Адабиятрал лажин

l_2Лакрал литературалуву ХIасан КIуруховлул цIа цIакь хьуну дур ччянира, чирчуну дур чIумул лажиндарай ца сий ххину.
Ванал цалчинсса шеърирду чивун бувккун бур арулцIалкусса шиннардийва, «Дусшиву» альманахрай. Муния махъ дунияллийн бувккун бур ряхва лу – мукьва ниттил мазрайсса, кIива оьрус мазрайсса: «Банавшасса дучри» (1983), «ЦIурттал ссурулккуртта» (1987), «Чаннал ва цIаннал дазуй» (1989), «ЧIурду ва лишанну» (2010), «Очищение огнем» (Москва, 1988), «Час аксиом» (Москва, 1989).

ХIакьинуссагу, гьунттийссагу лакрал литературалуву шаэр ХIасан КIуруховлул цIа личIантIиссар жард къаувкуну, личIантIиссар чIярусса цайми къалирчIун махъгу, ванал кIунттила ва кIулшилува бувкмур мяйжаннугусса поэзия буну тIий, мукъулгу усттар, образралгу магьир уну тIий.
Вай гьантрай ХIасан КIурухов ниттил увну там хъанахъиссар 60 шин. Барча тIий буру ХIасаннухь му хъуннасса Кьини. ЧIа тIий буру, ччясса чIумул мутталий чурххава цIуцIавугу дурккун, вила дустурачIан ва даврил уртакьтурачIан зана шаву, ази лагаву!

l_3

 

 

 

 

 

 

ХIасан КIУРУХОВ

* * *
Оьмал-БакIул бакIрая
Уруганна лагмава,
Увччу хьуннин хIачIанна
ШамратIаясса гьава.

Майдан Вихьулла арийх
Цал ттигу ябитанна,
МурцIуиттав кьюрчусса
Макьгу личин ританна.

Ттун ватан ххирассар тIий,
Ганз къабулланна хъуру,
Ххирар тIий, ххяхха буклай
КъабивкIссар буттахъулгу.

Амма диркIссар гайннаву
Хъит-шит чансса чувшиву.
Хъуни махъру къабуслай
Яхъанансса хъуншиву.

Азардахъул шиннардий
Хъун дурссар гайннал Ватан,
Шайвавли жущарагу
Гайннал кьариртмур ядан?

Вана Вихьуллал щарнийн
Бургъил тIинтту зизавай,
Нава шикку лявхъусса
Щукру хъунасса Заннайн!
БЯХЪЛАЙ БУР УЛЧА…
Руслан Башаевлущал къахъну
шахьлахьийни загьир хьусса асарду

Гъан хъанай, лахъ хъанай бур
Ссавний кьурукьрал кьур-кьур,
Ссаллив буруккинттарай
Пахъ багьну бур Лахъи къур.

Сив-сив тIисса гъаралу
Бяхълай бур Буттал улча…
Ачу, дус, та кьунттулу
Ликказан дуваннуча.

Бизанну жула кIункIур,
Бярал пущу-пуркIулий,
Ссутнил ссят кьутIа тIий дур
Жула оьрмулул хьулийн.

ДакIруми дур хъит-шитлий,
Ссутнийн, мютIий хьун къаччай…
– Ми кьурчIисса хIачIия
РутIала жунна, маччай!

Ттуйнгу, тай барзунттайнгу
Хъинсса бияннав уча,
Сив-сив тIисса гъаралу
Бяхълай бур Буттал улча…

Гьарай, вил пашманшиву,
Кьянатсса Буттал аьрщий,
Цумур ххуллул дуланттух
Бяйкьуривав вил арши?

Мудан вих ябивтукун
Иттав аьтIаву кьючай,
Хъин къашай азар кунма
Жун нясив бувсса улчай!

Арх хъанай, бухлаглай бур
Ссавний кьурукьрал кьур-кьур,
ЦIими хьунну щив-щив тIий,
Щаран бикIлай бур кIункIур.

