Аьрасатнал Регионнал министерствалул коллегиялий

IMG_19Апрельданул 29-нний Москавлив ДР-лул БакIчи Рамазан АьбдуллатIипов гьуртту хьунни АьФ-лул Регионнал иширттал министерствалул коллегиялул хIасиллу даймур заседаниялий.
Тикку ххалдигьлай бия кIа министерствалул 2013 шинал дурсса давурттал хIасиллу ва ккаккан бунни гьашину щаллу бансса агьамми масъалартту.
Хаснува заседаниялий ххалбивгьунни дазул чIарахсса билаятирттащалсса хIала-гьурттусса давурттал план биттур даврил хIасиллу, 2025 шинайнсса АьФ-лул паччахIлугърал Миллатирттал политикалул стратегия, казачествалул хIакъиравусса паччахIлугърал политика ва цаймигу масъалартту.
АьФ-лул регионнал иширттал министр Игорь Слюняевлул мукъурттийн бувну, дунияллул экономикалул кризис хьусса тагьарданувугу билаятрал 2013 шинал хьун дунни къаоьккисса макроэкономикалул хIасиллу.
«ВВП лахъ хьунни 1,3 процентрал, промышленностьрал производство 2013 шинал гьарза хьунни 0,4 процентрал. ХьхьичIунсса ккаккияртту хьуну дур АьФ-лул 55 субъектраву, хьхьичIунминнувух бур Дагъусттан Респуб­лика, Республика Ингушетия, Республика Бурятия, Аштарханнал область, Омскаллал область, Тулаллал область, Красноярскаллал край. Шяраваллил хозяйствалул бакIлахъия гьарзану ларсун дур 49 региондалий.
Юридийсса идарарттан ва цивппалу зузисса ишбажаранчитуран кредитру дулаву ххи хьуну дур 13,6 процентрал. Хъинчулийсса дайдихьуртту хьуну дур 71 региондалий. Шинал хIасиллайн хасну инфляция хьуну дур 6,5 процентрал. Агьалинал доходру гьарза хьуну дур 3,7 процентрал, давудакъашиву хьуну дур 5,6 процентрал», — увкунни И. Слюняевлул.
Ганал, мукунма, бувсунни, 2013 шинал Аьра­сатнал регионнал иширттал министерствалул ишакаш дурну душиву 4 паччахIлугърал программа.
Дагъусттаннал БакIчи Рамазан Аьб­дуллатIиповлул увкунни: «Стратегиялул программа хIадур даву къагьассар, аьркинссар га жулва билаятрал регионнаву щурущи дуллан. Мунияр ххишалагу, экономика лиян дурсса «жу гьармунил щаллу бара» тIисса тагьардания бучIан аьркинссар хьхьичIуннайшиврул, цалва цивппа щаллу баврил ххуллийн.
Аьрасатнал регионнал иширттал министерствалул хIарачатрайну ва билаятрал Президентнал хIарачатрайну жу щаллу хьуру Аьрасатнал Федерациялул ПаччахIлугърал миллатирттал политикалул стратегиялул. Мунил дайдихьуну хьуссар «Россия: национальный вопрос» тIисса Владимир Путиннул макьала».
Республикалул каялувчинал бувсунни региондалий дузрайн дуккан дуллалисса программарттая, миннувух традициялул культуралул центрдай дузал дуллалиминнуятугу.
ХIадур бувссар ХI. Аьдиловлул