Жун хъинну ххуйну кIулли Мирза Давыдов халкьуннан ххира хьусса шаэр, прозаик, драматург, журналист ушиву. Ттуща сивсуну учин бюхъанссар, ва ур пагьму бусса шаэр, прозаик, драматург, журналист куну.
Цал, 1968 шинал, хъирив 1974 шинал Москавлив бувксса «Бутули» тIисса оьрчIансса хавардал жужлил щалва Аьрасатнаву лавайсса кьимат лавсунни. Ттун дакIнийри, лу бувккукун «Дагестанская правда» кказитрай ва луттирал хIакъираву цIа дурксса чичултрал Рашид Рашидовлул, Нураттин Юсуповлул ва Казбек Султановлул чивчумур. Аьрасатнал оьрчIансса прозалуву ва лу ххуймунил цалчинсса кьюкьраву буссар.
Ванал тIутIимур хъиннува тасттикь буллай бур «Бутули» тIисса Мирза Давыдовлул чивчусса лу оьруснал ва украиннал халкьуннал мазурдий итабакьаврил. Мунал чивчусса «Мукьва кIялагьи» тIисса лугу итабавкьунни лакрал бакъассагу, оьруснал ва парснал мазурдийгу.

Мирза Давыдовлул цIа хъиннура машгьур дуруна Москавлив «Современник» тIисса издательствалул итабавкьусса «Ялугьлагьу ттух зунзул чаннахь» тIисса романдалул. Ва луттираха зий авторнал 12 шин дурну дур.
Мирза Давыдов ххирар бу­ккултран. Ванал чивчусса лу­ттирдава цавагу, машан ласунма акъа, луттирду баххай ттучаннай лахъи къалагай. Ва авторнал «Кьурукьирттал ссав» тIисса лу итабавкьуну ххари бунну. Ва лу итабавкьунни Москавлив «Ух­ссавнил Ккавкказнал шаэртал» тIисса издательствалул, жуна ххирасса шаэр Расул ХIамзатовлул фондрал харжирацIух.
Авторнал лакку мазрайсса шеърирдал лу итабавкьунни Дагъусттаннал луттирду итабакьай издательствалул. Ваниву шаэр цала чаннасса, амма ттюнгъасса дакIнива ккаккан буллай ур жула халкьуннал, цIанасса чIумул цIуцIи кIанттурду.
«Ттула буттал улча» тIисса ванал назму ккалаккинирив дакI къума лаглай, яру цайнува цив­ппа мукьал буцIлай бур. Ваниву Мирза Давыдов буслай ур лакрал халкь гужрай, цала ппухълуннал минардугу кьаритан бувну, Чачаннавун бизан буллай ккурхIусса дардирдая.
Вай инсантал, хаснува, ласру аьрайсса хъами, къари-къужри, оьрчIру аьравалттайн цала бузагу лакьин бувну, бахьтта, архсса ххуллийх нани бувну, вайннайсса язухърал хIатта лагмасса мурулливгума аьтIий бия, тIий ур автор.
Ва лу шанма бутIуя сакин хьуну бур. Гьарца бутIагу щаллусса тарихну хъанай бур. Лакрал чичултран ччянива кIулссар Мирза Давыдов усттарсса мукъул заллу, шаэр-лирик ушиву.
НахIакь бакъархха цикссагу ванал шеърирду композитортурал макьаннай балайрдайн кIура баен бувсса.
«Ттул буттал улчай» тIисса луттираву Мирза лакку мазрай чичлачисса цикссагу лириктураяргу хъинну ялтту увккун ур.
Буттал улча кIулмур библиотека ва букку хIисаврай на хъуннасса вихшалдарай тIий бура ва ляличIисса, цайминнуха къалавхьхьусса луттирал жула лакрал цIанасса литература хъиннура авадан данссар. Буккултрангу ва лу ххуйсса ссайгъатну хъанай бур. Мирза Давыдовлул луттирдащал зуща кIул хьун бюхъайссар Р. ХIамзатовлул цIанийсса Миллат­рал библиотекалул миллатрал ва краеведениялул отделданий.
Миясат Дандамаева,
ДР-лул культуралул лайкь хьусса зузала,
Р. ХIамзатовлул цIанийсса Миллатрал библиотекалул миллатрал ва краеведениялул отделданул хъунмур