса Б. Щукиннул цIанийсса лаваймур театрданул училищалувун, Лакрал театрданунсса студиялувун. 1964-ку шинал училищагу ЯтIул дипломращал къуртал бувну, Серго зун ивкIун ур Лакрал театрданул артистну. 1966-1970-ку шиннардий зий ивкIун ур театрданул директорну. Ванан хъинну ххирая цалла давугу, театргу, хIурматрай икIайва артистурачIагу, театрданул бакI дургьуминначIагу. Гьарца цIуну бихьлахьисса пьесалуву гьуртту хьун гъирарай икIайва, дугьлагьисса роллугу хъинну вив увххун, хъирив лавну, гьарца чулуха дакьин дурну, куртIну чIалачIи дайва цалва геройтурал хасиятру, сипатру, аьмал ва багьу-бизу.
Даврия лирчIмур чIунгу Сергол оьнна гьан къадайва тачIав, макьалардугу чичайва артистурая. Мунал итабавкьунни кIива-шанма шеърирдал, ссигърал, учаларттал ва лакрал халкьуннал магьри бавтIсса луттирду. Театрданул бивхьунни Серго Хайдакьовлул чивчусса ва ванал цайми мазурдия таржума бувсса пьесарду. Ва ия хIакьсса зузала, давугу ххирасса, хIарачатрай зузисса, халкьгу, буттал улчагу ххирасса инсан. Лакрал театрданул тамашачитуран дакIний дуссар Серго Хайдакьовлул дургьусса личIи-личIисса роллу. Театрданул артистурангу, шиву зузиминнангу дакIния къауккантIиссар ххаллилсса зузала, хIалимсса инсан, ххуйсса дус, лаккучу, Хайдакьхъал ГъазимахIаммадлул арс Серго.
ДакIнийхтуну кIидачIлай буру ванал кулпатрахь, оьрчIахь, гъан-маччанахь Серго дунияллия лагаврил кьурчIишиву. Алжаннул ххари аннав, рухI бигьаний дишиннав.
Лакрал театр
********************************************
Щалва оьрму Лакрал театрдануцIун бавхIусса инсан, бюхъу ххисса артист, патриот,
ГъазимахIаммадлул арс Хайдакьов Серго
аьпалухьхьун лагаврил къумашивугу кIидачIлай, дакIнийхтунусса жижара буллай буру ванал щалвагу агьлу-авладрахь.
Сергол бунагьирттал аьпа баннав, имандалий лавгун хьуннав. Махънал оьрмурдай барачат бишиннав!
«Илчи» кказитрал коллектив
********************************************
РАМАЗАННУЛ АРС МАХIТIИЕВ МАХIАММАД
Май зурул 12-нний оьрмулул 84 шинаву жуятува личIи унни яхI-намусрал увччусса, ххаллилсса лаккучу, захIматрал ветеран, 1-мур ЦIувкIратусса МахIтIиев МахIаммад Рамазаннул арс.
МахIаммад увну ур 1930 шинал 1-мур ЦIувкIрав, 4 классгу къуртал бувну лавгун ур яттихIухчуну. Аьрали бурж биттур бувну махъгу буттал шяравун зана хьуну ур, зий ивкIун ур хъунхIухчунугу. ЗахIмат ххирасса, яттил хIал хъинну кIулсса МахIаммад цимилагу лайкь хьуну ур райондалул хъуниминнал ва ДР-лул Шяраваллил хозяйствалул министерствалул цIаниятусса ХIурматрал грамотардан. Дур ванал Дагъусттаннал Верховный Советрал чулухасса грамотардугу, «Социалист захIматрал Виричу» тIисса хIурматрал лишаннугу.
МахIтIихъал МахIаммад цIанихсса захIматчи акъагу, шяраваллил жямат ххирасса, инсантуращал хIал бавкьусса, дакI-аьмал хъинсса инсан ия. Му дунияллия лагаврил кьурчIишиву кIидачIлай, жижара буллай буру мунал кулпатрахь Асиятлухь, арсурваврахь Маликлухь ва Максимлухь, ссихь ПатIимахь, арсурваврал наслулухь, гъан-маччацириннахь.
МахIаммадлул рухI бигьаний дишиннав, цув Алжаннул ххари уваннав.
1-мур ЦIувкIуллал жямат
**********************************************
КьурчIисса баян баву
Июньдалул 3-нний, кIира шанна шинал мутталий ххарарххусса захIматсса азаруннищал талайгу ивкIун, оьрмулул 77 шинаву аьпалул хьунни ххаллилминнавугу ххаллилсса ва язисса миллатрал арс, билаятрайх цIаларгсса строитель, вай махъсса ччанарккусса ва оьлуркъусса 20 шинал мутталий уххаву дакъа ва бусравну лакралгу, щалва Дагъусттанналгу дард-буруккинттаралсса, хIал-ахIвалданулсса буллай, ка щяв къадирхьусса, чIявусса ккавксса ва ккаклакисса лакрал миллатрал, цал «Гъази-Гъумучи» суккушиндарал, яла Культуралул автономиялул (ЛНКА-лул) Хъунисриннал советрал бакIчи Аттаев МахIаммад АьвдурахIманнул арс.
Жуна цинявннан ххирасса ва бусравсса Мукьардал Аттаевлуяту учинссагу, бусланссагу затру чIявур. Миннуй бацIанну кказит-журналлал хъиривми номердай.
Мунияту цалсса, ва анавархъиндарайсса баян бавриву, дакIнийхтуну жижара буллай, МахIаммад жуятува лагаврил кьурчIишиву кIидачIлай буру мунал ххирасса, буттан цIасса арснахь АьвдурахIманнухь, душварахь, миннал наслулухь, Мукьардал жяматрахь ва щалва лакрал агьулданухь. Аьпа баннав цал, гьав нурданул дуцIиннав.
Лакрал КНА-лул Советрал ва Хъунисриннал советрал цIанияту Киров Султанов
**********************************************
ЗахIматсса цIуцIаврища ххассал къавхьуну, уттигъанну ахиратравун лавгунни, 2 мюрщисса оьрчIгу махъ кьабивтун, 2-мур ЦIувкIуллал шяравасса, дурагу 30 шин оьрмулул хьусса жагьил,
Мутал арс Сабир СалихIов
Жу, Сабирдул мачча-гъанми, 2-мур ЦIувкIуллал, Ккуллал, Ваччиял жямат, кьурчIишиву кIидачIлай буру ванал кулпат СалихIова Шавлухълухь, гъан-маччанахь, уссу-ссурваврахь.
ХIакинтурал аьйявав,
Аллагьнал чичруявав,
Ххирай, вил жагьил оьрму,
Ххассал буван къавхьусса.
Яраппий, я Аллагь, ванан къабуллумур ванал кулпатран, оьрчIан булуннав. РухI кIукIлуний хьуннав. АллагьначIан гъанну хьуну лякъиннав ванал рухIгу. Аьпа буваннав.
