Школалияр ххишала дуклаки оьрчIру тарбия буллалисса цайми идарартту дакъахьувкун, цалва оьрчIал бучIантIимунил ялув буруккинттарайсса нитти-буттахъал биялсса хIарачат бур дарсирдая махъ оьрчIру ссахун-бунугу машхул буван, личIи-личIисса секциярдайн, кружокирдайн занази буван.

«Илчи» цIуницIа дунияллийн бувкния шинмай миллатрал кказитрай зузисса жул коллега, Ккурккуллал шяравасса Андриана Аьбдуллаевал ва низам дуруччай структуралий зузисса, Бархъаратусса Мисриханов Аьлил цалвами арсругу спортрахун бивчуну бушиву, миннал личIи-личIисса турнирдай, чемпионатирттай хьхьичIунсса кIанттурду бугьайшиву хьхьичIвагу кIулссия жун. Миннал чIивима арснан Артурдун гьашинусса шингу спортрал иширттаву личIинура тIайлабацIу бусса дия.
ПатIимат Рамазанова
Артурдул МахIачкъалаллал №28 школалул 9 класс къуртал бувссар гьашину. Къурталгу був­ссар хъинсса бахшишращал:
уттигъанну Ростов-на-Дону шагьрулий хьусса аьдатрайсса (традиционный) ушулул щалвагу Аьрасатнал соревнованиярдай кIилийнусса ххувшаву ларсун.
Лэйтай тIисса спортрал журалуву Артур Мисрихановлул 1-мур кIану бувгьуну бур, шуайцзяо тIимуниву – 2-мур кIану.
Аьрасатнал традиционный ушурал Федерациялул Артурдун дипломгу, медальгу дуллуну дур. Миккура дуллуну дур спорт­рал мастер хьунсса кандидатнал цIагу.
Ва ххувшавугу, спортрал мастер хьунсса кандидатнал цIагу Артурдул шанна-мукьра шинал лажиндарайсса гьар кьини­сса тренировкардал хIасиллур. Гьай-гьай, ванал тренертурал Исмяил АьвдурахIимовлул ва Аьлихан Каирбековлул биялагу къачIивиссар. «Традиционный ушу язи дургьуна Артурдул дарсирдая махъ тренировкардайн занан къулайшиву дуну, школа чIаравва буну. ХIарачат буллан икIай тренировкарду лях гьан къаритан, личIину жущал кьатIуввагу уккан ччан къабикIай, «ттул тренировкарду дуссар» тIий, гъира буну занай ия, ххувшавурттал мунаву шавкь ххи дуллай дия», — тIий бур Андриана.
Ххувшавурттуми чIава чемпионнал ххуржинттаву диялсса дур. Гьашину МахIачкъалаллал администрациялул сипталийну дурсса, шагьрулул ушу-саньдалул турнирданийгу Артур Мисрихановлул 1-мур кIану бувгьуну бур. Ларгсса шинал Майкопрай хьусса Аьрасатнал традиционный ушулул чемпионатрайгу 1-мур кIану бувгьуну бур.
Республикалул кик-боксинграл первенствалий ххув хьусса Артурдун Дагъусттаннал физкультуралул ва спортрал министр М. МахIаммадовлул къулбасращал­сса диплом буллуну бур. Мукунма ларгсса шинал хьусса ушу-саньдалул «Лига легион» турнирданийгу 1-мур кIану бувгьуну бур. Учительталгу, нитти-буттахъулгу, гъан-маччациригу пахрулувун бутансса ххувшавуртту цимил ласурчагу, Артур Мисриханов цаятура цIа дарча ламусравун агьлагьисса, ххаллил акъасса, хьхьичIун урувгсса чIава жагьил ур. Ххаллил акъашивугу – хIакьсса спортсменнал хасиятри.
Ххувшавурттайнсса хъитли­цIун ххаллил акъашивугу дуллуну дур мунан тIабиаьтралгу, Занналгу.
ДакIнийхтуну барча уллай буру чIава чемпион Артур Мисриханов Аьрасатнал соревнованиялий 1-мур кIану бугьаврищал.
Дунияллул чемпионнал цIа ласунсса цIуллушивугу, кьудратгу, бюхъугу чIа тIий буру вин, Артур Мисриханов!