Дагъусттаннал хъунма-хъунмур санитарный духтур, ДР-лул Роспотребнадзорданул управлениялул каялувчи Элеонора Оьмариевал чирчуну дур
гьашину гъинтнил чIумал пляжирттай санитар-эпидемиологиялул тагьар лайкьсса даражалийн дуцин аьркиншиврул хIакъиравусса предписание.
ХIасан Аьдилов
Апрель ва майр зурдардий Роспотребнадзорданул пляжирттая хьхьирил щинал 250 проба лавсун щин ххал дурну дур. Чапалну ляркъуну дур 100-вагу процентрал, хаснува МахIачкъалаллал пляжрачIасса хьхьирил щин. Гиккусса щин гигиеналул тIалавшиннацIун дакьлай дакъар, микробиологиялул ккаккиярттан хасну.
Халкь хьхьирийн заназаврил чIун дучIан хьхьичIра, ххюттукалул азарду сукку къахьуншиврул, Роспотребнадзорданул ихтияр къадуллуну дур пляжру тIитIин, ми марцI баврин хасъсса давуртту къадурссаксса.
Предписаниялий ккаккан бувсса куццуй, МахIачкъалаливсса пляжирттал щин санитар-химиялул ккаккиярттайн бувну, гигиеналул нормативирттацIун даркьуну дакъар 33,3 процентрал, микробиологиялул ккаккиярттал чулуха тIурча – 76,9 процентрал. Му бакъассагу, пляжру ва бигьалагайсса зонарду марцIну бакъар, пляжрая махъ щинавун бучIайсса (душевые кабины) кIанттурду, хIажатханартту санитар- кьяйдардацIун бавкьуну бакъар.
Исполнительный властьрал органнал каялувчитурайн, кIанттул цилакаялувшиврул органнайн, ишбажаранчитурайн тапшур бувну инсантал бигьалагайсса, щинавун бучIайсса кIанттурду гъинтнил чIумалнин марцI бувну, аьркинсса кьай-кьуйрал щаллу бувну хIадур бан. Дукра дукайсса, дуки-хIачIия даххайсса кIанттурду марцIну ябан, санитар кьяйдарду дуручлан.