Ттурлу ва цIан татлай дур
Барзунттай ва хъачI-мачIай,
Ми кьурчIисса хIачIия
Дуривкьай ттигу, маччай?

Духьурча, ца буцIала
Хханхха цIунцIу тIий бурча!
Сив-сив тIисса гъаралу
Бяхълай бур Буттал улча…

* * *
Къурагъшиву дагьсса гъинтнил кьинирдай
Оьттул ранг гьарза шай лагабургъиву.
Вас-ццахлил такьвалий гьарай тIун дикIай,
Зяй-зяй тIий дарусса ссавнил ччергъилу.

Ххябувккунни бургъил кьинилул хханхха,
Тур кунма хьхьев тIий бур кIирисса марчгу.
Чувнал иттав бувкIсса
мукьал кIунтI хханссар
Чятир-БакIул чIаврай пар тIисса занчгу.

Хъару дирчуну бур бюхттулсса Щуну,
Жюржу тIий дур жартгу лап мугъаятну…
Заманалул хъапа хъазамрайн щуну
ОьлицIал хъанай бур ттул билаятгу.

ДакI лахъи дува, дус, хьхьара хьунтIиссар
ЦIухъахъисса бургъил цIиникьрал хъапру,
Жула аьрщарайхгу ках-шах тIунтIиссар
РахIматращал дуркIсса дюхлулул хъатру.

ЛачIунтIиссар гъарал, сивсусса гъарал,
Хъавту аьрщарал янхь дунъяллийх бишлай.
Гъарал ххуй бантIиссар ва Лакку дара
Ссурулккуртлул рангру лагмара личлай.

БищунтIиссар яла жагьилсса буран,
ДакIру чанна дуллай, дус, вилгу, ттулгу,
Заманалул иттав лахъния бурган
Хъару тIитIинтIиссар Щуну-Зунттулгу.

ЛипI-липI тIутIи бувну мусил байрахъру,
БацIантIиссар вирттал дастта-дасттардай!
Буттахъал балайгу гьаз бувну лахъну
Ссапар бахIинтIиссар чувшиврул ардайн.

Ххувшаву хъиривсса талатавриву
ЦIунил гьаз хьунтIиссар ватандалул цIа,
Бюхъу цачIун бувсса хIарачатраву
МарцI бантIиссар улча кьадаршивруцIа!

* * *
Марч бивщукун байбишай
Мурхьирдал аьлагъужа,
МаркIачIан бувксса барзгу –
ДакI хъинсса лакку къужа.

Пахъ дагьну дур ттул щаргу
Щуну-зунттул щутталу,
Шярава хъун ххуллугу
Ливхъун най бур уттану.

ЩяивкIун ура, дакIгу
БарзунттацIун дарзуну,
Цимигу шинай дуллай,
Къуртал къархьу ларзулу.

Яхъанан кьаст дуссия
Вихьлив, буттал къатлуву –
Ттул кьастру лув лирчIунни
КIусса чIумул къатлилу.

Бакъачулинмай хьунни
Ттул оьрмулул хьулурду,
Дунъяллул вайварттаву
Бяйкьунни ттул ххуллурду.

Алвагь дакIнил асарду
Ири-иривнайх бачIав,
КъабучIимунил кIичIу
НахIала буллай хIачIав.

Тти гьахьуну бур дакIнин
Оьрмулул аьлагъужа,
Шавай ур ттуявагу
Иминсса лакку къужа.

Амма акъара хIайп тIий
Оьван бувтсса оьрмулий,
Ванахха марч ттуйх ках тIий
Буттал къатлул бухкIуллий.

ХЬХЬИЧIАЖАРТТАЩАЛ

ЦIаннал хъува хъякувкун,
Чаннал кIурх кIутта дучIай,
ЧантI кусса базурдавух
Тазасса дюхлу кIучIай.

