Май зурул 28-нний «Надежда» тIисса республикалул оьрчIансса реабилитациялул центрданийгу хьунни ОьрчIру буруччаврил кьинилун хас дурсса мероприятие. Мунил сиптачитал бия педагогтал ва тарбиячитал. Байрандалий чялишну гьуртту хьунни реабилитациялул курс буллалисса, цIуллу-сагъшиврул ссуссукьусса оьрчIру. Ми шеърирду ккалай, балайрду тIий, къавтIий, асфальтрай суратру дихьлай бия. ОьрчIал байран хъун дан, ми бялахъан бан бувкIун бия «Ссалам» ансамбльданул къавтIалтгу, «Джуманджи» тIисса оьрчIал клубравасса клоунталгу. ОьрчIру ххарину, тяхъану бия, байрандалия хIаз ласлай бия. Шиккура хьуна оьрчIал каруннил давурттал выставкагу.
П. Рамазанова
«Надежда» центрданий каялувшиву дуллалисса Ханбалаев Маратлул увкунни: «Жу дакIнийхтуну ххарину буру инжитсса, цIуллу-сагъшиврул ссуссукьусса оьрчIал ва миннал нитти-буттахъал дардирал чIарах буккан къаччисса, миннай буниялттунгу дакIцIуцIаву дусса инсантал жуцIунма кабакьлай, чIарав бацIлай бушиврия. Мудангу медициналул, реабилитациялул ка-кумаг аьркинсса оьрчIах дагьайкунсса къулагъас дуван хIарачат булларчагу, уку-укунсса мероприятиярду ва байранну жущаралу дан захIмат шаванссия, барчаллагьри чIарав бацIайминнан».
Марат Исамуттинович щалвагу коллективрал цIанияту барчаллагьрай ур байрандалул спонсоршиву дурсса уздансса лаккучунайн, ООО «Норма» ООО-лул гендиректор Кьурбанов Камалуттиннуйн. Мукунма барчаллагьрай ур «Ссалам» ансамбль байрандалийн гьан дурсса, МахIачкъалаллал ОьрчIал творчествалул къатлул коллективрайн.
Бусан ливчIунни «Надежда» центрданий зузисса медициналул зузалт М. Султановлул ва М. Бабатовалгу кIукIлу игрушкарду ва нацIу-кьацIу ларсун оьрчIру ххари бувшивугу.
