Дагъусттаннал БакIчи хьунаавкьунни Лакрал райондалул каялувчинащал

saj_7Июньдалул 18-нний Дагъусттаннал БакIчи Рамазан АьбдуллатIипов хьунаавкьунни Лакрал ва Тарумовкаллал районнал каялувчитуращал. Хьунабакьаврил мурад бия районнал социал-экономикалул тагьарданущал, маэшатращал кIул шаву.

Дагъусттаннал БакIчинал увкусса куццуй, Лакрал район хъанахъиссар «Дагъусттан сакин баврил» (дагестанообразующим) районну, яни тарихрал гьануну хъанахъимурну. Дянивну лавсъсса Лакрал райондалул агьалинал аьдад дур 12 азара инсан. Муниципалитет­рай дур 50 шяравалу, ми цачIун дурну дур 19 муниципал сакиншинналувун. Лакрал райондалул бакIчи Юсуп МахIаммадовлул бувсъсса куццуй, райондалул каялувчитал гьарца зурух лагайссар шяраваллавун, дайссар аьркинсса тапшур бавуртту ва маслихIатру. Мунийн бувну чан хьуну бур шяраваллал инсантурал чулухасса аьрзарду ва чагъарду.
Юсуп МахIаммадовлул Республикалул БакIчинахь бувсунни шяраваллил хозяйствалул тагьардания, га райондалул экономикалул агьаммур бутIа хъанайгу бухьувкун: 2013 шинал дугьайсса хъуруннил дур 5 азаллий 200 гектар, амма, щин дишайсса архру уругала акъа лирчIун тIий, хIакьину гъай тIий бур 2,7 азарда гектар.
Райондалул каялувчинал мукунма бувсунни основной капиталданувунсса инвестициярдал лагру хъанай душиву 2013 шинал 415,5 млн. къурушру, яни ккаккан дурсса планданул 113,6%. КIанттул бюджетрал арцух бувну бакIуйн буккан бувну бур 2 ФАП, ми зунтIиссар чIал къавхьуну.
Райондалул хъуншяравалу щинал щаллу даншиврул бивхьуну бур 3,5 километра бургъурдал, мунийну ва райондалиясса цивппа заллусса инвестортурал арцу аьркин дурну, бювхъуну бур щинал щаллу дуван Читтурдал, КIулушацIрал, ТIулизуннал, ГьукIурдал, ЧIурттащиял ва Ххюлуссуннал шяраваллал жяматру. Цува заллусса инвесторнал арцух Гъумук буллай бур шадлугъру дайсса зал, 30 инсаннансса гостиницагу, хIаммамгу ганицIунма бувну. Мукунма цивппа заллусса инвестортурал арцух буллан тIий бур Хъуннеххай кIива чIиви ГЭС.
Юсуп МахIаммадовлул мукунма бувсунни «Иниша» СПК-лий бувну бушиву 150 лухIи гъаттарансса ризкьилул комплекс, «Искра» СПК-лий – иникIмалул цех, Ххюлуссуннал шяраву буллай бушиву накIлил продукция дайсса цех, Буршиял шяраву дуллай бушиву форель чавахъру лургъи байсса хозяйство. ХIадур дурну дур нис дайсса, дикIул продукт­ру дайсса, ахънилссаннул консервартту дай­сса инвестициярдал проектру. БахIикIуллал ва Буршиял шяраваллаву бан най бур бигьалагайсса ва туризмалул базарду.
Хъирив ихтилат буллай, Рамазан АьбдуллатIиповлул бувсунни Лакрал райондалул бакIчи – ца яла цайвамур тIайлану бартбигьайсса каялувчи ушиву. Амма муницIунма республикалул бакIчинал бувсунни цува рязи акъа ушиву налогру датIаврил тагьардания.
«Лак муданма чIиримур бизнесрай дуланмагъ хъанай бивкIссар, цалва предприятияртту буллай бивкIссар. ХIакьину зузисса усру дайсса цехирдан аьркин­ссар кьутIирду дуван, масалдаран, оьрчIал садикирттащал, реабилитациярдал идарарттащал, тиккусса оьрчIан усру дулланшиврул. Зун аьркинссар чялишну. Налогру чанну датIлай буру. Аьркинсса даражалий сакин дурну дакъар аьрщи ижаралий дулаву. Жува зун аьркинссару цачIарасса луртанну ишла дуллай», — увкунни Рамазан АьбдуллатIиповлул.
Хьунабакьаврий гьаз бунни уттинин къуртал къабувнасса райондалул азарханалул масъалагу. Мукунма ихтилат хьунни цаппара районнал цачIусса сосудистый хирургиялул отделениегу тIитIаврил хIакъираву.
ХIадур бувссар
ХI. Аьдиловлул