ХьхьичIажарттащал ивзун,
ЩяивкIун ура хъюву,
Гьис-гьис тIисса дюхлулий
Дарссунни дакIнил къюву.

Бару бувсса барзунттал
ЦIан-чани кIилирчIунни,
Лахьхьусса ххажалатру
ЦIаннавура лирчIунни.

Щуну-зунттул лахъшиву
ЧIалан риртунни хьхьунил,
Ццах чин дунни пахъшиву
Ччясса лелуххул чIунил.

Зунзул чаннал зумардай
Лап чаннура на хьусса,
Ци бави – вай лахIзардай
Шану бикIай нахIусса.

Танмалшиву ххи хьуну
Тяту буллай личIара,
ЧIарах лагай макI хьуну
Ччясса кIюрхнил ишара.

Щукру хIакьинувагу
Бювхъусса ччяни изан,
Щукру ккавксса цал ттигу
ЦIусса кьинилул биза.

Ци кIулссар ттун кIа Заннал
Ци чивчуну буссарив.
Укунсса кIюрхру ттигу
Дуссарив, дакъассарив…

ТТУЛ ЛЯХЪИН

КуртIний – аьтарттул ххурхху
Лахъний ххяхха ларг ххяллу,
Хъуннеххал тия чулий –
Хъяхъа кусса хъархъаллу.

На вай ххяллал гъанчура,
Хъархъаллал маччачура,
Жиндрал хьусса аьтарттал
Базулул ссурахъура!

БакIру кIяла барзунттал
На хъацасса уссура,
Аьратталну бивщусса
Мурчардил гьалмахчура!

Вай ттул чIарав бавцIуссар
Мудан ттуйн кьини дуркни,
Ясингу буккинтIиссар
Сурувравух ивхьуни.

* * *
ХIакьинугу Лаккуй дакъар дакI аьчну,
Ттуруллал леххаву лерххунни ялтту…
Кьакьарттуйн кьувтIунни
кьурчIисса марчгу
Иттавгу ххярххунни мурчIи эялтру.

Лагмава уруглай ура навалу…
Къювурдал ва ччаврил бувцIунни хханхха,
Щамарал хъачIрайсса ттул шяравалу
Щях бивщуну лавгсса шагь-барзу хханссар.

Багъишла ити на, ттул буттал кIануй,
Вийн дурксса кьинилул ттуйгурча тахсир,
ЧIумул аьтарттуйсса оьрмулул ламуй
На ттула мюрш-кьюршлил увссара ясир.

На хъит къаувкуссар хъаттирду дуна,
Бюхъугу ччувччуссар чил ламараву,
ШагьраххуллуцI ххявхсса
шанчIапIуй кунма
Шаттирду бивзссар ттуй ва заманалул!

Багъишла ити на, багъишла ити,
ВидачIра хьусса дакI шанан ччай дурча,
Вила вайварттаву абад лаити
Хъирив багьну бурча бухлавгсса улча!
ШЯРАВУССА ЖУЛ БАГЪ

Жул чIивисса багърал, на кунна дакъа,
ТтиликI къаруртунни цила миналийн.
Къалавгунни мурхьру, къушгу кьабивтун,
Хъунисса шагьрурдай хъинмуних луглан.

БавцIуну бур мурхьру, дазу дургьуну,
Бусалардавасса буттахъул кунма.
Ватангу кьариртун, жан ххассал даяр,
Талай литIунну тIий, тавбагу дурну.

ХIаллицIух най ура багърал чIиралух,
Пашмансса асардал аьсав канихьну,
Сситтуй хьхьичIун ххявххун ццуццул къатIагу,
Гьарччалттуйн хъап тIий бур:
«Ина цура?» – тIий.

Пахъдагьру дур утти шиччаллил паччахI,
КIусса бизаршиврул низам дирхьуну.
ОьрчIний на бувгьусса кIялагьирдайгу
ЧIу-чIитI бакъашиврул кюртти бур бувну.

