Ларгсса нюжмардий жулла республикалий, МахIачкъалалив, кIира кьини хьунни Щалвагу Аьрасатнал культуралул ва инвестициярдал форум «Культура и экономика региональной политики в современных условиях» цIанилусса. Мунивух гьуртту хьун республикалийн мунил дазул кьатIату бувкIунни хъинну чIявусса хъамал. Му форумрал лагрулуву хьунни хъинну чIярусса мероприятиярду.

Бадрижамал Аьлиева
Форумрал 2-мур кьини Оьруснал театрданул фойераву хьунни халкьуннал канил пишардал ва декоративно-прикладной искусствалул «Наследие» выставка-ярмаркагу. Мунийсса республикалул районнал экспозициярдаву яла итталун багьлагьимур, язимур бия Лакрал райондалулсса. Форумравух гьуртту хьун бувкIун бия Лакрал райондалул администрациялул бакIчинал хъиривчу Соня Макьаева, Лакрал райондалул Культуралул управлениялул каялувчи Идрис ЛухIуев, КIундиннал шяраваллил администрациялул бакIчи Жабир Гаммуев, ЧIарттал шяраваллил администрациялул бакIчи Микьдар Аьбдулмажидов, КIамахъаллал шяраваллил администрациялул бакIчи Сяид Аьбдуллаев, лакрал щархъал культурардал къатрал каялувчитал, зузалт. ДакI ххари хъанай дия ва давривух гьурттуну жагьилталгу биялсса бушиврия.
— Ва шин Культуралул шиннугу баян бувну, хъанай бур чIяву-чIявусса хъин-хъинсса культуралул ишру. Мукунсса цану хъанай бур ва форумгу. Дагъусттан Республикалул Президентнал хъуннасса къулагъас дуллай ур миллатирттал аслийсса пишарду цIулаган баврих, миллатрал искусство, творчество хьхьичIуннай даврих, мунийнугу мунан ччай бур махъа нанисса ник ихIсаниятрал, патриотизмалул зумувну тарбия бан, цалва тарихрачIан, лавгмуничIан, миллатрал багьу-бизулучIан хIурмат буну аьдат бан. Ттул пикрилий, уку-укунсса давуртталгу кумаг бантIиссар ва буллалиссар миллатгу, мазгу буруччин ва махъа нанисса жагьилтурачIан ми биян бан. Мунияту чара бакъа аьркинссар Аьрасатнал халкьуннал аслийсса культуралул центрдугу, фольклоргу, халкьуннал пишардугу буруччин.
Уку-укунсса давурттаву цащава шайсса кумаг буллай бур райондалул шяраваллал бакIчиталгу. Уттигъанну райондалий хьусса совещаниялий баян бувну буссия ва форумрайнсса хIадуршиннаравух гьуртту хьуну, шяраваллал бакIчитурангу ка-кумаг буван аьркиншиву. Мукун, ти-шинмай къавхьуну, шай-къашай къаувкуну, чIарав бавцIунни КIундиннал шяраваллил бакIчи Жабир Гаммуев, ЧIарттал – Микьдар Аьбдулмажидов, КIамахъаллал – Сяид Аьбдуллаев, Хъурхърал – Муртазяли Раджабов, Щардал – Мирослав Ибрагьимов, ШавкIуллал – Аьбдул Аьлиев, Кьубиял – Заурбек Исупов. Миннал кумаграйну укун авадансса экспозиция хьунни, хьхьичIарасса янна-кагу, тIахIни-кIичIу, бартбисурттугу бусса. Гъан хъанай, гьаксса сурат­ру ришлай бия инсантал жулла экспозициялучIа, буруглай бия жулва усттартал зузисса куццух. Яла-яла миннан хIаз дизлай дия заргалтуралмур даву. Барчаллагь жулла шяраваллал бакIчитуран бувсса кумаграхлу, — тIий бур Соня ХIусайновна.
Ва выставкалий Лакрал райондалул ккаккиялун дирхьумуниву итталун дагьанмур къачанъя, 1895 шиналсса бартбисурттая тIайла хьуну. Миннущал бувкIун бия КIамахъаллал культуралул къатлул директор Мирзоева Саният.
— Ва жул шяравасса 80-лли­хъайсса шинну хьусса ца хъамитайпалул буттал буттал Донбассрая лавсун увкIсса бартбисур. ХьхьичIва жулва лак хIалтIилуха ссайгъатру лавсун бучIайсса бивкIссархха. Мукун, ва бартбисугу бур мукун лавсун бувкIсса, кIа хъамитайпалул цилва хъирив буллуну бивкIсса. Аьвзал заманнул бартбису цамургу вана шикку. Вагу жулва шяравасса 70-ллихъайсса шиннавусса хъамитайпалул буллусса бартбису бур. Вай жу гьарца дуллалисса выставкалий, шадлугърай ккаккан байссар, жулва лакрал майдан чIюлу бан мудан ишла байссар. Культуралул шинащал цинявппагу барча буллай, цIуллушиву дулуннав тIий бура жухьхьунна Лакрал район бюхттул дуллан, лайкьну ккаккан дуллан уку-укунсса шадлугъирттай, — тIий бур ва.
Ва выставкалийн бувкIсса КIундиннал шяраваллил культуралул къатлул художествалул каялувчи ХIалимат Юсуповагу (ва даврий зий ХIалиматлул мартрай 25 шин хьунни) тIий бур:
— Укунсса батIавурттал, выставкардал жагьилтураву миллатрал культуралухсса ччаву дихьлахьиссар, хьхьичIва жулва буттахъал, буттал буттахъал ци пишарду бивкIссарив, ци ишла дуллай бивкIссарив миннан кка­ккан буллалиссар.