Вай гьантрай «Молодежь Дагестана» кказитрал конференц-залдануву хьунни Буттал КIанттул цIанийсса дяъвилул ветерантуращалсса хьунабакьаву.

А. Аьбдуллаева
Журналистуращал хьунабакьин бувкIун бия Дагъусттаннал педуниверситетраву зузисса элмурдал доктор Аьбдулла Мурсалов, Социалист захIматрал Виричу МахIаммад Макулов, Кубанаву ивкIсса, Фидель Кастрощал хьунабавкьусса полковник Виктор Хирсанов, Илияс Казиханов, Ленинградуллал шалклуву бивкIсса Ирина Сухомлина , Екатерина Тращенко ва Дагъусттаннал Ветерантурал Советрал председатель МахIаммад Каримов.
Мажлис тIитIлай, «Молодежь Дагестана» кказитрал хъунама редактор Абаш Абашиловлул кIицI лавгунни аьдатравун дагьну душиву Ххувшаврил байран гъан хъанахъисса гьантрай ва кьини цалва захIматрайну, виричушиврийну гъан дуллай бивкIми лахъа-хъун буллалисса хьунабакьавуртту.
Ветерантал байрандалущал барча буллалисса ихтилат бунни Дагъусттаннал Ветерантурал Советрал председатель МахIаммад Каримовлул.
— ХIакьину Дагъусттаннай ур 25 азара Буттал КIанттул цIанийсса дяъвилул ветеран, миннава 570 Хъунмасса Буттал КIанттул цIа­нийсса дяъвилул участник. Миннавагу 12 инсан ур Ленинградуллал блокадалуву ивкIсса. ЧIявусса ккавкссар, чIярусса захIматшивуртту духIан багьссар вайннан. Амма хIакьинугу, оьрму-хIал лавгун бунугу, вай хъуннасса даву дачин дурну бур ялун нанисса ник тIайлану, Ватан ххирану тарбия даву, миллатирттал дянив дакьаву дуруччаву мурадрай, — увкунни М. Каримовлул.
Хъирив тай дяъвилул шиннардий цанма ккавкцириннуя бувсунни отставкалийсса полковник Илияс Казихановлул.
— 1941 шинал на марцIну ххювардай къуртал бувссия Лувмур Къазанищиял школа. На, 17 шинавусса жагьил, ттула гьалмахтуращал лавгссияв ахьтта Буйнакскаллал райондалул военкоматрайн дяъвилийн гьан увара учин. Амма Буйнакскаллал комсомолданул райкомрал на ттула школалийн учительну гьан унна, — тIий, дакIнийн бутлай ур Илияс Батырханович. Амма хъунма хIал къавхьуну Илияс Ттуплислийсса артиллериялул училищалуву дуклан лавгун ур. 1942 шинал училище къуртал байхту ва ивтун ур 1-мур батареялул огневой взводрал (61-мур битултрал дивизия, 55-мур артиллериялул полк) командирну. 1943 шинал ахирданий гьуртту хьуну ур Мелитополь тIисса украиннал шагьру тархъан буллалисса къизгъинсса талатавур­ттавух, лавхъун ур Днепр неххайх. Ххувшаврил кьинирив ванал хьунадаркьуну дур Прага шагьрулий. Амма ххувшаву ларсун мукьахгу Казихановлун японнащал талан багьну бур. ЦIадурксса японнал квантунская армия ххит бувну бур 1945 шинал сентябрь зурул 2-нний. Дяъви къуртал хьуну махъгу Илияс Батырханович Совет Аьралуннаву къуллугъ буллай ивкIун ур. 1958 шинал майорнал чиндалуву чIярусса орденнащал ва медаллащал увккун ур запасрайн.
Дяъвилул шиннардий Хъунзахъиял райондалий партиялул райкомрал цалчинма секретарьну ивкIсса Социалист захIматрал Виричу МахIаммад Махуловлул бувсунни къинттуллух захIмат бихьлай бивкIминнал виричушиврия. Хъунзахъиял райондалул партиялул организациялий каялувшиву дуллай ивкIсса МахIаммад Махулович цIакь увну ур истребительтурал батальондалул комиссарну. Та чIумал ванан 27 шин диркIун дур. 1984 шинал ва зун ивкIун ур МВД-лул противопожарный службалуву, 2005 шинайннин пожарно-технический службалул хъунаману ивкIун ур. ДакI марцIну бивхьусса захIматрахлу цимилагу лайкь хьуну ур ХIурматрал грамотарттан ва Барчаллагьрал чагъардан. Миннувух бур дяъвилул шиннардий бувкIсса И.В. Сталиннуясса 2 чагъаргу. Ва кIийла лайкь хьуну ур Лениннул ордендалун, мукуна ЗахIматрал ЯтIул ттугълил ордендалун. 2013 шинал МахIаммад Махуловичлун дуллуну дур республикалул яла бюхттулмур награда – орден «За заслуги перед республикой Дагестан».
— На дуклай уссияв разведшколалий. Жу гьар мудан ца кIаная ца кIанайн бичлай бияв. Ххувшаву ларсун махъгу, 1951 шинайн бияннин, талан багьуна. Немец ххит буккан бувну, бендеровцы мютIи буллан багьуна, — тIий, буслай ур Аьбдулла Мурсалов.
— Жу икрам буллай буру дяъвилул цIараву талай бивкIсса ветерантурайн, къинттуллух захIмат буллай бивкIминнайн. Тай дяъвилул шиннардия арх буцлациссаксса зул кьюкьри ххялтIа дуклай дур. Кьадарданул дурсса бахшишран ккалли бувара зу кунмасса вирттавращал щябивкIун, ихтилат бан биривну тIий, — увкунни «Дагестанская правда» кказитрал хъунмур редактор Бурлият Токболатовал.