Дуклаки оьрчIал гьунардал фестиваль

e_9Майрал 15-нний Новостройрайсса ЦIуссалакрал школалий «Грани познания – 2014» тIисса цIанилу дуклаки оьрчIал проектирдал фестиваль дия.

Ва райондалул лагрулийсса фестиваль дия, ЦIуминалийсса циняв школардал дуклаки оьрчIру гьуртту хъанай бия. ЦIуссалакрал школа дуклаки оьрчIал проектирдал гьану бивзсса, хъиндайдихьу дурсса школа бур. 2007 шиная шинмай дуклаки оьрчIру, личIи-личIисса темарду язи дургьуну, рефератру, проектру чичлай бур. Гьар шинах школалий учительтал, дуклаки оьрчIру ва нитти-буттахъул бавтIсса залдануву оьрчIал цалла давурттив дуккайсса дур. Ва даву ххуй дирзун, гьашинумур фестиваль райондалул лагрулий дуван хIукму хьуну бур школалул дирекциялун, КIулшиву дулаврил управлениялулгу миннацIун кабакьу бувну бур.
Актовый залдануву хьхьичI­расса шиннардийсса язи-язими проектирдал выставкагу дия.
Фестивальданул сценарийлул авторгу, хъунмур хъар ларсмургу бия ЦIуссалакрал школалул директорнал хъиривчу ХIажиметова Мариян.
Фестивальданул жюрилуву бия райондалул КIулшиву дулаврил управлениялул хъунаманал хъиривчу Акаева Малика (председатель), методист Кьурбанова Банавша, инспектор ХIасанова Светлана, ЦIуссалакрал школалул завуч, ялув кIицI лавгсса ХIажиметова Мариян, ДучIиннал школалул директор Шуаьева Бахттун.
Фестивальданул дайдихьу дуллалисса ихтилат буллай, ЦIуссалакрал 2-мур школалул директор Султанова Светланал увкунни: «Махъсса шиннардий хъунисса дахханашивуртту хъанай дур КIулшиву дулаврил сфералуву. Билаятрал интеллектрал потенциал хьхьичIунмай баву, гьунар бусса, итххявхсса дуклаки оьрчIан кабакьавур кIулшиву дулаврил агьамми масъалартту. Мукуннасса хъуннасса къула­гъас дур цIусса стандартирттах. ЦIусса стандартирттавун дагьлагьиссар проектиртталмур даву. ОьрчIан, цалла тема язи дургьуну, проектру чичлачаврийну цанма хайр-мюнпат хъунмассар, аькьлу итххяххан, куртIну пикри буван лахьхьин буллалиссар, кIулшивуртту цIакь дуллали­ссар. Мунияту жул школалий мудангу хъуннасса къулагъас дуссар оьрчIру проектру чичлачи баврих. Ва даврил сиптачигу гъира-шавкь дусса завуч Мариян Буттаевнар.
Ттуву хъуннасса ххаришиву дур жулва школалийн Новостройрайсса циняв школардаясса дуклаки оьрчIру, учительтал бавтIун тIий. Умудгу бур ва фестиваль аьдатравун дагьанссар тIисса».
Светлана Ибрагьимовнал хъирив дуклаки оьрчIру барча бувна завуч Мариян Буттаевналгу. Дуклаки оьрчIал проектир­ттал цIардуми жура-журасса дия: ЦIуссаккуллал №2 школалул 4-мур классраву дуклакисса Базманов Арсеннул «Ирс-ххазина» тIисса проект дия, Шушиннал школалул дуклаки оьрчIал «Животный мир Каспийского моря» дия, Аьхъардал школалул 3-мур классрал оьрчIалмур проект дия «Пернатые друзья» тIисса. ХIасил, жура-журасса темарду аьч дуллалисса проектру дия.
Жюрилул председатель Акаева Маликалгу бувсунни оьрчIру укунсса проектирдаха зузи баву – ттизаманнул образованиялул тIалавшинна душиву, оьрчIал цукун-дунугу тема ххалдигьлагьини цIусса затру лахьхьаврицIун, миннаву жаваблушинна ххи дуллалишиву, цала учин ччимур пасихIну, бувчIинну учин лахьхьин буллалишиву, оьрчIру гьарцагу чулуха итххяххан буллалишиву.
Проектирдал фестиваль чара бакъа аьдатравун дагьан­тIишиврийсса хьул-умуд бушив­рия бия рязисса нитти-бутта­хъалми ихтилатругу.