Фаина Федоровна бур дагъусттаннал шаэртурал шеърирду ляличIинува ххирасса ва ми пасихIну, усттарну буккайсса цIанихсса актриса.
ЧIявуссаннал учай мунил кунма асар хьунну, бюхханну Расул ХIамзатовлул шеърирду цаманал къабуккай увкуну.

Дагъус­ттаннал шаэртурал шеърирду личIинува асар хьунну, пасихIну, бюхханну буккавривугу Графченкол цирив тIилисин бур. Щак бакъа, му тIилисин наниссар Фаина Федоровнан дазу дакъа Дагъусттан ххирасса бушавриватугу. Мунил мудангу кIицI лагай, цуппа Дагъусттаннах ччаву дусса инсан бушиву. ХIакьсса ччаврищал тIурча мудангу архIал дизай аьчухшиву, дакIнийхтунушиву. Мукун аьчухсса, тIааьнсса, ххуйсса мажлис хьуну бур Фаина Графченкол Москавливсса литературалул мажлисгу.
Ва вечерданул хIакъиравугу цуппа Фаина Федоровна укун тIий бур:
— Ва вечер хъин сававну, яла-яла, на Москавлив хьунабавкьура хъинну чIявусса ттула дустуращал, миннавух чIявусса дагъусттанлувтуращалгу. Дустуращалсса хьунабакьавурив мудангу ххарисса иш бикIай, хаснува Москавлив. Яла тIааьнмургурив му бия – вечерданийн бувкIми рязийну личIаву, ттула пикрилий. Ва хьунабакьаврия, вечердания дакIниву ливчIунни байрандалия кунмасса яла тIааьнми асарду. Хъинну ххуйну хьугу хьунни цурда. Хъуннасса концертгу ккаккан дунни. На ккалаккисса дагъусттаннал шаэртурал шеърирду чув бухьурчагу хъинну ххуйну кьамул бувай. Мирив на бу­къавккусса кIану бакъахьунссар щалва Аьрасатнавугу, Совет Союзрайгу. Чув бухьурчагу дагъусттаннал поэзия бюхттулний бикIай, тIааьнну бикIай му къадагъусттанлувтурангу бувчIлачIаву, миннангу му ххирашиву, мунин багьайсса кьимат бишлашаву. Дагъусттаннал шаэртурал назмурду, зунмагу кIулсса ку­ццуй, на дуккара так Станислав Сущевскийл таржумалуву. Муналмур таржума муксса грамотныйсса, техникалул чулухагу, муксса аьщуйн щусса, дакIнийхтунусса дикIайхха. Миннун, чув-бухьурчагу, лайкьсса кьиматгу бищай вичIидирхьуминнал, — буслай бур ва.
КIулчу – ккавкчури. Мажлисрая буслай бур мудангу миллатрал кказитрал журналистурал цIухху-бусу баврия ххарисса, кIу къабивзун, жавабругу дулайсса жул буккулт.
Ва ялагу, Фаина Федоровнал мачча-гъанминнал, дустурал кьюкьлуву бур лакрал миллатрал язисса душругу. Мунилгу гъан дуллалиссар Фаина Графченкощалсса арарду, хIатта му чан-кьаннувагу лакку душри, лакран маччассар, гъанссар учинсса хIуччагу буссар жучIава. Жулва билаятрал яла хъунмур хъусгу, ххазинагу тIурча миллатирттал дусшивур. Литературалул культуралулгу му дусшиву гъангу, цIакьгу дуллалиссар. Му дусшиву цIакь давриву биялсса бутIа бивхьуссар Фаина Графченкол Москавлийсса мажлисралгу.
Земфира Къаллаева, «Дагъусттан» культуралул центрданул вакил:
— Мажлис гьакссагу ххуйсса, тIааьнсса, гъилисса хьунни. Фаина Федоровнан кIулли зал ясир буван, цIакьну бугьан. «Дагъусттан» культуралул центрданул му мажлисрал даву ттуйнна тапшур дурнавхьур, на бигьалагай кьинигу духьувкун, зал буцIинавав, агьали батIинавав тIий буруккинттарай бивкIра цIубутIуй. 120 инсаннансса зал бувцIуну бия, тамашачитал мякьну вичIидирхьуну бия, пасихIсса мукъул усттарнал цавагу махъ щяв багьан къабитлай. Жу, Москавливсса да­гъусттанлувтал, талихIрай, ххарину буру жулла ватандалий Фаина Федоровна кунмасса личностьру бушаврия. Жула гъан-маччацириннал оьрчIан тIайлану гъалгъатIун лахьхьин буллансса ххуйсса учитель ушавугу хъунмасса тIайлабацIур, му логопед хIисаврайгу оьрчIан ххуйсса кумаг буллалисса инсан бухьукун. Цала оьрчIал итххяххаврих къулагъас дусса нитти-буттахъан маслихIат буллай бура Фаина Федоровнал дарсру лахьлан.
Мажлисрай Графченкол бувккунни Расул ХIамзатовлул, Сущевскийл, Батырайл, жулва гьунар бусса Миясат Муслимовал шеърирду. Мунил чIарав бацIан бувкIун бия машгьурсса композитор Ширвани Чаллаев ва халкьуннал балайчи Лариса ХIажиева. Муданма кунма, ххаллилсса балайрду увкунни миннал, муданма кунма, букъаччавай вичIидирхьуну бия Ширвани Рамазановичлул бусласимуних. Гьаннайсса, агьали рязийну личIину Москавливсса мажлисрая, цал ттигу исват хьунни Дагъусттаннал ва Аьрасатнал нахIусса арарду цIакьну душиву.
Лариса ХIажиева, Дагъусттаннал халкьуннал балайчи:
— Мероприятиярду чIярусса Москавлий щапI куну зал бувцIуну бия, кIира ссятрайсса бикIан аьркинссия мажлис, 4 ссятрай лахъи лавгуна. Хар-хавар бакъа чIун лерххун ларгуна, агьалинан Фаина Федоровна итабакьинмагу ччай бакъая. На му мажлисрайн инсантурал дакIру марцI дуккан дуллалисса мажлис учивияв. Буниялттунгу, ссихIир бувсса кунма инсантурал дакIру марцI дуккан дайхха шеърирдал. Уку-укунсса мероприятиярдалли Дагъусттаннал чулухунмайсса хIурмат ххи буллалисса. Шеърирдаллив бюхттулсса тIилисин бур, хаснува Фаина Федоровна кунмасса гьунарданул заллу шеърирду ккаларча.
ЛичIи-личIисса диннал агьлу, личIи-личIисса миллатру гъангу, цачIунмайгу буллалисса хIахI бия, хIайран хьунну тIисса бакъа, учIаврия пашман хьусса инсан акъая. Укунсса концертру централ каналлалгу ккаккан дуллан аьркинни, агьалинал дакIру марцI дуккан дуллалисса, чанна дуллалисса лахIзарду щалвагу билаятрал агьалинан ккаккан, Ширвани Рамазановичлул ва Миясат Щайховнал аькьилсса калимардал куртIшиврия щалвагу билаятран цал уттигу хавар бикIан.