ГьунчIукьатIату чичлай бур

ГьунчIукьатIрал школданий чIа-чIаннин дувай жура-журасса мероприятияртту, конкурсру, дялахърурду. Вай мартрал гьантрайгу хьунни душваращалсса «Гьурала, душрув!» тIисса мероприятие.Му мероприятие хIадур дурну дия школданул тарбиялул даврил каялувшиву дуллалисса учительница Хинчалова ПатIима МахIмудлул душнил. Школданийн буххайхтува тяхъашиву, ххуйсса мероприятие душиврул асар хIасул буллалисса иш-тагьар дия жанахIраву. Бюхъу-хIарачат бусса ПатIима МахIмудовнал каялувшиврулу душварал кка­ккан бувунни цалва гьунарду: балай учавриву, янна лаххавриву, бакIрай прическа давриву, каруннал магьиршиврул давуртту, стол чIюлу баву ва м.ц. .
Мероприятиялул хъирив учительницахъал барчаллагь увкуна хIадур дурсса ПатIима МахIмудовнахь, гьуртту хьусса душварахь. «Дараччи» клубрал хъунмур Къушиева Сарижат Маллааьлил душнил хIарачатрайну хIадур бувсса столданул лагма лавгун чIявусса ххуйсса ихтилатру бувуна школданул директор МахIаммадлул арс Малик Къушиевлул, Багьаву­ттин ХIабибуллаевичлул ва цаймигу учительтурал. Хъинну хъуннасса чIумуй дакIний личIанну ларгунни ва мероприятиялул, конкурсрал давуртту. Уттиния тихуннайгу зухьхьун цIуллушиву дулуннав жура-журасса конкурсру дуллан, оьрчIал гьунарду ялун личин буллан, кIулшивуртту ххишала дуллан.
«Мюрщи щаращал щурщу» тIисса луттирал презентация хьунни ГьунчIукьатIрал школданий 11-мур мартрай. Вайннан кIилийнусса бахшиш хьунни цалва шяравудуш Илиясова Мариян ЧIибил душнил сипталийну буккан бувсса, мюрщи оьрчIан хас бувсса, чIюлу-ккулусса, мяъна-мурадрал, мяърипат лахьхьин даврил гьануну хьунсса лу дунияллийн буккаву. Суратирттал бикIу, маз итххяххаврил бикIу (дискгу архIал духьувкун) ва лу бур ялув бавцIуну, гьарзат хIисавравун ларсун, хъинну хъунмасса захIмат бивхьуну сакин бувсса.
Шиккун бавтIсса учительницахъал Дандамаева Асиятлул ва Къушиева Сарижатлул чIурчIав дунни ва лу мюрщими классирттал оьрчIан ххишала бакъа аьркинсса лу бушиврий. КIицI лавгунни ва лу бакъассагу, Мариян ЧIибиевнал ла­кку маз ябавриву, лакрал магьирлугъ хьхьичIуннай давриву бихьлахьисса захIмат, дуллалисса ххуй-ххуйсса давуртту. Му бакъассагу, Марияннун кIулли, къуманал чIарав бавцIуну дакI рахIат дансса давуртту дуван, ссаву-унугу хьхьичIун ливчуманая лахъа-хъун аврил махъ учин.
Марияннул оьрмулувасса лахIзарду ккаккан буллай бия интерактивная доска ишла дурну. Мяйжаннугу, цал ялагу исват буллай бия пахрулун лайкьсса бушиву цалва шяравудуш, тIайлабацIу чIа тIий бия гьарца дайсса давриву.
Хъирив дайдирхьуна лакку мазрал байран. Классраву лавхъун бия Р. ХIамзатовлул махъру: «Бат хьун най бухьурча гьунттий ва ттул маз, на хIадурну ура хIакьину ивчIан» тIисса. ОьрчIругу, хъинну ххуйну хIадургу хьуну, пасихIну ккалай бия кIа ялув кIицI бувсса луттиравасса балайрду-назмурду. Дия ххуйсса инсценировкарттугу: «Вяркъу Къянив лавгуна тIар», «Танмал», «Вяркъу ва цулчIа» тIисса. Байран хъиннура чIюлу дуруна хъуними классирттал оьрчIал дурсса къавтIавуртталгу. ДакIний личIанну ларгунни ГьунчIукьатIрал школданий «Мюрщи щаращал щурщу» луттирал презентация ва лакку мазрал кьинилун хас дурсса байран.
«Дараччи» клубрал зузалт
ХIадур бувссар З.Аьбдуллаевал