Май зурул 4-нний мукьцIал лавхъунни 1-мур ЦIувкIуллал шяраваллил хъунама Асланбаглул арс МахIаммад Кьурбанов шяраву авария хьуну дунияллия лавгун.

ПатIимат Рамазанова
МахIаммад шяраваллил хъунаману увчIуссар 2006 шинал 86 процент чIурду буллуну. Цува му даврий авцIуния мукьах улувкьуна МахIаммад шяраваллил агьалинал къайгъурдалсса буллай. Жяматрал бусаврийн бувну, заллу акъасса кунма заназисса ризкьилулсса бувна мунал хьхьичIва-хьхьичI, цала-цала гьухъала дуну ярглий занази бувссия гъаттарачIан. Ятти-гъаттаран цIусса куппа дурссия, АьмулуцIалу тIисса кIанттайсса хIухчалтрал къатта цIуну чIирттугу бувну, шифергу дирхьуну, бакьин бувссар. Зуруй кIийлла субботникру дуллай, шяравалу пух-пусурдануцIа марцI дурссия. ЛивтIусса гъаттара бу­ччайсса 10-15 метралул куртIсса къуви дурссия. Лулттумур махIлалийн нанисса щин микIларчIун, турбарду хъя-хъя куну къанай дуссия, ми турбардугу баххана бувну, цила багьайсса даражалий щинаххуллу бакьин бувссия.
Шяраваллил администрациялул къатрал чIаравсса щингу, цIунил турбардугу лавсун, Щин нани кьунттала дурцуссар, хIакьинусса кьинигу най дуссар ми щин. Му бакъассагу, БютI-бютIи щинал щаращив цамургу хIала бавкьуну, шяравусса циняв кьуллардайн щин гьарза дурссар, циняв кьулларду бакьин бувссар.
Хъуннасса къулагъас дикIайва МахIаммадлул ххуллурдахгу. Ваччату ЦIувкIравсса ххуллу гьарца инттугу, ссуттилгу бакьин байссия, хъунисса марххалтту барча, гъараллу дарча, гассят хъирив уккайва.
Шяравун бухлахисса ххуллуцI­сса ламу левкьун буссия, мугу цIунил бувссар.
2009 шинал шяраваллил Культуралул къатлуву щаллуну ремонт дурссия.
Шяраваллил кIичIиртту цIан­наву личIайссия чирахъ бакъа. МахIаммадлул ми кIичIиртту чанна лахъан бувссия, 14 точка буссар хIакьинусса кьинигу шяраву чани буллалисса. Уку-укунсса давурттив дуллалисса МахIаммад цIунилгу увчIуссия шяраваллил хъунаману, муния махъ администрациялул къатригу дакьин дурссия. Шяраву зий дуссия дурагу ца телеканал, мугу чIалай-къачIалай зун дикIайва. Саранскалия цIусса передатчикгу бучIан бувну, «тарелкагу» дирхьуну, зузи дурссия цаймигу телеканаллу.
Ккуллал райондалий мобильная связь дакъасса шяравалу ца ЦIувкIуллалсса дия. Му связь тIалав дуллай, таний республикалул хъунаману зузисса МахIаммадссалам МахIаммадаьлиевичлуйнгума увкссия. Муния республикалул Халкьуннал Мажлисрал депутатътурачIан, Владимир Путиннул приемнайлувун увкссия, ОАО «Мегафондалул» Ккавкказуллалмур филиалданийн чичлай уссия кумаг бувара тIий.
ЦIикIулла бакIул бакIраву выш­ка дацIан дурссия, аппаратура ларсун бучIаннин ялугьлай уссия.
Цикссагу ххуй-ххуйсса давурттив дурссар Асланбагхъал МахIаммадлул, шяраваллил жяматрал цала цIа хIурматрай кIицI лагавансса.
Му ия буттал кIану, шяраваллил жямат ххирасса инсан. Шиная шинайн шяраваллу ххялтIа дуклай най душиврул ялув буруккинттарай икIайва. Шяраву къатри дан ччи­сса ухьурча, ххари-ххарину чIарав ацIанна, жула шяравалу щаллагу дунияллийх цIа ларгсса пагьламантурал шяравалур, жура му ядуван аьркинссар тIун икIайва.
Жяматрай дакI аьтIутIисса бакIчи усса шяраваллил жямат тIайлабацIу хьусса жяматри. Мяйрахъул шинал мутталий оьккину къабивкIссар ЦIувкIуллал жяматрал иш: шяраваллий каялувшиву дуллай ивкIун тIий дакI-аьмал хъинсса, тIайламур ччисса, жямат­ран хъинмур бан чялиш увксса бакIчи. Мукунсса ия, гьамин, Асланбагхъал МахIаммад.
Цинярда дурцири давурттал ккал къадулларчагу, жяматран кIулссар му шяраваллил махъ зунтту куна ацIайсса ивкIшиву. МукунминнацIа хьусса чIумал зунтту левкьний кунмасса асар личIай дакIурдиву.
Язисса арснацIа хьуну дягъулий бур ЦIувкIуллал жяматгу, дягъулий бур цIувкIуллал зунттурдугу, къурду ва лухччивгу. Чяр-чяр тIий дур Кьуллайрдайрив арцул пар бусса щин. Асланбагхъал МахIаммадлул хIарачатрал хIасиллу хьусса кьуллардайсса щинал такьвамур дур буттал кIану яхьунтIишиврийн вихшала дишин буллалисса.
Буттал кIану ябан, буруччин чялиш бувксса язисса арсру буссаксса ва миннал аманат жунма дакIний буссаксса, дуссар жула Лаккуйсса оьрму цIулаган бюхъайшиврийн­сса хьул-умудгу, вихшалагу.
Я Раппий, цIакьсса гьанурду бусса, куртIсса мархри бусса ля­къиннав му вихшала.