Пахъдагьру дур шикку –
жаллад-пахъдагьру,
Лагабургъил тIинттай чIурду аьс буллай…

ЧIа-чIаний дучIайсса чIяйсса гъаралгу,
Лаг-лаграл ликригу лахIлахIи дурну.
Илкинну-гьалххасса улклул чIапIавух
ОьрчIний нава кунна, куклуну лечлан.

Нажагьри ссур шайсса мурчал чапаргу,
Гъинтнил билаятрайн леххаврий куна,
Кьама-магъ щюллисса бяълилул бидав
ТIутIал хьамаравун бахьлаган бувну.

Гъаралгу чIумуйссар, марчгу чIумуйссар,
Пахъдагьрулул тIурча ахир дакъассар.
Дачайссар цIуницIа, оьттух къанихну,
Лагабургъил тIинттай чIурду аьс буллай.

* * *
БачIвасса бокаллал бявкъусса пар-пар
Чяхирданул чIентIал чят бувсса ссупра…
Аьратталсса дакIнил пашмансса ссапар
Ларгсса шадшиврува байбихьлай ура.

Ххарисса мажлисгу, хъинсса хъамалгу
Буссия хIакьину ттул ужагъирай,
Бокаллава хIачIлай шадсса хьамагу
Буссияв ттул чIарав инагу, ххирай.

Вил куклусса кагу карав дурцуну,
Ххарину уссияв талихIрайн вихну
Зумардайн бияннин бокал бувцIуну
На га гьаз бувссия жула ччаврихлу.

Музыкалул чIурдал кIусса мугьали
Барурду ххит буллай бишлай бавчуна,
ЧIурдаяту ххивну ххютру ва чани
Дагьанттал куртIнивун лихълай ларгуна.

Цурив ца жагьилнал кагу дургьуну
ЧIурдал аьтарттавун ххявххунав ина,
ХIанттил ва гьавасрал гьулусан увну,
ЦамуничIа хьуна ттулмургу мина…

КIирисса макь рутIлай майлул чирахъру
Ламарал мурччаву баслай лавгунни,
Вихь учин дакIнийсса ттюнгъасса махъру
Цамунихь увкуну, каниччул хьунни.

Насу, гьарча насу ттуяту архну
Чув дурив ххал дуллай ххуллурдал ахир,
Ттун нясив къабувсса вил базурдахлу
КIюрххилнин хIачIланна кьурчIисса чяхир.

На чяхир хIачIанна вин талихI чIа тIий,
Вил оьрму гьаннав тIий ччаврил ттугълилу.
Акъара на хIайп тIий, акъара аьтIий
На къюву ларитав хIанттил бугъливу.

БачIвасса бокаллал рухI дакъасса пар,
Чяхирданул чIентIал чят бувсса ссупра,
Вин багъишла битлай хаинсса ссапар
Хьхьуниву навалу хIан хIачIлай ура.

* * *
Ина цIияллайн лавхъний
Ттул аьжаивсса Изай,
Ссурулусса цIурттигу
Ссапалун къавтIун бизай.

КIюрххицIунмай щинав най
Ина хIисав хьутари,
Ссавнил вин пишкаш бувай,
Бургъил тIинттал гудари.

Ина ардарах найни
Суждалий бацIай чIаллу
Вил мурччив тIутIиври тIий,
Хъяврин шай чIимучIалтгу.

Ина чунмай гьарчагу
Аглан хъанай вил ялув,
ИттацIанттал хъаттирдай
Левххун бачай ттул яру.

* * *
Аьжаивсса урттуву
Архсса даралул ккурккай…

Ссавнийх ккуру лавгунни
Зурул ккурккисса ккуртта,
ЦIурттал ккузри зивзунни
Зурзу тIисса ликкурттайн.

Урттухун дахьларгунни
Дунияллул дачIигу,
Ччаврил чIурдал дурцIунни
Улклул чIапIал вичIивгу.

