Нанисса шинал мукьвагу зурул дянив республикалул ххуллурдай 250 ДТП хьунни. Миннуву 100 инсан ивкIунни, 315 инсаннан личIи-личIисса цIунцIияртту хьунни. Хъуниминнал баччибакъашиву сававну, ливтIуминнаву бур 16 шин хьуннинсса оьрмулувусса 6 оьрчI, цIунцIияртту хьуминнаву – 20.
Махъва-махъ балугъравун къабивминнан бала хьусса иш хьунни апрель зурул 12-нний МахIачкъалалив. Ахъушинскийл цIанийсса кучалий. Леххан бувну нанисса шупIирнал щун бувну бур щюллисса светофор лархъсса чIумал ххуллу лахълай бивкIсса кIива душнийн.
Дагъусттаннал МВД-ву буруккинсса масъалалун ккалли буллай бур ДТП-ву мюрщисса оьрчIан апатIру хъанахъаву. Мукунсса иширттан ххуллу кьукьин, Дагъусттаннал МВД-лул ДР-лул КIулшивуртту дулаврил, элмулул ва жагьилтурал политикалул министерствалущал цачIу бувну бур хIукму – «О задачах и о формах работы по профилактике аварийности с участием несовершеннолетних на 2014 год». Му хIукмулуцIун бавхIуну ГИБДД-лул подразделениярттан ва кIулшивуртту дулайсса идарарттал цIакь дурну дур цачIу дуллансса давурттал план. Мукунна хIадур дурну дур школалийн зананнинсса идарарттаву дуллансса давурттал программа. Му план щаллу дуллалисса давурттал лагрулуву вай гьантрай МахIачкъалаллал №71 прогимназиялуву ларгунну ГИБДД-лул, ОИОС-рал ва МахIачкъалаллал Советский райондалул администрациялул кIулшивурттал отделданул зузалтрал цачIусса мероприятие. Прогимназиялуву хьунни оьрчIал цанна ххуллул низам кIулшиву ккаккан буллалисса «Зеленый огонек» тIисса КВН. Цалчинсса конкурс дия «Знаки» ва «Почемучки» тIисса командарттал ссалам булаву. ОьрчIал шеърирдайну бувсунни ххуллул низам циван кIулну дикIан аьркинссарив.
Хъирив дия музыкалул конкурс. Гьарица командалун аьркинну бия ххуллул низамрахасса балай учин. Хъиривми бяст-ччаллу бия оьрчIал куннал куннахьхьун суаллу буллалисса. Командарттан кумаг буллай бия магьрал персонажру – Три поросенка, Серый Волк, Красная шапочка, Колобок ва м.ц. Миннал ккаккан буллай бия личIи-личIисса сценкарду, командардан бусан аьркинну бия магьрал персонажирттал ххуллул низам дурурччуссарив ягу къадурурччуссарив. Му конкурсрая оьрчIал тамансса хIаз лавсунни. ЦIубутIуй сикъавсуну бивкIнугу, яла чялиш бувккунни.
Хъуниминнан дакI даркьунни оьрчIан ххуллул низам ххуйну кIулну душиврий. КIирагу команда сайки циняв суаллан тIайласса жавабру дуллай бия.
№71 прогимназиялул директор Аьйшат МахIаммадовнал бувсунни укунсса викторинарду цинявппа оьрмурдал оьрчIал дянив дувайшиву. Гьарца кьини ххуллул низамрал хIакъиравусса занятияртту дувайшиву разметкалущалсса перекресток кунма чIюлу бувсса хасъсса классраву. Шикку душиву ххуллул лишаннан хас дурсса личIи-личIисса стендру. Бувсунни ми дарсругу тIуркIурдал журалий лагайшиву. ГИБДД-лул управлениялул пропагандалул группалул хъунама полициялул подполковник ИсамахIаммад Султановлул тавакъю бунни оьрчIахь нитти-буттахьгу ххуллул низамрал тIалавшиннардая бусияра куну. Ванал кIицI лавгунни цанна къащи хъанан дикIайшиву хъуниминнал оьрчIал чулухуннайсса баччибакъашиву. ЧIявуну ми светофорданул къадагъа дуллай бунува оьрчIащал ххуллу лахълан бикIайшиву. Машинарттай оьрчIру бувцуну заназисса нитти-буттал тIурча, чIявуну мюхчан байсса мухIулттив дахIлай бакъашиву. ХIатта практикалул чIалачIи буллай бунува мухIулттив дархIусса оьрчIан авария хьусса чIумал цIунцIия чанну шайшиву. Хъуниминнан бувчIин аьркинни ххуллийсса цалла занакьулушиннарая хъар хъанай бушиву оьрчIал оьрму ва цIуллу-сагъшиву.
ХIадур бувссар
А. Аьбдуллаевал
