Апрель зурул 29-нний Избербаш шагьрулий хьунни «Родная газета» тIисса Республикалул прессалул фестиваль. Фестивальданул сакиншинначиталну хьунни ДР-лул Информациялул ва печатьрал министерство. Махъсса ппурттуву республикалий хъуннасса къулагъас дуллай бур миллатирттал мазурдих, миллатирттал прессалул даву ларай даврих. Миллатирттал мазру буруччаву, ябаву мурадрай ДР-лул БакIчи Рамазан АьбдуллатIиповлул кьамул дурну дуссар «Просвещенный Дагестан» тIисса приоритетсса проект. ХIукму хьунни вай агьамсса масъалартту щаллу баву мурадрай, Республикалул прессалул фестивальлу дуллан. «Родная газета» тIисса цIанилу цалчинсса прессалул фестиваль дурссия МахIачкъалалив. Гания шихуннай укунсса фестивальлу дурссар Хасавюртрай, Дарбантлив, Буйнакскалий, Къизлардай.

И. Саидова
Ва кьини Избербаш шагьрулул администрациялул фойераву лархъун дия циняв миллатирттал мазурдийсса прессалул стендру. Шиккун бувкIминнаща бюхълай бия цалва-цалва миллатрал мазрайсса кказит- журналлал редактортуращал ва микку зузиминнащал хьунабакьин, кIул хьун. Шиккура щаллу дан бюхълай бия кказит-журналлал подпискарттугу. Прессалул фестивальданий республикалул миллатирттал СМИ-рдащал хьунаавкьунни Избербаш шагьрулул хъунама Исламаьли БахIаммадов.
Ва хьунабакьаврийсса ихтилатру бия миллатирттал мазру, культура, аьдатру дуруччаврин хас бувсса. Мукунма шагьрулий ялапар хъанахъисса инсантурал масъалартту СМИ-рдайхчIин чIявучин аьч буллан, ми кказит-журналлащалсса хIала-гьуртту буллалаврийн хас бувсса.
Фестивальданул даву дайдихьлай ихтилат бунни ДР-лул информациялул ва печатьрал министрнал хъиривчу Миясат Муслимовал.
— ХIакьинусса хьунабакьаврил агьаммур мурад хъанахъиссар миллатирттал мазурдий итабакьлакьи­сса кказит-журналлу машгьур баву, му бакъассагу, буккултрах вичIи дирхьуну, ххалбивгьусса маслихIатру кьамул баву, буккултрал ва прессалул зузалтрал дянивсса арарду гъан даву. Прессалул хъунмасса бияла буссар агьалинахь республикалул оьрмулуву хъанахъимуния бусан. Мунийн бувну жу хIарачат буллай буру ччя-ччяни жула буккултращал хьунабавкьуну, миннал масъаларттах къулагъас дуллан, миллатирттал мазурдий чичин бюхъайсса журналистал аьлтту буллан ва миннащал кIул хьун. Цаппара шиннардил хьхьичI республикалий хьуссия хъинну агьамсса СМИ-рдал буккултращалсса конференция. Миккугу ккавкссия ва ххалбивгьуссия чIявусса маслихIатру. Ми масъаларттавасса ца яла агьаммургу бия республикалул СМИ-рдал даврил даража лавай баврин хас бувсса. Вай масъаларттан хас дурсса батIавуртту уттинингу жу дарду республикалул сайки циняв шагьрурдай. Избербаш – шагьру республикалий культура дуруччаврил чулуха хьхьичIун ливчусса шагьруну ккаллиссар. 2005-ку шиналгу му хъиннува тасттикь хьуссар Аьрасатнал шагьрурдал дянив баян бувсса конкурсраву Избербаш шагьрулул бувгьуссар цалчинмур кIанттугу. Мунияту бухьун­ссар хIакьину залданувун бувкIун ляличIинува чIявусса культуралул зузалт, миллатирттал мазурдил учительтал ва творчествалул интеллигенция. Пикрилий буру, прессалул фестивальлу гихуннай дуллалаврийн бувну, жула буккултращалсса арарду цIакь дуллансса мюнпат бусса, кказит-журналлал буккулт гьарза бувансса даву хьунссар тIий. ХIакьинусса кьини 60 000 инсан ялапар хъанахъисса Избербаш шагьрулий, 65% миннавагу бур даргиял миллатраясса. Увагу 55 инсаннал чивчуну бур «Замана» тIисса даргиял мазрайсса кказит. Вайми миллатирттал мазурдийгу ца, кIива яла гьарзану ацIва кказит чивчусса кIантту бур. КьурчIи бизлай бур миллатирттал мазрал кьадру бакъашиву, миллатрал мазрайсса пресса тIалавну бакъашиву, — увкунни Миясат Муслимовал. Фестивальданий хьусса ихтилатру бия мукунма миллатирттал мазурдийсса ва оьрус мазрайсса кказит-журналлал подписка яларай дагьлай, миллатирттал мазру хъамабитлай, миннух къулагъас чанну душиврия бусласисса.
Хъирив ихтилат бунни ДР-лул Журналистурал союзрал председатель Аьли Камаловлул. Цала ихтилатраву кIицI лавгунни Избербашрайгу яруссаннал миллатрал кказитрал подписка хъинну лащинну душиву. Бувсунни мукунма уттигъанну ДР-лул Журналистурал союзрал хIасул бувну бушиву «Кунаки» тIисса журналистурал клуб, ва хIадурну бушиву миллатрал мазрай чичин кIулсса журналистал мивун кьамул буван.
«Илчи» кказитрал хъунмур редактор Качар ХIусайнаева:
— ХIакьинусса кьини Избербаш шагьрулийн чивчуну бур бувагу 13 «Илчи» кказит. Жущал хIала-гьурттусса, ших хъанахъимур чичлачисса корреспондент икIайссия Гъази Къютиев. Лак чансса ба­къар, щалагу дунияллийх кIама бивщуну ппив хьуникунмасса циняв лакрачIан жула кказитрай бивщумур къабиллалаву къащи хъанан дикIай. Кказит биллай бур так 3000 инсанначIан. Дуссия кказитрал 7000 подписчик усса чIунгу. Гьакссагу къаххуйри укун кказитирттал тиражру яларай дагьаву. Миллатрал кказитрал тираж укун яларай дагьаврилгу буслай бур жула халкьуннал цала маз, культура дуруччин хIарачат къабуллалаврия. ПаччахIлугърал чулуха гьаксса мазру бухлаган къабитан шаймур буллай, чIарав бацIлай бур. Жуннив хIакьину миннуяргу зулмур чIарав бацIаву, зучIа жула кказитрал тIалавшинна душиву ччива, — увкунни Качар ХIусайнаевал.
Хьунни шикку Дагъусттаннал миллатирттал мазру хъама битан буллай, миннух къулагъас къадуллай бушивриясса агьамсса хъин-хъинсса ихтилатру.
Избербашрал мэр Ислам­аьли БахIаммадовлул бувсунни гихунмай кказит-журналлал хIакъиравусса масъалартту шагь­рулул предприятиярттал, идарарттал каялувчитуращал маслихIат бувну кказитирттал тираж гьаз дувансса ххуллу-чараннах луглантIишиву.