Аьратталсса вил чурхгу
Каруннаву бур баслай,
Ккуртта чIатIаракI кунма,
Урттуву ккуртта лаглай…

Урттувукьай, урттуву
Архсса даралул ккурккай…

* * *
Ккурулавгунни мачIайх
ЦIаннал буруллуккурду,
КIачIа бунни цIузурул
Цила мусил ккуккурду.

Занай ура зурулух
Мурчал иттав уруглай,
Вихь бусансса мукъурттих
ТIутIал мурччаву луглай.

ДакI хъинсса дур дюхлугу
Урисса дур урттугу,
Урттува байбихьлай бур
ЦIурттачIансса чурттугу.

ДакIгу най дур ссурулун
ТIинттал шачIанттайх ларай,
Ссавруннай вил цIа чичин
Чанна цIурттал ламарай.

Агь дукIлай дур, дукIлай дур
Жура чIа тIисса хьхьурду,
Майшан тIий бур цIубарзгу
Цила мусил ккуккурду.

* * *
Чун бувкIра тти инагу,
Бунагь бакъа нузручIий,
Вила чанна асарду
Ттул цIаншивурттайх кIучIин?

Тти вингу къулай бивзрив,
КIяла арцул гюнгутIий,
Мадара тийн-шийн щусса
Ттул бурцIил щунщуматIи?

Аман, цими ччувччурвав
Ттул дакIнивасса цIарал,
Цими ххюнчIа бувгьурвав
На палцI дурсса къерттарал!

Вила чурххал бияла
Буллунни ина ттухьхьун,
Инава биривунна
Ттул тамахIрал къатIухьхьун.

Тти вин мукун ччихьувкун,
Вин ччимур буллай ура,
Ччучлай лагивуй, дакIнил
Къакьаритай ва тура.

КъувтIилий – шадсса лама,
Яла – оьнкьу ва пуркIу –
Укун къуртал шай мудан
На бувсса ччаврил тIуркIу.

* * *
ЦIан шавай, чанна шавай
Зурухь дур жула арду…
Дувакьай ттунгу, бавай,
Царай ппалул жуларду.

Жап тIий бур цала мазрай
Ссавний цIурттал гюнгутIив,
НякI талай дур пюрунтрай
Ци-цигу магьлул тIутIив.

ЧантI чин бунни хIакьину
ДакIниву асар цIусса,
ЧIаххудушнил пиш куну,
Аьжаивну нацIусса!

Пикрирдал куклушиву
Кьаритан багьлай бур тти…
Ларгунни жагьилшиву
Мурчал бидавлий бурттий.

Бавай, хIадур дува шал
Сунттул ххаллая щаршсса,
Гъинтнил ахирданущал
Дуциннача на щарсса.

Цурив лавгсса шаттирдай
Ликлай дур хьхьунил цIурду,
Марххалттанил хъаттирдай
Левххун най бур ххуллурду.

ЦIан шавай, чанна шавай
Зурухь дур жула арду…
Дувакьай ттунгу, бавай,
Царай ппалул жуларду.
БАРЧА ЦIУССА КЬИНИ

НякIсса ссавнил арив барзул хъаттирдал
Бургъил мусил ккуртта ккуру бивтунни,
ЦIаннал бартукьрала бюхттул барзунттал
Шанювкьусса бакIру чIалачIи дунни.

Дултти зунттул кIизуйн
жагьилсса кIюрхнил,
Жалиндалийн кунна карщи руртунни,
Тяхъасса даргилтрал ххарисса чIунил
Паракьатшивугу руцари дунни.

Да, барча, инсантал, зул цIусса кьини,
Зун бургъил шадшиву пишкаш дуваннав!
ТачIав ххал къашайсса талихIрал кIини,
ХIакьину гьарманан хьунабакьиннав!

ДикIуча инсаннал инсаншивугу,
ЦIусса кьини кунна мудан цIулаглай,
ДикIуча абадлий жагьилсса кIюрхгу,
Дултти зунттул кIизуйх чаннал ка дуклай!